ខេត្តកណ្តាល ៖ រឿងរ៉ាវគួរឱ្យជក់ចិត្តដិតដាមក្នុងអារម្មណ៍មួយសម្រាប់អ្នកអានក្នុងសប្តាហ៍នេះ គឺការទារបណ្ណាការតម្លៃ២.៥០០ដុល្លារវិញ ពីគ្រួសារខាងស្រី បន្ទាប់ពីរៀបការហើយនាងមិនរួមដំណេកជាមួយ ។
ខេត្តកណ្តាល ៖ រឿងរ៉ាវគួរឱ្យជក់ចិត្តដិតដាមក្នុងអារម្មណ៍មួយសម្រាប់អ្នកអានក្នុងសប្តាហ៍នេះ គឺការទារបណ្ណាការតម្លៃ២.៥០០ដុល្លារវិញ ពីគ្រួសារខាងស្រី បន្ទាប់ពីរៀបការហើយនាងមិនរួមដំណេកជាមួយ ។ អ្វីដែលត្រូវបានមើលឃើញថា ជារឿង«ប្រាក់ក៏បង់ថង់ក៏ដាច» ឬអាចថា រឿងត្រីរ៉ស់ក៏រួច ទន្សាយក៏រួច ដោយសារបុរសចំណាស់ជាកូនកម្លោះពិការជើងម្ខាង បានត្រឹមសុបិនក្រោយថ្ងៃរៀបការ ព្រោះតែកន្និថាមិនស្ម័គ្រ ជំពាក់ចិត្តជាមួយ ក៏ក្លាយទៅជាការទារយកបណ្ណាការវិញ ។ រឿងរ៉ាវខកចិត្តនេះក៏បានផ្ទុះទ្បើងកក្រើកស្រុកកៀនស្វាយ ដោយសារតែការទារបណ្ណាការក្លាយទៅជាការជាប់ចោទ ចាប់បង្ខាំងមនុស្សជំរិតទារប្រាក់ ហើយប៉ូលិសកំពុងកសាងសំណុំរឿង ។
ហេតុការណ៍ដែលឈានដល់ការជាប់ចោទនេះ ដោយសារតែបុរសចំណាស់ចង់បានប្រពន្ធក្មេង បន្ទាប់ពីបានភ្លើងខៀវពីប្រពន្ធ ដែលមានជំងឺមិនអាចកំដរតណ្ហាប្តីបាន ក៏រកប្រពន្ធថ្មីឱ្យប្តីរៀបការ ។ ផ្ទុយទៅវិញ ការជ្រើសរើសមិនមើលប្រាណមិនត្រឹមតែ«ទ្បុងចុង» ហើយមតិខ្លះនិយាយថា បើគ្រាន់តែកំដរតណ្ហាខ្វះណាស់ទៅឬស្រីវ័យប្រហែលគ្នា ឬស្ត្រីមេម៉ាយដែលស្ម័គ្រខ្លួននៅក្នុងភូមិស្រុកជាមួយវាល្អជាង មិនខុសពីពាក្យចាស់លោកពោលថា ជួញជិតជាជាងជួញឆ្ងាយឡើយ ។ ប៉ុន្តែបែរជាទៅឃើញនៅឯខេត្តកំពត និងជាក្មេងស្រីវ័យក្រពុំទៀត តើនាងមានអារម្មណ៍បែបណា ? ពិតណាស់ដែលនាងនិយាយត្រង់ៗនារាត្រីដំបូងថា «ខ្ញុំមិនស្រទ្បាញ់ពូឯងទេ» គឺជាវាចារាត្រីសុបិន ដែលនឹកថាបានក្រេបទឹកឃ្មុំ បែរក្លាយទៅជាទឹកខ្មេះទៅវិញ ។
ជួបជាមួយស្ត្រីឈ្មោះ កែម ផួន ជាប្រពន្ធដើមដែលស្ម័គ្រចិត្តរកប្រពន្ធថ្មីឱ្យប្តីមួយទៀត ព្រោះតែខ្លួនឯងមានជំងឺ បានឱ្យកោះសន្តិភាពដឹងថា គាត់មានរោគស្ត្រីរយៈពេលជាង១ឆ្នាំហើយ មិនដែលបានដេកជាមួយប្តីទេ ។ ដោយសារអាណិតអាសូរប្តី គាត់បាននិយាយប្រាប់ប្តីថា បើឯងមើលឃើញស្រីណាល្អ ចរិតមាយាទចេះស្រទ្បាញ់ប្រពន្ធកូនក្រុមគ្រួសារ ខ្ញុំសុខចិត្តចូលស្តីដណ្តឹងរៀបការតាមប្រពៃណី ឱ្យតែគេស្រទ្បាញ់ខ្លួនឯងដោយស្មោះ ។ អ្នកស្រីនិយាយថា មិនទាន់បានប៉ុន្មានថ្ងៃផង មានបុរសម្នាក់ឈ្មោះ រៀប រស់ នៅភូមិជាមួយគ្នា ធ្វើការរោងចក្រនៅភ្នំពេញ បានទូរស័ព្ទប្រាប់ប្តីគាត់ថា មានស្ត្រីវ័យក្មេងម្នាក់អាយុប្រហែល២០ឆ្នាំ ធ្វើការងាររោងចក្រដែរ ខណៈពេលនោះគាត់និងប្តី ក៏ជិះម៉ូតូឌុបគ្នាទៅមើលនារីនោះ ដល់ផ្ទះជួលនៅទួលសង្កែ ព្រមទាំងជួបជាមួយបងប្អូននារីនោះដែរ ។ ហើយខាងស្រីនោះ៧នាក់ ក៏បានមកមើលផ្ទះគាត់វិញ ពេលគេត្រទ្បប់ទៅវិញបាន២ថ្ងៃ គេឆ្លើយថា ព្រមលើកកូនឱ្យប្តីខ្ញុំហើយ ។
អ្នកស្រីបន្តទៀតថា ថ្ងៃចូលដណ្តឹងរៀបការគាត់ទៅទាំងម៉ែឪ យាយតា បងប្អូនសាច់ញាតិ ចំណែកខាងស្រីនោះ ក៏សុទ្ធតែបានដឹងថា គាត់ជាប្រពន្ធដើម ។ ធ្វើសំបុត្របញ្ជាក់ ក៏ខ្ញុំទៅសុំមេឃុំធ្វើឱ្យដែរ ដោយខាងស្រីប្រាប់ថា យើងត្រូវរ៉ូវគ្នាអស់ហើយ ពេលធ្វើលិខិតបញ្ជាក់ដាក់ថាពោះម៉ាយ ទើបខាងគាត់គេចេញច្បាប់ឱ្យការ ។ ស្រាប់តែដល់ពេលការហើយ បែរជាមិនចុះដំណេកជាមួយប្តីគាត់ ហើយប្តីគាត់ក៏មិនបង្ខំដែរគ្រាន់តែនិយាយថា ហេតុអ្វីបានជាមិនដេកជាមួយគាត់ ។ ស្រីរូបនោះឆ្លើយថា អត់ស្រទ្បាញ់ប្តីគាត់ទេ ទើបសួរថា បើអត់ស្រទ្បាញ់ម៉េចក៏ព្រមរៀបការជាមួយ ។
ពេលនោះប្តីគាត់ថា ឥទ្បូងខ្ញុំអត់ទាន់បានប៉ះពាល់ខ្លួនប្រាណនាងទេ ដូច្នេះត្រូវសងបណ្ណាការចំនួន២.៥០០ដុល្លារមកវិញ ។
លោក សុខ ឆាង ដែលជាអតីតយោធាកំបុតជើងត្រឹមជង្គង់ និងជាកូនកម្លោះ បាននិយាយប្រាប់កោះសន្តិភាពម្សិលមិញដោយគាត់សង្ស័យថា ការបដិសេធរបស់កូនក្រមុំក្នុងថ្ងៃផ្សំដំណេកប្រហែលមានអ្នកទី៣មកជ្រែក ចង់ធ្វើបាបគាត់ ។ គាត់ថា រឿងនេះអយុត្តិធម៌សម្រាប់គាត់ ដែលប៉ូលិសយុត្តិធម៌ស្រុកកៀនស្វាយ ចុះមកសួរលម្អិតរឿងតែម្ខាង ហើយពេលហៅគាត់ទៅសាកសួរនៅអធិការដ្ឋានស្រុក មិនមានពាក្យបណ្តឹងអ្វីសោះ ។ ចំណែកខាងស្រីគេចខ្លួនបាត់អស់ បែរជាដាក់បន្ទុកមកលើរូបគាត់វិញ គាត់មិនសុខចិត្តទេ ។ គាត់ថា ឥទ្បូវតើអ្នកណាទទួលខុសត្រូវ បណ្ណាការគាត់ គាត់ត្រូវការយកប្រាក់មកវិញ ដើម្បីចិញ្ចឹមប្រពន្ធកូន ព្រោះគាត់ជាជនពិការជើង ។
មេឃុំបន្ទាយដែក លោក ឃួន គង់ បានបញ្ជាក់ថា ដំបូងស្ត្រីឈ្មោះ កែម ផួន ត្រូវជាប្រពន្ធដើមឈ្មោះ សុខ ឆាង បានមកសុំលោកធ្វើលិខិតបញ្ជាក់ការប្រពន្ធឱ្យប្តី ហើយគាត់មិនចង់ធ្វើឱ្យទេ ប៉ុន្តែស្ត្រីនោះរៀបរាប់ថា ខ្លួនមានរោគស្ត្រីមានការអាណិតអាសូរដល់ប្តី បានអង្វរគាត់ ។ ដោយយល់ថា មានការព្រមព្រៀងឯកភាពគ្នាហើយ ទើបគាត់ធ្វើឱ្យ ។
ដោយទ្បែក លោក ងិន ណិន ជំទប់ទី១ និងលោក ព្រើម ប៊ុនធឿន នាយប៉ុស្តិ៍រដ្ឋបាលបន្ទាយដែក ពិតជាបានទទួលស្គាល់ថា ភាគីខាងស្រីរៀបការរួចមិនចុះដំណេក និងពិតជាបានព្រមព្រៀងធ្វើកិច្ចសន្យាសងបណ្ណាការចំនួន២លើកមែន ដោយឱ្យក្រុមគ្រួសារទៅស្រុករកប្រាក់មកសង ដែលលើកទី១ ថ្ងៃទី៦ ធ្នូ មិនឃើញមក លើកទី២ ថ្ងៃទី១០ ធ្នូ ក៏មិនឃើញមកទៀត ទើបស្ត្រីជាម្តាយនិងកូនស្រីចេញពីផ្ទះគាត់ទៅនៅផ្ទះអ្នកភូមិក្បែរគ្នា ។ លោក ប៉ា សំអិត អធិការនគរបាលស្រុកកៀនស្វាយ អ្នកយកព័ត៌មានកោះសន្តិភាពព្យាយាមជួបសូមការបំភ្លឺដែរ តែលោកមិននៅកន្លែង ទូរស័ព្ទចូលប៉ុន្តែអត់លើក ៕
ចែករំលែកព័តមាននេះ