រាជធានីភ្នំពេញ ៖ គណៈបញ្ជាការឯកភាពខណ្ឌមានជ័យ នៅព្រឹកថ្ងៃទី១៩ ខែធ្នូ ឆ្នាំ២០១៤ បានបើកកិច្ចប្រជុំមួយ ស្តីអំពីការពង្រឹងសន្តិសុខសណ្តាប់ធ្នាប់ និងបូកសរុបលទ្ធផលការងារដែលសម្រេចបានកន្លងមក ក្រោមអធិបតីភាពលោកពេជ្រ កែវមុនី អភិបាលនៃគណៈអភិបាលខណ្ឌមានជ័យ ព្រមទាំងមានការចូលរួមពីសំណាក់មន្ត្រីនគរបាល សមាជិកសមាជិកា អភិបាលរង និងមន្ត្រីចម្រុះអោយសាលាខណ្ឌទាំងអស់ ។
លោកពេជ្រ កែវមុនី បានមានប្រសាសន៍អនុញ្ញាតិអោយចៅសង្កាត់ អភិបាលរង និងមន្ត្រីពាក់ព័ន្ធមួយចំនួនទៀត លើកឡើងអំពីផលលំបាក និងបញ្ហាប្រឈមការងារ និងលទ្ធផលការងារដែលសម្រេចបានរយះពេលមួយខែកន្លងមកនេះ ដើម្បីយកមកធ្វើការកែសម្រួល ឬប្រើយុទ្ធសាស្ត្រថ្មីណាមួយក្នុងការ ការពារ និងពង្រឹងសន្តិសុខ សណ្តាប់ធ្នាប់ របៀបរៀបរយល្អ ជូនបងប្អូនប្រជាពលរដ្ឋ និងដើម្បីបញ្ចៀសពីអំពើអសន្តិសុខផ្សេងៗ ដូចជាបាញ់ ឆក់ ប្លន់ ឬបញ្ហាផ្សេងៗ ទៀត ដែលបង្កឡើងពីសំណាក់ក្រុមជនអន្តពាល ក៏ដូចជាក្មេងទំនើងមួយចំនួនក្នុងមូលដ្ឋាននាពេលបច្ចុប្បន្ន ។
ជាចុងក្រោយលោកអភិបាលខណ្ឌបានមានប្រសាសន៍ជម្រុញដល់មន្ត្រីពាក់ព័ន្ធតាមផ្នែកនីមួយៗ ទាំងអស់មេត្តាយកចិត្តទុកដាក់គ្រប់សកម្មភាព ពិសេស គឺកិច្ចការពារសន្តិសុខសណ្តាប់ធ្នាប់ នៅក្នុងមូលដ្ឋានអោយបានល្អ និងបង្កើនការយកចិត្តទុកដាក់ ចុះណែនាំពន្យល់ប្រជាពលរដ្ឋភូមិសង្កាត់ អោយយល់អំពីបែបផែន បទដ្ឋានច្បាប់ ជាពិសេសករណីសំណង់ជាដើម ត្រូវសាងសង់ឡើងដោយមានច្បាប់ និងកំណត់ទីតាំងអោយបានច្បាស់លាស់ល្អ មុនធ្វើការសាង់សង់ ៕
ចែករំលែកព័តមាននេះ