ខេត្តបាត់ដំបង ៖ មន្ត្រីយោធាម្នាក់ បានប្រើប្រាស់កាំភ្លើងខ្លីរបស់ខ្លួនបាញ់សម្លាប់ប្រពន្ធនិងកូនស្រីអាយុ៣ឆ្នាំ យ៉ាងសាហាវព្រៃផ្សៃ រួចបាញ់សម្លាប់ខ្លួនឯងតាមក្រោយ កាលពីវេលាម៉ោង៧និង៣០នាទីយប់ថ្ងៃទី១៧ ធ្នូ នៅផ្ទះរបស់ខ្លួន ស្ថិតក្នុងភួមិភ្នំតូច ឃុំពេជ្រចិន្តា ស្រុកភ្នំព្រឹក ដែលតាមការអះអាងថា បណ្ដាលមកពីការប្រចណ្ឌប្រពន្ធយ៉ាងងប់ងុលគ្មានហេតុផល ។ មន្ត្រីកងរាជអាវុធហត្ថស្រុកភ្នំព្រឹកបានឲ្យដឹងថា ជនដៃដល់ឈ្មោះ រឹត ធី អាយុ៤៩ឆ្នាំ ជាមន្ត្រីយោធានៅអង្គភាពផ្នែកសឹករងស្រុកភ្នំព្រឹក រីឯប្រពន្ធឈ្មោះ សុខ បញ្ញា អាយុ២៧ឆ្នាំ និងកូនស្រីឈ្មោះ ចាន់ ណា ហៅមុំ អាយុ៣ឆ្នាំ។
មន្ត្រីដដែលបញ្ជាក់ថា មុនពេលកើតហេតុ គ្រួសារនេះបានផ្ទុះជម្លោះមួយប្រាវយ៉ាងខ្លាំងដែលអ្នកភូមិប្រាប់ថា ផ្ទុះចេញពីភ្លើងប្រចណ្ឌ។ គ្រានោះស្រាប់តែមន្ត្រីយោធាកំរោលចូលរូបនេះដកកាំភ្លើងខ្លីបាញ់សម្លាប់ប្រពន្ធនិងកូន រួចហើយបាញ់សម្លាប់ខ្លួនឯងតាមក្រោយតែម្ដង ។ សាក្សីនៅកន្លែងកើតហេតុនិយាយថា មន្ត្រីយោធាឈ្មោះ រឹត ធី បានលែងលះប្រពន្ធដើមដាច់ស្រេច ហើយទើបយកប្រពន្ធក្រោយឈ្មោះ សុខ បញ្ញា ដែលមកដល់ពេលនេះបានកូនស្រីមួយ ។ មន្ត្រីយោធាដែលបានប្រពន្ធក្រោយវ័យក្មេងនេះ តែងតែកើតមានជម្លោះជាមួយប្រពន្ធជាញឹកញាប់ ដែលផ្តើមចេញពីរឿងប្រចណ្ឌតែម្ដង ។ អ្នកភូមិបញ្ជាក់ថា ២ថ្ងៃមុនកើតហេតុ គេឮសំឡេងប្ដីប្រពន្ធនេះឈ្លោះប្រកែកគ្នាយ៉ាងខ្លាំង ដោយគេឮបុរសជាប្ដីស្ដីបន្ទោសប្រពន្ធតែពីរឿងពាក់ព័ន្ធជាមួយប្រុសឈ្មោលហើយក៏ស្ងាត់ទៅ ។ បន្ទាប់មកនៅយប់កើតហេតុស្រាប់តែផ្ទុះរឿងដដែលនេះទៀត និងកាន់តែខ្លាំងជាងមុន រហូតមានការផ្ទុះអាវុធជាច្រើនគ្រាប់ជាមួយនឹងសំឡេងស្រែកឱ្យគេជួយ។
ពេលនោះអ្នកភូមិភ្ញាក់ផ្អើលនាំគ្នាទៅមើល ក៏ស្រាប់តែឃើញប្ដីប្រពន្ធ និងកូនស្រីដេកស្លាប់រដូករណែលក្នុងថ្លុកឈាមក្បែរគ្នាអស់ទៅហើយ ។ គ្រានោះគេឃើញបុរសជាប្ដី និងកូនស្រីបានស្លាប់បាត់ទៅហើយ រីឯប្រពន្ធនៅដង្ហើមចង្រិត ត្រូវអ្នកភូមិជួយបញ្ជូនភ្លាមៗទៅមន្ទីរពេទ្យ តែអកុសលស្ត្រីរូបនេះបានស្លាប់នៅតាមផ្លូវ ។ សមត្ថកិច្ចនិយាយថា នេះជាសោកនាដកម្មក្នុងគ្រួសារដែលបង្កឡើងដោយបុរសជាប្ដី កើតចេញពីភ្លើងប្រចណ្ឌប្រពន្ធគ្មានហេតុផល ។ មន្ត្រីយោធារូបនេះបានប្រើកាំភ្លើងខ្លីម៉ាកK54 បាញ់ត្រូវដើមទ្រូងប្រពន្ធ១គ្រាប់ធ្លាយទៅក្រោយ រីឯកូនស្រីត្រូវ១គ្រាប់ក្រោមក្លៀកខាងស្ដាំធ្លាយទៅខាងឆ្វេង បន្ទាប់មកក៏បាញ់ខ្លួនឯង១គ្រាប់ចំដើមទ្រូងធ្លាយទៅខាងក្រោយដែរ ។ ទីបំផុត សពក្រុមគ្រួសារនេះត្រូវបានសាច់ញាតិចាត់ចែងរៀបចំធ្វើបុណ្យរួមគ្នាតាមប្រពៃណីនៅផ្ទះជនរងគ្រោះតែម្ដង ៕
ចែករំលែកព័តមាននេះ