រាជធានីភ្នំពេញ ៖ បុរសជនជាតិជប៉ុនម្នាក់ត្រូវគេប្រទះឃើញដេកស្លាប់ក្នុងបន្ទប់លេខ៥០៤ជាន់ទី៥ នៃសណ្ឋាគារសេនធឺផ័ញអ៊ីន(CENTER POINT INN) ដែលមានទីតាំងផ្ទះលេខ២២៨Eo ភូមិ១ ផ្លូវលេខ១៣០ សង្កាត់ផ្សារថ្មី៣ ខណ្ឌដូនពេញ កាលពីវេលាម៉ោង៥ និង៤០នាទីល្ងាច ថ្ងៃទី១៨ ធ្នូ ២០១៤។
សមត្ថកិច្ចបានឲ្យដឹងថា បុរសជនជាតិជប៉ុនដែលស្លាប់ក្នុងសណ្ឋាគារខាងលើត្រូវបានគេស្គាល់ឈ្មោះ OHASHI TATSUYA អាយុ៥៦ឆ្នាំ មុខរបរទេសចរ កាន់លិខិតឆ្លងដែនលេខ MU.២៣៩០២៤៩ ។ សមត្ថកិច្ចឱ្យដឹងថា កាលពីថ្ងៃទី១៥ ធ្នូ ២០១៤ បុរសជនជាតិជប៉ុនខាងលើបានមកជួលបន្ទប់លេខ៥០៤នៃសណ្ឋាគារសេនធឺផ័ញអ៊ីន ស្នាក់នៅ ហើយនៅល្ងាចថ្ងៃកើតហេតុមិនឃើញបុរសនោះចុះមកខាងក្រោមទើបបុគ្គលិកសណ្ឋាគារសង្ស័យក៏ឡើងទៅគោះទ្វារ តែមិនមានការឆ្លើយតប រួចនាំគ្នាហៅជាងសោមកគាស់ទ្វារចូលមើលក៏ប្រទះឃើញដេកស្លាប់ធុំក្លិនទៅហើយ។
ទាក់ទិននឹងការស្លាប់របស់ជនជាតិជប៉ុននៅក្នុងសណ្ឋាគារសេនធឺផ័ញអ៊ីននេះ សមត្ថកិច្ចជំនាញមិនទាន់សនិដ្ឋានថា ស្លាប់ដោយសារមូលហេតុអ្វីនោះទេ គ្រាន់តែខាងគ្រូពេទ្យប្រចាំតុលាការបានបូបឈាមយកពិនិត្យតែប៉ុណ្ណោះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ