ខេត្តកំពង់ឆ្នាំង ៖ ប្រជាពលរដ្ឋក្នុងក្រុងកំពង់ឆ្នាំងបានសំណូមពរដល់អាជ្ញាធរខេត្តឱ្យជួយលុបបំបាត់នូវបាតភាពអាក្រក់ជាច្រើនយ៉ាងក្នុងខេត្តដូចជា សូមឱ្យគ្រូពេទ្យនៃមន្ទីពេទ្យខេត្តកំពង់ឆ្នាំងមានក្រមសីលធម៌សក្តិសមជាគ្រូពេទ្យជួយប្រជាពលរដ្ឋ សូមឱ្យអ្នកយកភាស៊ីកង់ម៉ូតូយកតម្លៃតាមសៀវភៅបន្ទុក អ្នកម៉ៅការដឹកសំរាមឱ្យទាន់ពេល និងកុំឱ្យយកលើសសៀវភៅបន្ទុក បញ្ហាធ្វើអត្តសញ្ញាណប័ណ្ណឱ្យបានតាមលេខរៀង និងកុំយកតម្លៃលើសកំណត់របស់រដ្ឋ និងស្នើសុំដាក់ភ្លើងបំភ្លឺនៅកែងមន្ទីរពេទ្យ និងកែងនគរបាលខេត្តជាដើម ។
ពួកគាត់បានលើកឡើងបែបនេះនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ឆ្នាំងអាណត្តិទី២ កាលពីព្រឹកថ្ងៃទី១៧ ធ្នូ ២០១៤ នៅសាលាក្រុងកំពង់ឆ្នាំង ក្រោមអធិបតីភាពលោក ឈួរ ច័ន្ទឌឿន អភិបាលខេត្តកំពង់ឆ្នាំង និងលោកម៉ែន ធឿន សមាជិកក្រុមប្រឹក្សាខេត្ត ។
ប្រជាពលរដ្ឋក្នុងក្រុងបានបញ្ជាក់ថា កន្លងទៅ គ្រូពេទ្យខេត្តតែងតែប្រើពាក្យមិនសមរម្យមកលើអ្នកជម្ងឺ ចំណែកអ្នកយកភាស៊ីកង់ ម៉ូតូវិញក៏កំពុងយកតម្លៃលើសសៀវភៅបន្ទុកដោយគ្មានមន្ទីរពាក់ព័ន្ធណា
ជូយអន្តរាគមន៍ឡើយ រីឯអ្នកដឹកសំរាមវិញមានភាពយឺតយ៉ាវ ជួនកាលទុកដល់២-៣ថ្ងៃក៏មាន ។ល។ ហេតុដូចឆ្នេះពួកគាត់ស្នើសុំឱ្យអាជ្ញាធរខេត្តមេតា្តជួយពួកគាត់នូវបញ្ហាខាងលើនេះផង ។
ឆ្លើយទៅនឹងក្តីកង្វល់របស់ប្រជាពលរដ្ឋខាងលើនេះលោក ឈួរ ច័ន្ទឌឿន អភិបាលខេត្តកំពង់ឆ្នាំង បានប្រសាសន៍ថា លោកនឹងទទួលយកទៅពិភាក្សាជាមួយមន្ទីរជំនាញដែលពាក់ព័ន្ធហើយ នឹងដោះស្រាយជូននៅពេលក្រោយ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ