ខេត្តកំពង់ឆ្នាំង ៖ កុមារីអាយុ៨ឆ្នាំម្នាក់ ត្រួវបានរថយន្តលុចស៊ីសមួយគ្រឿងបុកស្លាប់ទាំងវ័យក្មេង គ្រាដែលនាងទើបតែចេញពីសាលារៀនឆ្លងផ្លូវដើរសំដៅមកផ្ទះ ។ ហេតុការណ៏នេះបានកើតឡើងនៅវេលាម៉ោង១១ និង១៥នាទីថ្ងៃត្រង់ ថ្ងៃទី១៩ ខែធ្នូ ឆ្នាំ២០១៤ នៅលើផ្លូវជាតិលេខ៥ ស្ថិតនៅក្នុងភូមិអណ្តូងជ្រៃ ឃុំអណ្តូងស្នាយ ស្រុករលាប្អៀរ ។
ក្រុមគ្រួសារកុមារីរងគ្រោះខាងលើបានអោយដឹងថា កុមារីរងគ្រោះមានឈ្មោះ ហេង ស្រីថា អាយុ៨ឆ្នាំ ជាសិស្សរៀនថ្នាក់ទី២ មានម្តាយឈ្មោះ គង់ ចនី្ន អាយុ២៧ឆ្នាំ ឪពុកឈ្មោះ ឈឿង ភឹម អាយុ២៨ឆ្នាំ មានកូន៣នាក់ ស្រី២នាក់ កុមារីដែលស្លាប់ជាកូនច្បង ។ គ្រួសារមួយនេះ មានមុខរបរជាកម្មករបំរើការនៅក្នុងសិប្បកម្មឡឥដ្ឋ រស់នៅក្នុងភូមិឃុំកើតហេតុខាងលើ ។
មុនពេលកើតហេតុកុមារីរងគ្រោះបានចេញពីសាលារៀនធ្វើដំណើរឆ្លងផ្លូវពីលិចទៅកើត ពេលនាងកំពុងដើរឆ្លង ក៏ស្រាប់តែមានរថយន្តមួយគ្រឿងម៉ាកលុចស៊ីស XR 330 ពណ៏ស្ករ គ្មានស្លាកលេខ ធ្វើដំណើរពីត្បូងទៅជើង បានមកបុកកុមារីរងគ្រោះពេញទំហឹង ប៉ើងខ្ទាតចំងាយ២០ម៉ែត្រ បាក់.កស្លាប់ភ្លាមៗនៅកន្លែងកើតហេតុ ។ ដោយឡែករថយន្តបានឈប់នៅកន្លែងកើតហេតុ ចំណែកអ្នកបើករថយន្ត បានបើកទ្វាររត់គេចខ្លួនបាត់ បន្សល់ទុកអ្នករួមដំណើរ២ទៅ៣នាក់នៅក្នុងរថយន្ត ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ