រាជធានីភ្នំពេញ ៖ សំណុំរឿងបា.ញ់សម្លា.ប់លោកឧកញ៉ា អ៊ឹង ម៉េងជឺ ដែលរហូតមកដល់ពេលនេះ ត្រូវបានសមត្ថកិច្ចនគរបាលប្រកាសជាផ្លូវការថា ឧកញ៉ា ថោង សារ៉ាត់ ជាមេខ្លោង បន្ទាប់ពីការចាប់ខ្លួនអង្គរក្ស៤នាក់
រាជធានីភ្នំពេញ ៖ សំណុំរឿងបាញ់សម្លាប់លោកឧកញ៉ា អ៊ឹង ម៉េងជឺ ដែលរហូតមកដល់ពេលនេះ ត្រូវបានសមត្ថកិច្ចនគរបាលប្រកាសជាផ្លូវការថា ឧកញ៉ា ថោង សារ៉ាត់ ជាមេខ្លោង បន្ទាប់ពីការចាប់ខ្លួនអង្គរក្ស៤នាក់ ។ ជាមួយនឹងការគេចខ្លួនរបស់ឧកញ៉ា ថោង សារ៉ាត់ រហូតមកដល់ពេលនេះ ក៏ជាការគេចខ្លួនសម័យបច្ចេកវិទ្យា IT ដែរ មានន័យថា ទោះបីជាកំពុងលាក់ខ្លួនក្តី ក៏ឧកញ៉ា ថោង សារ៉ាត់ នៅតែធ្វើការតវ៉ាថាខ្លួនមិនមែនជាឃាតករសម្លាប់ឧកញ៉ា អុឹង ម៉េងជឺ ទេ ហើយក៏មិនភ្លេចទទូចដល់សម្តេចតេជោ ហ៊ុន សែន ជួយរកយុត្តិធម៌ដល់ខ្លួនដែរ ។
ពីកន្លែងលាក់ខ្លួន ដំបូងឧកញ៉ា ថោង សារ៉ាត់ បានផ្សាយជាខ្សែអាត់សំឡេងប៉ុណ្ណោះ ប៉ុន្តែមកដល់ព្រឹកថ្ងៃទី១៩ ធ្នូ ការបង្ហោះមុខពិតរបស់ឧកញ៉ារូបនេះ ក៏បានបង្ហាញថាជាការប្រឹងប្រែងមួយដើម្បីច្រានចោលរាល់ការចោទប្រកាន់ថាខ្លួនជាមេខ្លោងឃាតករបាញ់សម្លាប់ឧកញ៉ា អុឹង ម៉េងជឺ ។ ក្នុងសម្តីអំពាវនាវដល់សម្តេចតេជោនាយករដ្ឋមន្ត្រី មុខមាត់របស់ឧកញ៉ា ថោង សារ៉ាត់ បានបង្កប់នូវទុក្ខសោក ដុះពុកមាត់រ៉ុយៗដូចភ្លេចកោរ សក់មិនរៀបរយ ដៃទាំង២លើកសំពះរហូតរយៈពេល៤នាទី ដែលក្នុងការថ្លែងនោះនៅតែអះអាងថា អង្គរក្សរបស់ខ្លួនទាំង៤នាក់មិនមែនជាឃាតករទេ ។ តាមមន្ត្រីប៉ូលិសដែលកំពុងសកម្មក្នុងកិច្ចការស្វែងរកចាប់ខ្លួននោះ បាននិយាយថា ឧកញ៉ា ថោង សារ៉ាត់ គួរតែមកតតាំងនៅតុលាការវិញ ហើយបញ្ឈប់ការគេចខ្លួនទៅ បើមិនមែនជាមេខ្លោងឃាតករទេនោះ ។
មុននេះមួយថ្ងៃ កម្លាំងសមត្ថកិច្ចបានចុះទៅឆែកឆេរផ្ទះភរិយាទី៣របស់ឧកញ៉ា ថោង សារ៉ាត់ ដែលបានគេចខ្លួនបាត់ជាមួយគ្នា នៅសង្កាត់ចាក់អង្រែក្រោម ខណ្ឌមានជ័យ ដោយបានដកហូតឯកសារមួយចំនួន និងសម្រេចប្លុំបេផ្ទះនោះជាបណ្ដោះអាសន្ន ។
គណៈកម្មការស្រាវជ្រាវនេះដឹកនាំដោយលោក អាំង មាលតី ប្រធានសាលាដំបូងរាជធានីភ្នំពេញ ដោយមានការចូលរួមពីសំណាក់ស្ថាប័នអយ្យការ និងនគរបាលនាយកដ្ឋានកណ្ដាលព្រហ្មទណ្ឌក្រសួងមហាផ្ទៃ មាននាយកដ្ឋាននគរបាលព្រហ្មទណ្ឌ នាយកដ្ឋាននគរបាលបច្ចេកទេស និងវិទ្យាសាស្ត្រ ព្រមទាំងនគរបាលស្នងការដ្ឋានរាជធានីភ្នំពេញ ។
គណៈកម្មការនេះបានឆែកឆេរផ្ទះលេខ៩១៧B (បុរី៩៩៩) ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ដែលជាផ្ទះរបស់លោកស្រីឌួង ថាវរី អាយុ៣០ឆ្នាំ ជាភរិយាទី៣របស់ឧកញ៉ាថោង សារ៉ាត់ ។ ការចុះឆែកឆេរផ្ទះភរិយាទី៣នេះ គឺដើម្បីរកវត្ថុតាងបន្ថែមទៀតសម្រាប់ដាក់បន្ទុកលើជនត្រូវចោទក្នុងអំពើផ្ដើមគំនិតឃាតកម្មគិតទុកជាមុន លើជនរងគ្រោះឧកញ៉ាអុឹង ម៉េងជឺ ។
តាមប្រភពព័ត៌មានធ្លាយចេញពីគណៈកម្មការស្រាវជ្រាវបទល្មើសនោះបានឱ្យដឹងថា គណៈកម្មការបានរកឃើញនៅក្នុងទូដែកលោកស្រីឌួង ថាវរី នូវលិខិតផ្ទេរសិទ្ធិគ្រប់គ្រងផ្ទះ និងដីធ្លីពីឈ្មោះថោង សារ៉ាត់ ឱ្យទៅលោកស្រីឌួង ថាវរី ដែលជាភរិយាទី៣ និងបានដកហូតឯកសារមួយចំនួននោះ ហើយគណៈកម្មការបានដកហូតឯកសារមួយចំនួនទៀតដើម្បីយកទៅធ្វើការត្រួតពិនិត្យនិងស្រាវជ្រាវបន្ត ។ក្រោយពីការឆែកឆេរនិងបានដកហូតឯកសារមួយចំនួននោះហើយ គណៈកម្មការបានប្លុំបេបិទផ្ទះនេះជា
បណ្ដោះអាសន្ន ខណៈម្ចាស់ផ្ទះមិននៅ ។ ជាមួយនេះ គណៈកម្មការដែលមានលោកប្រធានសាលាដំបូងរាជធានីភ្នំពេញដឹកនាំ បានសម្រេចបើកផ្ទះលេខ៩២៩B (បុរី៩៩៩) ជាផ្ទះរបស់លោកស្រីទាវ ធីតា អាយុ៣៤ឆ្នាំ ជាភរិយាទី២ របស់ឧកញ៉ាថោង សារ៉ាត់ ដែលនៅក្បែរគ្នានឹងផ្ទះលោកស្រីឌួង ថាវរី ជាភរិយាទី៣ដែរនោះ ឱ្យបានប្រើប្រាស់ឡើងវិញ ៕
ចែករំលែកព័តមាននេះ