រាជធានីភ្នំពេញ ៖ រដ្ឋសភា បានបោះឆ្នោតដោយសំឡេងគាំទ្រ១០២សំឡេង លើ១០២សំឡេង ក្នុងការធ្វើវិសោធនកម្មបទបញ្ជាផ្ទៃ ក្នុងជំពូកទី១២ ប្រការ៤៨ថ្មី (ពីរ) និងប្រការ៤៨ថ្មី (បី) កាលពីព្រឹកថ្ងៃទី១៩ ធ្នូ ជាការត្រួសត្រាយផ្លូវបង្កើតឱ្យមានប្រធានក្រុមតំណាងរាស្ត្រ មតិភាគតិចក្នុងរដ្ឋសភា ដែលមានឋានៈស្មើនាយករដ្ឋមន្ត្រី ។
បន្ទាប់ពីចប់សម័យប្រជុំសភា លោក សម រង្ស៊ី បានប្រាប់ក្រុមអ្នកសារព័ត៌មានថា រូបលោកនឹងលើកយកបញ្ហាជាច្រើនដែលកំពុងកើតមាននាពេលបច្ចុប្បន្នទៅជជែកជាមួយប្រមុខរាជរដ្ឋាភិបាល ។ បញ្ហាដែលប្រជាពលរដ្ឋបានលើកឡើងសព្វថ្ងៃ មានសេដ្ឋកិច្ច បញ្ហាសង្គម បញ្ហានយោបាយ បញ្ហាតុលាការ ជនជាប់ចោទនៅបន្តឃុំខ្លួនដោយអយុត្តិធម៌ ។ រាល់បញ្ហាជាច្រើនដែលនៅកើតមានមិនទាន់ដោះស្រាយចប់នោះ ហើយដើម្បីបញ្ចប់រាល់បញ្ហាទាំងអស់ត្រូវតែមានការជជែកគ្នា រកដំណោះស្រាយដោយសន្តិវិធី ។ ទោះបីជាបែបណា លោក សម រង្ស៊ី មិនបានបញ្ជាក់ថា លោកនឹងក្លាយជាប្រធានក្រុមមតិភាគតិចឬយ៉ាងណានោះទេ ដោយលោកនិយាយថា ទាល់តែការធ្វើច្បាប់នេះឱ្យចប់រួចរាល់សិន ។
លោក សម រង្ស៊ី បញ្ជាក់ថា មានរឿងច្រើនណាស់សម្រាប់ជជែកជាមួយនាយករដ្ឋមន្ត្រី ទុកឲ្យគិត និងសរសេរសិន ហើយបញ្ហានេះមិនមែនជារឿងរបស់គណបក្សសង្គ្រោះជាតិនោះទេ គឺត្រូវជួបជាមួយសង្គមស៊ីវិល ប្រជាពលរដ្ឋ ដើម្បីឲ្យយល់ច្បាស់ អំពីយោបល់របស់គាត់ពាក់ព័ន្ធនឹងជីវភាពរស់នៅ ថាអ្វីដែលគាត់ត្រូវ ការ ។ លើសពីនេះ បញ្ហាប្រទេសជាតិ ដូចជាបញ្ហាទឹកដី បញ្ហាជនអន្តោប្រវេសន៍ បញ្ហាព្រៃឈើ ដែលទទួលរងវិនាសសកម្មយ៉ាងធ្ងន់ធ្ងរ និងកំពុងប៉ះពាល់ដល់អនាគតប្រទេសជាតិ ។
ប្រធានគណបក្សសង្គ្រោះជាតិរូបនេះ បន្ថែមថា ការអនុម័តច្បាប់នេះ គឺដើម្បីឲ្យប្រទេសរបស់យើងឆ្ពោះទៅរកលទ្ធិប្រជាធិបតេយ្យ ដូច្នេះត្រូវតែមានគណបក្សក្រៅរដ្ឋាភិបាលសម្រាប់មើលសកម្មភាព ហើយបើមានតែគណបក្សក្នុងរដ្ឋាភិបាល ឬរដ្ឋសភានោះ ចាំតែគាំទ្រ (ហៃអើ) រដ្ឋាភិបាលនោះ នឹងធ្លាក់ទឹកហើយ ។ ឥឡូវនេះសំខាន់ណាស់ព្រោះថា គណបក្សសង្គ្រោះជាតិ ឬគណបក្សក្រៅរាជរដ្ឋាភិបាល ត្រូវបានទទួលស្គាល់តាមផ្លូវច្បាប់ក្នុងការមានសិទ្ធិ មធ្យោបាយ តួនាទីឲ្យគណបក្សក្រៅរដ្ឋាភិបាលធ្វើការបំពេញតួនាទីរបស់ខ្លួនឲ្យបានពេញលេញ មិនមែនសម្រាប់តែគណបក្សសង្គ្រោះជាតិ ឬសម រង្ស៊ី ទេ ។ ការអនុម័តវិសោធនកម្មបទបញ្ជាផ្ទៃក្នុងរដ្ឋសភាថ្ងៃនេះមិនមែនសម្រាប់តែគណបក្សសង្គ្រោះជាតិនោះទេ គឺគណបក្សដែលមានអាសនៈក្នុងរដ្ឋសភាអាណត្តិក្រោយទៀតក៏នឹងអនុវត្តដូចគ្នានេះផងដែរ ។
លោក សម រង្ស៊ី បន្ថែមថា អ្វីដែលសម្រេចបាននៅពេលនេះ គឺការចង់បាន ឯកភាពជាតិ សេរីភាព សន្តិភាព យុត្តិធម៌ ហើយការអភិវឌ្ឍជាតិសម្រាប់ប្រជារាស្ត្រទាំងអស់គ្នា មិនមែនអភិវឌ្ឍន៍សម្រាប់ក្រុមណាម្នាក់ ក្រុមហ៊ុនណាមួយ ឧកញ៉ាណាម្នាក់ដូចបច្ចុប្បន្ននេះទេ គឺអភិវឌ្ឍន៍ឲ្យចំណេញខ្មែរទាំងមូល ។
លោក កឹម សុខា អនុប្រធានទី១ រដ្ឋសភាមានប្រសាសន៍ថា ការដែលធ្វើវិសោធនកម្មបទបញ្ជាផ្ទៃក្នុងរដ្ឋសភា គឺ៖
១-ជាស្មារតីនៃការបង្រួបបង្រួមជាតិ
២-ការពង្រឹងលទ្ធិប្រជាធិបតេយ្យនៅកម្ពុជា
៣-ការពង្រឹងការអភិវឌ្ឍជាតិដែលមានការចូលរួមពីគ្រប់ភាគី ។
ស្មារតីយើងចង់ឃើញតាំងពីយូរណាស់មក ហើយ ទោះបីជាមានគណបក្សនយោបាយផ្សេងពីគ្នាក្តី និងគណបក្សមួយស្ថិតនៅបក្សកាន់ អំណាច និងបក្សប្រឆាំង ទីបំផុតយើងបានរកកិច្ចព្រមព្រៀងបាន ។
លោក កឹម សុខា បន្តថា ទោះបីជាមានការទទួលស្គាល់ប្រធានក្រុមតំណាងរាស្ត្រមតិភាគតិចក្នុងសភា ដែលមានឋានៈស្មើនាយករដ្ឋមន្ត្រីក៏ដោយ ក៏ប៉ុន្តែតួនាទីរបស់តំណាងរាស្ត្រទាំងអស់នៅមានដដែល ។ មិនមែនថា តំណាងរាស្ត្រ ទាំងអស់ប្រគល់វាសនាទៅឲ្យថ្នាក់ដឹកនាំប្រធានក្រុមតំណាងរាស្ត្រសំឡេងភាគតិច ឬនាយករដ្ឋមន្ត្រីតែពីររូបនោះ ដើម្បីសម្រេចជោគវាសនារបស់ប្រទេសទាំងអស់នោះទេ ។ តំណាងរាស្ត្រ ត្រូវមានតួនាទីបីយ៉ាង គឺ៖
១-ជាអ្នកធ្វើច្បាប់ និងអនុម័តច្បាប់ ដូច្នេះមតិរបស់សមាជិកសភា នៅតែមានបញ្ចេញក្នុងរដ្ឋសភា ។
២-តាមដានសកម្មភាព ត្រួតពិនិត្យសកម្មភាពរបស់រាជរដ្ឋាភិបាលក្នុងការអនុវត្តច្បាប់ ។
៣-ការចុះជួបសួរសុខទុក្ខពលរដ្ឋ ។
លោក កឹម សុខា បន្ថែមថា ការបង្កើតប្រធានក្រុមតំណាងរាស្ត្រភាគតិចនេះ គឺជាអ្វីដែលប្រមូលផ្តុំតំណាងរាស្ត្រជាក្រុម ដើម្បីធ្វើការដែលមានចែងក្នុងបទបញ្ជាផ្ទៃក្នុងរដ្ឋសភា ក្នុងការលើកគោលនយោបាយរបស់គណបក្សនីមួយៗ និងសម្របសម្រួលការងារក្នុងរដ្ឋសភាផងដែរ ។
ចំណែកការជ្រើសរើសប្រធានក្រុមតំណាងរាស្ត្រភាគតិចដែលមានឋានៈស្មើនាយករដ្ឋមន្ត្រី ដើម្បីជជែកជាមួយនាយករដ្ឋមន្ត្រីនោះ ត្រូវបាន លោក កឹម សុខា អះអាងថា នៅពេលក្រុមតំណាងរាស្ត្រនីមួយៗមានការខ្វែងគំនិត ឬក៏រកដំណោះស្រាយចំពោះបញ្ហាជាតិមិនបាននោះត្រូវតែរាយការណ៍ដល់ប្រធានក្រុមសមាជិកភាគតិចនោះ ជជែកជាមួយនាយករដ្ឋមន្ត្រី ។ ប៉ុន្តែការសន្ទនារវាងប្រធានក្រុមតំណាងរាស្ត្រសំឡេងភាគតិច និងនាយករដ្ឋមន្ត្រីមិនអាចចេញជាច្បាប់ ឬជាសេចក្តីសម្រេចជាផ្លូវការនោះទេ គ្រាន់តែជាការដោះស្រាយបញ្ហាណាមួយដើម្បីឲ្យសភាជាអ្នកអនុម័ត ។ អ្វីដែលបង្កើតការសន្ទនាបានចៀសវាង ជាពិសេសនោះ គឺកុំឲ្យមានកម្តៅនយោបាយកើតឡើង ។
ទោះបីជាយ៉ាងណាក្តី លោក កឹម សុខា បានថ្លែងថា ការបង្កើតឲ្យមានប្រធានក្រុមតំណាងរាស្ត្រសំឡេងភាគតិច និងធ្វើវិសោធនកម្មបទបញ្ជាផ្ទៃក្នុងរដ្ឋសភា មិនបានធ្វើឲ្យចំណេញគណបក្សនយោបាយណាមួយនោះទេ ផ្ទុយទៅវិញ គឺផ្តល់លទ្ធភាពដល់អ្នកដែលមានបំណងបង្កើតគណបក្សនយោបាយទៅវិញ។ លោកបញ្ជាក់ថា «យើងរៀបចំសម្រាប់អ្នកទាំងអស់គ្នា សម្រាប់កូនចៅរបស់យើងនាពេលអនាគត ហើយការទាមទារពីសំណាក់បងប្អូនឲ្យមានចំណុចល្អតែម្តងនោះ មិនអាចធ្វើបានទេ គឺយើងកែបន្តិចម្តងៗ ។ ការធ្វើវិសោធនកម្មបទផ្ទៃក្នុងរដ្ឋសភា មិនទាន់ចប់នោះទេ គឺគណៈកម្មាធិការអចិន្ត្រៃយ៍បានឯកភាពគ្នាបង្កើតគណៈកម្មការពិសេសមួយ ដើម្បីធ្វើការបន្តបន្ទាប់ទៀត» ។
លោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា មានប្រសាសន៍ថា ការធ្វើវិសោធនកម្ម កែសម្រួល និងបន្ថែម ខ្លឹមសារ ចំណងជើងនៃជំពូកទី១២ ស្តីពីរបៀបប្រជុំ ត្រូវបានកែទៅជាជំពូកទី១២ថ្មី ស្តីពីរបៀបប្រជុំ និងថ្នាក់ដឹកនាំតំណាងរាស្ត្រ នៃគណបក្សនយោបាយ ដើម្បីឲ្យស្របទៅនឹងការចែងបន្ថែមថ្មីក្នុងប្រការ៤៨ថ្មី(បី) ។
លោក ប៉ែន បញ្ញា ថា ប្រការ៤៨ថ្មី(ពីរ) ត្រូវបានកែទៅជាប្រការ៤៨ថ្មី(បី) និងបញ្ញត្តិបន្ថែម ដូចជា តំណាងរាស្ត្រនៃគណបក្សនយោបាយ ដែលមានអាសនៈក្នុងរដ្ឋសភាចាប់ពី៥ភាគរយឡើងទៅ ត្រូវរៀបចំថ្នាក់ដឹកនាំតំណាងរាស្ត្រ នៃគណបក្សនយោបាយតាមគណបក្សនយោបាយនីមួយៗ ។ ថ្នាក់ដឹកនាំតំណាងរាស្ត្រនៃគណបក្សនយោបាយ មានសមាសភាពយ៉ាងច្រើន៣រូប ដោយត្រូវមានប្រធាន១រូប ។ បញ្ជីរាយនាមថ្នាក់ដឹកនាំតំណាងរាស្ត្រនៃគណបក្សនយោបាយត្រូវផ្ញើជូនប្រធានរដ្ឋសភា។ ថ្នាក់ដឹកនាំតំណាងរាស្ត្រនៃគណបក្សនយោបាយ មានភារកិច្ច ដូចជា ធ្វើការដឹកនាំតំណាងរាស្ត្ររបស់គណបក្ស ដើម្បីធ្វើឲ្យការងារពាក់ព័ន្ធទាំងឡាយប្រព្រឹត្តទៅស្របតាមកម្មវិធីនយោបាយ និងគោលការណ៍នានារបស់គណបក្ស។ ធ្វើការសម្របសម្រួលជាមួយថ្នាក់ដឹកនាំតំណាងរាស្ត្រគណបក្សនយោបាយដែលមានអាសនៈក្នុងរដ្ឋសភា ដើម្បីឲ្យការងារពាក់ព័ន្ធ ទាំងឡាយបានប្រព្រឹត្តទៅដោយរលូន និងធានាបាននូវផលប្រយោជន៍របស់ជាតិ និងប្រជាពលរដ្ឋ ។
លោកបន្ថែមថា រដ្ឋសភាត្រូវផ្តល់នូវមធ្យោបាយសមស្របដើម្បីថ្នាក់ដឹកនាំតំណាងរាស្ត្រភាគតិចក្នុងរដ្ឋសភាបំពេញតួនាទីរបស់ខ្លួនបានល្អនៅក្នុងរដ្ឋសភា ។ ប្រធានក្រុមតំណាងរាស្ត្រនៃគណបក្សនយោបាយក្រៅរដ្ឋាភិបាលដែលមានអាសនៈក្នុងរដ្ឋសភា ចាប់ពី២៥ភាគរយឡើងទៅ មានឈ្មោះហៅថា ប្រធានក្រុមមតិភាគតិចនៅរដ្ឋសភា ។ ប្រធានក្រុមមតិភាគតិចជាដៃគូសន្ទនាជាមួយប្រមុខរាជរដ្ឋាភិបាលទាក់ទងនឹងបញ្ហាប្រទេសជាតិ។ ប្រធានក្រុមមតិភាគតិចក្នុងរដ្ឋសភា មានឋានៈស្មើនាយករដ្ឋមន្ត្រី ៕
ចែករំលែកព័តមាននេះ