រាជធានីភ្នំពេញ ៖ កម្មករសំណង់ម្នាក់ឈ្មោះ ហ៊ន ហង អាយុ៣៥ឆ្នាំ មានទីលំនៅផ្ទះលេខ១៣៧ ក្រុមទី១១ ភូមិគីរីមានន្ទ ឃុំអំពិល ស្រុកប្រាសាទបាគង ខេត្តសៀមរាម បានអង្គុយស្រែកយំនៅមុខការដ្ឋានសំណង់ ដ៏ធំមួយកន្លែងស្ថិតនៅតាមបណ្តោយផ្លូវ៣៧១ ភូមិត្នោតជ្រុំ សង្កាត់បឹងទំពុន ខណ្ឌមានជ័យ ស្រែករកគេឯងឱ្យជួយ ដោយចោទប្រកាន់ម្ចាស់ការដ្ឋានសំណង់ថា វាយធ្វើទារុណកម្មលើខ្លួន ហើយមិនបើកប្រាក់ថ្លៃពលកម្មឱ្យទៀត ។ ហេតុការណ៍នេះកើតឡើងនៅវេលាម៉ោង ៥ និង ៣០នាទីល្ងាច ថ្ងៃទី១៨ ខែធ្នូ ឆ្នាំ២០១៤ ។
ទាក់ទិននឹងរឿងហេតុខាងលើនេះ មេការសំណង់ភេទស្រីម្នាក់បានចេញមកអះអាងថា រឿងរ៉ាវនោះវាមិនពិតឡើយ គឺកម្មករកូនជាងរបស់គាត់ផឹកស្រាស្រវឹងឈ្លោះទាស់ទែងគ្នា កើតជាហិង្សាទៅវិញទៅមក ។ ដូច្នេះករណីនេះគាត់សុំសម្រួលដោះស្រាយជាមួយកូនចៅ ។
ទោះជាយ៉ាងណាក៏ដោយសមត្ថកិច្ចនគរបាលប៉ុស្តិ៍បឹងទំពុន បានចុះអន្តរាគមន៍ហៅជាងសំណង់ និងឈ្មោះ ហ៊ន ហង ទៅកាន់ស្នាក់ការនគរបាលប៉ុស្តិ៍ដើម្បីដោះស្រាយគ្នា តាមផ្លូវច្បាប់ ។
ចែករំលែកព័តមាននេះ