ខេត្តបាត់ដំបង ៖ គិតត្រឹមម៉ោង១១និង៣០នាទីព្រឹក ថ្ងៃទី១៧ ធ្នូ ក្រុមគ្រួពេទ្យបានទទួលធ្វើតេស្ដឈាមប្រជាពលរដ្ឋនៅមណ្ឌលសុខភាពឃុំរកា ស្រុកសង្កែ បានចំនួនជាង៧៧០នាក់ហើយ ក្នុងចំណោមនេះមានមនុស្សប្រុសស្រីគ្រប់វ័យជាង១០០នាក់
ខេត្តបាត់ដំបង ៖ គិតត្រឹមម៉ោង១១និង៣០នាទីព្រឹក ថ្ងៃទី១៧ ធ្នូ ក្រុមគ្រួពេទ្យបានទទួលធ្វើតេស្ដឈាមប្រជាពលរដ្ឋនៅមណ្ឌលសុខភាពឃុំរកា ស្រុកសង្កែ បានចំនួនជាង៧៧០នាក់ហើយ ក្នុងចំណោមនេះមានមនុស្សប្រុសស្រីគ្រប់វ័យជាង១០០នាក់ ត្រូវបានគេសង្ស័យថា មានប្រតិកម្ម(ឆ្លងមេរោគអេដស៍) ។ នេះបើតាមការប្រកាសជាផ្លូវការរបស់លោក មាន ឈីវវុន ប្រធានអាជ្ញាធរជាតិប្រយុទ្ធប្រឆាំងជំងឺអេដស៍និងរោគសើស្បែក ប៉ុន្តែលោកមិនទាន់ហ៊ានអះអាងអំពីមូលហេតុនៃការឆ្លងមេរោគសាហាវនេះនៅទ្បើយទេ ។
លោក មាន ឈីវវុន បានប្រកាសតួលេខនេះនៅក្នុងសន្និសីតកាសែតមួយ ដែលលោកបានធ្វើកាលពីវេលាម៉ោង១១និង៣០ព្រឹក ថ្ងៃទី១៧ ធ្នូ នៅក្នុងសាលាឃុំរកា ស្រុកសង្កែ ដែលមានអាជ្ញាធរស្រុក ខេត្ត រួមទាំងក្រុមអ្នកសារព័ត៌មានជាច្រើនអង្គភាពបានចូលរួម ។ លោក មាន ឈីវវុន មានប្រសាសន៍ថា យើងមិនទាន់អាចធ្វើការសន្និដ្ឋានអំពីមូលហេតុនៃការឆ្លងរាលដាលនូវមេរោគអេដស៍ទៅលើប្រជាពលរដ្ឋនៅក្នុងភូមិរកា ឃុំរកា ស្រុកសង្កែ នេះបានភា្លមៗនៅឡើយទេ ។ ប៉ុន្តែលោកថា មន្ត្រីជំនាញបានយកឈាមអ្នកឆ្លងមេរោគទាំងនោះ ទៅធ្វើតេស្ដបន្ថែមឬធ្វើពិសោធន៍នៅភ្នំពេញ ហើយក៏កំពុងប្រមូលនូវព័ត៌មាននានា ដើម្បីធ្វើការស្រាវជ្រាវរកមូលហេតុពិតផងដែរ ។
លោកប្រធានអាជ្ញាធរជាតិប្រយុទ្ធប្រឆាំងជំងឺអេដស៍និងរោគសើស្បែក ថ្លែងថា គិតត្រឹមម៉ោង១១និង៣០នាទីព្រឹក ថ្ងៃទី១៧ ធ្នូ ក្រុមគ្រូពេទ្យបានធ្វើតេស្ដឈាមជូនប្រជាពលរដ្ឋបានចំនួន៧៧៥នាក់ ហើយក្នុងចំណោមនេះមានប្រជាពលរដ្ឋប្រុសស្រីគ្រប់វ័យចំនួន១០៦នាក់ ត្រូវបានរកឃើញថា មានប្រតិកម្ម(ឆ្លងមេរោគអេដស៍) ។ លោកបញ្ជាក់ថា ការធ្វើតេស្ដឈាមបន្ថែម នៃអ្នកឆ្លងមេរោគអេដស៍នៅមន្ទីរពេទ្យខេត្ត និងធ្វើនៅមន្ទីរពិសោធន៍រាជធានីភ្នំពេញ គឺទទួលបានលទ្ធផលដូចគ្នា ។
សូមបញ្ជាក់ថា ជំងឺអេដស៍ដែលឆ្លងរាលដាលទៅលើប្រជាពលរដ្ឋនៅភូមិរកា ឃុំរកា ស្រុកសង្កែនេះ គឺបានផ្ទុះឡើងកាលពីថ្ងៃ៨ ធ្នូ បន្ទាប់ពីក្រុមគ្រូពេទ្យនៅមណ្ឌលសុខភាពឃុំនេះ បានចាប់ផ្ដើមធ្វើតេស្ដឈាមទៅតាមគម្រោងរបស់មន្ទីរសុខាភិបាលខេត្ត ដែលផ្តោតជាចម្បងទៅលើស្ត្រីមានផ្ទៃពោះ និងបន្ទាប់បន្សំទៅលើអតិថិជនទូទៅ ដើម្បីរកមេរោគអេដស៍និងរោគស្វាយ។ ក្រោយពីផ្ទុះនូវរោគសញ្ញាដ៏គ្រោះថ្នាក់នេះ ប្រជាពលរដ្ឋនៅក្នុងភូមិរកា ឃុំរកា ស្រុកសង្កែ បានភ្ញាក់ផ្អើលយ៉ាងខ្លាំង ហើយនាំគ្នាសម្រុកកាន់តែច្រើនឡើងៗរាល់ថ្ងៃ ទៅឲ្យគ្រូពេទ្យនៅមណ្ឌលសុខភាពឃុំពិនិត្យឈាមរកមេរោគអេដស៍ ។ ការធ្វើតេស្ដឈាមប្រជាពលរដ្ឋប៉ុន្មានថ្ងៃដំបូង លទ្ធផលបានបង្ហាញថា ប្រជាពលរដ្ឋក្មេងចាស់ប្រុសស្រីជិត២០% នៃអ្នកទៅធ្វើតេស្ដឈាមមានប្រតិកម្ម(ឆ្លងមេរោគអេដស៍) ដែលចំនួននេះ ធ្វើឲ្យក្រុមគ្រូពេទ្យមានការភ្ញាក់ផ្អើលយ៉ាងខ្លាំង ដោយសារមិនធ្លាប់មានពីមុនមក ។
តាមការសាកសួរអំពីហេតុផល ក្រុមអ្នកឆ្លងមេរោគអេដស៍ស្ទើរ១០០% សុទ្ធតែបានបង្ហាញពីប្រវត្តិស្អាតស្អំរបស់ពួកគេ ពោលគឺពួកគេហាក់ស្រឡាំងកាំងរកនឹកមិនឃើញអំពីហេតុផលនានា ដែលនាំឲ្យពួកគេឆ្លងមេរោគនេះ ។ ប៉ុន្តែពួកគេសុទ្ធតែបានអះអាងដូចៗគ្នាថា ពួកគេគ្រាន់តែធ្លាប់ឲ្យគ្រូពេទ្យឯកជនក្នុងភូមិម្នាក់ឈ្មោះ យ៉ែម ជ្រិន អាយុ៥៥ឆ្នាំ ចាក់ថ្នាំ ព្យូសេរ៉ូម និងព្យាបាលជំងឺផ្សេងៗ ច្រើនជាងចេញទៅឲ្យគ្រូពេទ្យនៅខាងក្រៅព្យាបាល ។ នេះមិនមានន័យថា ពួកគាត់បានចោទប្រកាន់គ្រូពេទ្យឯកជនឈ្មោះ យ៉ែម ជ្រិន នេះជាអ្នកចម្លងមេរោគអេដស៍ដល់ពួកគាត់នោះទេ គឺគ្រាន់តែចង់បង្ហាញអំពីប្រវត្តិខ្លះៗ ដែលពួកគាត់ធ្លាប់បានជួបប្រទះតែប៉ុណ្ណោះ ។
នៅក្នុងការធ្វើសន្និសីតកាសែតខាងលើនេះ លោក មាន ឈីវវុន ថ្លែងថា ពេលនេះក្រសួងនិងក្រុមគ្រួពេទ្យជំនាញកំពុងតាមដានយ៉ាងខ្លាំង ចំពោះការឆ្លងរាលដាលដ៏គួរឲ្យភ្ញាក់ផ្អើលនូវជំងឺអេដស៍ ដែលកើតឡើងលើប្រជាពលរដ្ឋក្នុងភូមិរកា ឃុំរកា ស្រុកសង្កែនេះ ។ ចំពោះវិធានការបន្ត លោក មាន ឈីវវុន បានបញ្ជាក់ថា តាមគោលការណ៍របស់ថ្នាក់ដឹកនាំ គឺ៖ទី១-ស្នើឱ្យអាជ្ញាធរត្រូវចាត់កម្លាំងជួយការពារក្រុមគ្រួសារគ្រូពេទ្យឈ្មោះ យ៉ែម ជ្រិន ដោយសារមានប្រតិកម្មពីអ្នកឆ្លងមេរោគអេដស៍នៅក្នុងភូមិ ចៀសវាងការយាយីណាមួយដោយហិង្សាពីអ្នកភូមិដែលឆ្លងមេរោគអេដស៍ ។
ទី២-បើកចំហក្នុងការទទួលធ្វើតេស្ដឈាមជូនប្រជាពលរដ្ឋថែមទៀត ។
ទី៣-ប្រឹងប្រែងធ្វើការតាមដានចំពោះអ្នកជំងឺដែលបានឆ្លងមេរោគនេះ ដើម្បីផ្ដល់ថ្នាំព្យាបាល ។
ទី៤-ស្នើដល់ប្រជាពលរដ្ឋគ្រប់មជ្ឍដ្ឋាននៅក្នុងមូលដ្ឋាន និងនៅក្រៅមូលដ្ឋាន មេត្តាសូមកុំរើសអើងចំពោះអ្នកដែលបានឆ្លងមេរោគនេះ ។
លោក មាន ឈីវវុន បានប្រកាសថា រូបលោកនិងអាជ្ញាធរស្រុក ខេត្ត នឹងជួបសំណេះសំណាលដោយផ្ទាល់ជាមួយប្រជាពលរដ្ឋ ដែលបានឆ្លងមេរោគអេដស៍នេះ នៅព្រឹកថ្ងៃទី១៨ ធ្នូ នៅឯមណ្ឌលសុខភាពឃុំរកា ស្រុកសង្កែ ដើម្បីសួរសុខទុក្ខពួកគាត់ ៕
ចែករំលែកព័តមាននេះ