រាជធានីភ្នំពេញ ៖ គណៈកម្មការស្រាវជ្រាវបទល្មើសឃាតកម្មលើសំណុំរឿងបាញ់សម្លាប់លោកឧកញ៉ាអឹុង ម៉េងជឺ ប្រៀបដូចទឹកស្ងប់តែក្នុងទឹកមិនប្រាកដថាគ្មានត្រីនោះទេ ។ កាលពីព្រឹកថ្ងៃទី១៨ ធ្នូ កម្លាំងសមត្ថកិច្ចបានចុះទៅឆែកឆេរផ្ទះភរិយាទី៣របស់ឧកញ៉ាថោង សារ៉ាត់ ដែលបានគេចខ្លួន នៅសង្កាត់ចាក់អង្រែក្រោម ខណ្ឌមានជ័យ ដោយបានដកហូតឯកសារមួយចំនួន និងសម្រេចប្លុំបេផ្ទះនោះជាបណ្ដោះអាសន្ន ។
គណៈកម្មការស្រាវជ្រាវនេះដឹកនាំដោយលោក អាំង មាលតី ប្រធានសាលាដំបូងរាជធានីភ្នំពេញ ដោយមានការចូលរួមពីសំណាក់ស្ថាប័នអយ្យការ និងនគរបាលនាយកដ្ឋានកណ្ដាលព្រហ្មទណ្ឌក្រសួងមហាផ្ទៃ មាននាយកដ្ឋាននគរបាលព្រហ្មទណ្ឌ នាយកដ្ឋាននគរបាលបច្ចេកទេស និងវិទ្យាសាស្ត្រ ព្រមទាំងនគរបាលស្នងការដ្ឋានរាជធានីភ្នំពេញ ។
គណៈកម្មការនេះបានឆែកឆេរផ្ទះលេខ៩១៧B (បុរី៩៩៩) ផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ដែលជាផ្ទះរបស់លោកស្រីឌួង ថាវរី អាយុ៣០ឆ្នាំ ជាភរិយាទី៣របស់ឧកញ៉ាថោង សារ៉ាត់ ។ ការចុះឆែកឆេរផ្ទះភរិយាទី៣នេះ គឺដើម្បីរកវត្ថុតាងបន្ថែមទៀតសម្រាប់ដាក់បន្ទុកលើជនត្រូវចោទក្នុងអំពើផ្ដើមគំនិតឃាតកម្មគិតទុកជាមុន លើជនរងគ្រោះឧកញ៉ាអុឹង ម៉េងជឺ ។ តាមប្រភពព័ត៌មានធ្លាយចេញពីគណៈកម្មការស្រាវជ្រាវបទល្មើសនោះបានឱ្យដឹងថា គណៈកម្មការបានរកឃើញនៅក្នុងទូដែកលោកស្រីឌួង ថាវរី នូវលិខិតផ្ទេរសិទ្ធិគ្រប់គ្រងផ្ទះ និងដីធ្លីពីឈ្មោះថោង សារ៉ាត់ ឱ្យទៅលោកស្រីឌួង ថាវរី ដែលជាភរិយាទី៣ និងបានដកហូតឯកសារមួយចំនួននោះ ហើយគណៈកម្មការបានដកហូតឯកសារមួយចំនួនទៀតដើម្បីយកទៅធ្វើការត្រួតពិនិត្យនិងស្រាវជ្រាវបន្ត ។ក្រោយពីការឆែកឆេរនិងបានដកហូតឯកសារមួយចំនួននោះហើយ គណៈកម្មការបានប្លុំបេបិទផ្ទះនេះជាបណ្ដោះអាសន្ន ខណៈម្ចាស់ផ្ទះមិននៅ ។
ជាមួយនេះ គណៈកម្មការដែលមានលោកប្រធានសាលាដំបូងរាជធានីភ្នំពេញដឹកនាំ បានសម្រេចបើកផ្ទះលេខ៩២៩B (បុរី៩៩៩) ជាផ្ទះរបស់លោកស្រីទាវ ធីតា អាយុ៣៤ឆ្នាំ ជាភរិយាទី២ របស់ឧកញ៉ាថោង សារ៉ាត់ ដែលនៅក្បែរគ្នានឹងផ្ទះលោកស្រីឌួង ថាវរី ជាភរិយាទី៣ដែរនោះ ឱ្យបានប្រើប្រាស់ឡើងវិញ ។ ក្រុមអ្នកតាមដានជុំវិញសំណុំរឿងនេះបានកត់សម្គាល់ថា ដំបូងសមត្ថកិច្ចបានបិទផ្ទះភរិយាទី២ ដល់ឥឡូវបើកផ្ទះភរិយាទី២វិញ ស្រាប់តែបិទផ្ទះភរិយាទី៣បន្ត ។ ចំណុចនេះបានធ្វើឱ្យអ្នកតាមដានសំណុំរឿងឃាតកម្មមួយនេះមានចម្ងល់ថា ហេតុអ្វីបានជាគណៈកម្មការប្រញាប់ប្រញាល់បើកផ្ទះភរិយាទី២ គឺផ្ទះលោកស្រីទាវ ធីតា ឱ្យប្រើប្រាស់ឆាប់ម្លេ៉ះ បើការសើុបអង្កេតកំពុងតែដំណើរការយ៉ាងក្ដៅគគកុកមិនទាន់បានបិទសំណុំរឿងផងនោះ ?
ប្រភពព័ត៌មានបានធ្លាយឱ្យដឹងថា លោកស្រីឌួង ថាវរី ជាភរិយាទី៣របស់ឧកញ៉ាថោង សារ៉ាត់ ក៏បាននិងកំពុងគេចខ្លួនទៅជាមួយឧកញ៉ាថោង សារ៉ាត់ ជាស្វាមី ដែរនិងមិនទាន់ដឹងច្បាស់ថាទៅលាក់ខ្លួនដល់ទីណានៅឡើយទេ ៕
ចែករំលែកព័តមាននេះ