ខេត្តស្ទឹងត្រែង ៖ សមត្ថកិច្ចជំនាញ មាននគរបាលប្រឆាំងបទល្មើសសេដ្ឋកិច្ចខេត្ត សហការជាមួយនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ រួមនិងកម្លាំងនគរបាលស្រុកថាឡាបរិវ៉ាត់ បានធ្វើការឃាត់រថយន្ត ១គ្រឿងដឹកឈើក្រញូង ចេញពីខេត្តព្រះវិហារ ឆ្លងកាត់ខេត្តស្ទឹងត្រែង ។
រថយន្តម៉ាក អីុស៊ុយស៊ុយ បន្លំពាក់ស្លាក់លេខខ.ម ពណ៌ត្រេអ៊ី ត្រូវបាននគរបាលឃាត់ជាប់នៅចំណុចផ្លូវជាតិលេខ៩ ភូមិថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង រួមទាំងរឹបអូសវត្ថុតាងមាន ឈើក្រញូងចំនួន ៧៧ដុំ និងមធ្យោបាយដឹកជញ្ជូន រថយន្តម៉ាក អ៊ីស៊ុយស៊ុយ១គ្រឿង ហើយឃាត់ខ្លួនមនុស្ស៣នាក់នាំយកមកស្នងការដ្ឋានគរបាលខេត្ត កាលពីព្រឹកម៉ោង៨ ។
នគរបាលប្រឆាំងបទល្មើសសេដ្ឋកិច្ចខេត្តបានមានប្រសាសន៍ថា ការឃាត់បទល្មើសនេះ គឺធ្វើតាមមុខសញ្ញា ដែលមានការសង្ស័យ ក្នុងការដឹកបទល្មើស ទើបកម្លាំងនគរបាលធ្វើការដេញឃាត់ និងឆែកឆេរ ក្នុងកាបីន រថយន្ត ឃើញឈើក្រញូង ទើបបានជារឹបអូសទៅលើឈើក្រញូង និងមធ្យោបាយដឹកជញ្ជូន រួមនឹងមនុស្ស៣នាក់បញ្ជូនមកស្នងការនគរបាលខេត្ត ដើម្បីបង្កសំណុំរឿងបញ្ជូនទៅតុលាការធ្វើការវិនិច្ឆ័យ។
នគរបាលបានបន្តថា ឈើក្រញូងដែលរឹបអូសបានមានចំនួន ៧៧ដុំ ស្មើ៥៦២គីឡូក្រាម រថយន្តបំរើបទល្មើស ម៉ាក អីស៊ុយស៊ុយ បន្លំពាក្យស្លាក់លេខ ខ.ម ២.៤១៩៩ ពណ៌ត្រេអី ឃាត់ខ្លួន មនុស្សចំនួន៣នាក់ ទី១មានឈ្មោះ ប៊ុន លី ភេទប្រុស អាយុ៣៧ឆ្នាំ រស់នៅភូមិសុជ័យ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ទី២ ឈ្មោះ មិន ប៊ុត ភេទប្រុស អាយុ៣២ឆ្នាំ រស់នៅភូមិ ត្រពាំងសង្កែ ឃុំកន្ទួត ស្រុកជាំសាន ខេត្តព្រះវិហារ ទី៣ ឈ្មោះ មន ម៉ៅ ភេទប្រុស អាយុ២៩ត្រពាំងសង្កែ ឃុំកន្ទួត ស្រុកជាំសាន ខេត្តព្រះវិហារ ។
តាមពត៌មានបានអោយដឹង ជនសង្ស័យ៣នាក់ដែលឃាត់ខ្លួន មានអន្តរាគមន៍ ឆ្វាត់ឆ្វែងស្នើ សុំ ដល់ព្រះរាជអាជ្ញាដោះលែងវិញ។ ហើយតាមប្រភពពីនគរបាលបានអោយដឹងថា មនុស្សទាំង៣ នាក់ នោះមិនទាន់ដោះលែងទេនៅល្ងាចថ្ងៃទី១៩ ធ្នូ នេះ គឺនៅស្នងការដ្ឋាននគរបាលខេត្ត កំពុងសាកសួរ ។ គេសង្កេតឃើញថាបទល្មើព្រៃឈើ ក្រញូង ធ្នង់ បានកំពុងចរាចរណ៍ ដឹកជញ្ជូនចេញពីខេត្ត ស្ទឹងត្រែងទៅផ្សារងងឹតរបស់ក្រុមឧក្រិដ្ឋកម្ម ព្រៃឈើ បានដំណើរការយ៉ាងរលូន ដែលមានសមត្ថកិច្ចប្រដាប់អាវុធមួយក្តាប់តូចយកអំណាចមកកាងឈើ ហើយយកអំណាចរបស់ខ្លួនមកគំរាមអ្នកកាសែតមិនឱ្យផ្តិតយករូបភាព និងគំរាមមិនឱ្យអ្នកកាសែត ចេញតាមដងផ្លូវពេលយប់ដើម្បីឃ្លាំមើល បទល្មើសព្រៃឈើ ចរាចរពេលយប់ទេ បើសិនណាមានអ្នកកាសែតឃ្លាំមើលពេលយប់ សមត្ថកិច្ចប្រដាប់អាវុធ១ក្តាប់តូចនោះ មានវិធានការបង្រ្កាបភ្លាមៗ ទោះជាថ្នាក់ដឹកនាំកំពូលមានប្រសាសន៍ថា អ្នកសារត៌មានជាកញ្ចក់ឆ្លុះបញ្ចាំងយ៉ាងណាក៏ដោយក៏គេនៅតែប្រើអំណាចគាបសង្កត់ អ្នកសារព័ត៌មាន បំបាត់សិទ្ធសេរីភាព។
ចែករំលែកព័តមាននេះ