ក្រុងប៉ោយប៉ែត ៖ ករណីគ្រោះថ្នាក់ចរាចរណ៍មួយបានបង្កឡើងដោយរថយន្តដឹកជញ្ជូនអាចម៍ដីបើកបុក កិនបុរសម្នាក់ស្លាប់យ៉ាងអាណោចអាធម័នៅនឹងកន្លែងកើតហេតុ កាលពីវេលាម៉ោង៥ និង១៥នាទីល្ងាច ថ្ងៃទី២០ ធ្នូ ២០១៤ នៅចំណុចផ្លូវលំមួយកន្លែងជាប់ព្រំប្រទល់ភូមិមិត្តភាព សង្កាត់ប៉ោយប៉ែត និងភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ។
សាក្សីនៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តយឺឌុបដឹកអាចម៍ដីមួយគ្រឿងដែលគេស្គាល់ថា ជារបស់ឈ្មោះ រី នៅមណ្ឌល៦ បានបើកបរដោយល្បឿនលឿន ដោយគ្មានការប្រុងប្រយត្ន័បន្តិចសោះ ហើយបានចេញពីផ្លូវលំមួយកន្លែងក្នុងភូមិមិត្តភាព ពីទិសកើតទៅជើង ឡើងមកផ្លូវលំធំមួយកន្លែងទៀត កែងជាប់ទៅ និងភូមិទួលពង្រ ក៏ស្រាប់តែវាក់អឺនិងបុរសម្នាក់ជិះម៉ូតូម៉ាកហុងដាឌ្រីមC125 ពណ៌ខ្មៅមួយគ្រឿង ជិះតែម្នាក់ឯង ក៍បុកនិងកិនបណ្តាលឱ្យស្លាប់ភ្លាមៗនៅនឹងកន្លែងកើតហេតុតែម្តង ។
សាក្សីបន្តថា បុរសដែលស្លាប់មានឈ្មោះ ឡុង អាយុប្រហែល៣០ឆ្នាំ រស់នៅ ភូមិប្រជាធម្ម សង្កាត់ផ្សារកណ្តាល។
សូមបញ្ជាក់ថា នៅក្នុងភូមិកើតហេតុគេសង្កេតឃើញមានក្រុមហ៊ុនរថយន្តដឹកអាចម៍ដីជាច្រើន បានធ្វើអាជីវកម្មដើម្បីផលប្រយោជន៍ផ្ទាល់ខ្លួន យ៉ាងគគ្រឹកគគ្រេងជារៀងរាល់ថ្ងៃតែម្តង ។ ហើយចំពោះតៃកុងរថយន្តដឹកអាចម៍ដីទាំងនោះ បានបើកបរដោយគ្មានសុជីវធម៍ទេ គឺបើកបរដោយល្បឿនលឿន បង្ហុយដីយ៉ាងទ្រលោម ជះមកលើអ្នកធ្វើដំណើរ រួមទាំងផ្ទះប្រជាពលរដ្ឋដែលរស់នៅសងខាងផ្លូវផងដែរ ។
គួរំលឹកថា ចំពោះរថយន្តក្រុមហ៊ុនដឹកអាចម៍ដីធ្វើអាជីវកម្មទាំងនោះកន្លងមកថ្មីៗនេះ ប្រជាពលរដ្ឋដែលរស់សងខាងផ្លូវបាននាំគ្នាធ្វើការតវ៉ា ឃាត់រថយន្តដឹកអាចម៍ដីទាំងនោះឱ្យឈប់ដើម្បីឱ្យអស់លោកអាជ្ញាធរ មានសមត្ថកិច្ចជួយអន្តរាគមន៍ ពីបញ្ហាសុខភាពរបស់ពួកគាត់ ដោយបានសំណូមពរ ឱ្យខាងក្រុមហ៊ុនជាម្ចាស់រថយន្ត ជួយចាក់ទឹកក្នុង១ថ្ងៃ២ដង គឺពេលព្រឹក និងពេលល្ងាចផងដែរ ។ ប៉ុន្តែការសំណូមពររបស់ ពួកគាត់ជាពលរដ្ឋទាំងនោះមិនត្រូវបានខាងក្រុមហ៊ុនយកចិត្តទុកដាក់ទៅតាមការសន្យាឡើយ ។
ជាចុងបញ្ចប់ប្រជាពលរដ្ឋបានទទូចសុំឱ្យលោក ង៉ោ ម៉េងជ្រួន អភិបាលក្រុងប៉ោយប៉ែត ក៏ដូចជាលោក គោ ស៊ុំសារឿត អភិបាលខេត្តបន្ទាយមានជ័យ មេត្តាជួយយកចិត្តទុកដាក់ គិតគូរពីបញ្ហាសុខភាព របស់ពួកគាត់ទៅថ្ងៃអនាគតផងទាន ។
ចែករំលែកព័តមាននេះ