រាជធានីភ្នំពេញ ៖ លោក សេង ស៊ីវុត្ថា ចៅក្រមជំនុំជម្រះសភាស៊ើបសួរនៃសាលាឧទ្ធរណ៍ នៅព្រឹកថ្ងៃទី១៧ ធ្នូ បានបើកសវនាការអសាធារណៈជំនុំជម្រះបណ្តឹងឧទ្ធរណ៍របស់ ព្រះរាជអាជ្ញាអមសាលាដំបូងខេត្តកណ្តាល ប្តឹងប្រឆាំងនឹងដីកាសម្រេចលើកលែងការចោទប្រកាន់របស់ចៅក្រមសាលាដំបូងខេត្តកណ្តាល ទៅលើឆ្មាំយាមព្រះសក្យមុនីចេតិយនៅលើភ្នំព្រះរាជទ្រព្យហៅភ្នំឧដុង្គ ចំនួន៥នាក់ ដែលត្រូវបានចោទប្រកាន់ពីបទ «លួចមានស្ថានទម្ងន់ទោស»ក្នុងសំណុំរឿងលួចព្រះបរមសារីរិកធាតុ ។
បន្ទាប់ពីការសួរដេញដោលប្រមាណ៣០នាទី លោកចៅក្រមសេង ស៊ីវុត្ថា បានលើកពេលប្រកាសសាលដីកាទៅថ្ងៃទី៣០ ធ្នូ ខាងមុខវិញ ។ ជនជាប់ចោទទាំង៥នាក់នេះ មាន ១-ឈ្មោះ ជា សុខែម អាយុ៦០ឆ្នាំ ជាប្រធានឆ្មាំ ២-ឈ្មោះ កា សាត អាយុ៤៦ឆ្នាំ ៣-ឈ្មោះ ស៊ាង សារិន អាយុ៦០ឆ្នាំ ៤-ឈ្មោះសោម ថៃ អាយុ៥៨ឆ្នាំ ៥-ឈ្មោះ កាន់ សុភ័ក្រ អាយុ៣៩ឆ្នាំ ត្រូវបានសមត្ថកិច្ចក្រសួងមហាផ្ទៃ ឃាត់ខ្លួនជាបន្តបន្ទាប់ កាលពីថ្ងៃទី១៣ ខែធ្នូ ឆ្នាំ២០១៣ ។
មេធាវីការពារក្តីឱ្យជនជាប់ចោទបានលើកឡើងថា នៅក្នុងសំណុំរឿងនេះជនជាប់ចោទទាំង៥នាក់ ត្រូវបានចៅក្រមសាលាដំបូងខេត្តកណ្តាលលើកលែងការចោទប្រកាន់រួចហើយ តែព្រះរាជអាជ្ញាបានប្តឹងទាស់មកសាលាឧទ្ធរណ៍ ។ លោកមេធាវីលើកឡើងថា តុលាការបានឃុំខ្លួនកូនក្តីរបស់គាត់ប្រមាណមួយ១ឆ្នាំមកហើយមិនព្រមដោះលែងព្រោះនៅជាប់បណ្តឹងអាជ្ញា ។ ជនជាប់ចោទត្រូវបាន លោក លឹម សុគន្ថា ចៅក្រមស៊ើបសួរសាលាដំបូងខេត្តកណ្តាល ឃុំខ្លួនដាក់ពន្ធនាគារជាបណ្តោះអាសន្នកាលពីរសៀលថ្ងៃអាទិត្យទី១៥ ខែធ្នូ ឆ្នាំ២០១៣ ពីបទលួចមានស្ថានទម្ងន់ទោស ។ កោដ្ឋមាសសម្រាប់តម្កល់ព្រះបរមសារីរិកធាតុ គឺជាអំណោយរបស់ប្រទេសស្រីលង្កា ថ្វាយដល់ព្រះមហាក្សត្រខ្មែរព្រះបាទសម្តេច ព្រះនរោត្តម សីហនុ ព្រះឧបយុវរាជ កាលពីឆ្នាំ១៩៥៧ ។
ក្នុងសំណុំរឿងនេះ សមត្ថកិច្ចបានឃាត់ខ្លួនជនសង្ស័យ២នាក់បន្ថែមទៀតគឺម្នាក់ជាអ្នកចូលលួច និងម្នាក់ទៀតជាអ្នកទទួលទិញដែលមានឈ្មោះ កែវ រស្មី ជាជនដៃដល់ធ្វើសកម្មភាពលួចព្រះបរមសារីរិកធាតុ និងស្ត្រីឈ្មោះ សៀក សារ៉េត ជាអ្នកទទួលទិញព្រះសុវណ្ណកោដ្ឋ ដាក់តម្កល់ព្រះបរមសារីរិកធាតុ ។ ជនឈ្មោះ កែវ រស្មី បានសារភាពថា រូបគេមានការប៉ុនប៉ងលួច ព្រះសុវណ្ណកោដ្ឋតាំងពីព្រះបរមរតនកោដ្ឋ ហែព្រះសារីរិកធាតុពីរាជធានីភ្នំពេញ ទៅតម្កល់លើកំពូលភ្នំព្រះរាជទ្រព្យមកម្លេ៉ះ ។ ចំពោះជនឈ្មោះ កែវ រស្មី និងឈ្មោះ សៀក សារ៉េត នេះ សាលាដំបូងខេត្តកណ្តាលទើបនឹងបញ្ចប់ការសាកសួរ ហើយនឹងបើកសវនាការកាត់សេចក្តីនៅពេលខាងមុខ ៕
ចែករំលែកព័តមាននេះ