រាជធានីភ្នំពេញ ៖ តារាចម្រៀងដែលធ្លាប់សាងស្នាដៃល្បីឈ្មោះតាំងពីឆ្នាំ១៩៩៥ អ្នកនាង សួន ចន្ថា នៅរង្វង់ពេល២ឆ្នាំចុងក្រោយនេះ ជីវិតជាតារាចម្រៀងក្នុងវ័យជ្រេបន្តិចរបស់អ្នកស្រីហាក់ដូចជាមានភាពកើនឡើងប្រជាប្រិយភាពប្លែកខុសពីប៉ុន្មានឆ្នាំមុន។ ក្នុងពេលដែលកំពុងឈរនៅលំដាប់មហាជនទទួលស្គាល់អ្នកស្រី សួន ចន្ថា ក៏ធ្លាប់ជួបឆាកជីវិតធ្លាក់កូដផ្ទួនៗគ្នាក្នុងរង្វង់គ្រួសារផង និងសិល្បៈផង រហូតត្រូវបានអ្នកស្រីពោលពាក្យថា «ផ្កាមួយទងដែលគេទាត់ចោល» បើរំលឹកទៅរកហេតុការណ៍ដែលធ្លាប់ឆ្លងកាត់។
តារាចម្រៀង សួន ចន្ថា និងជាគណៈមេប្រយោគដាក់ពិន្ទុជូនបេក្ខជនប្រឡងចម្រៀងនៅកម្មវិធី «ផ្កាយរះក្នុងសួន» បានរំលឹករឿងរ៉ាវលំបាកៗជាច្រើនក្នុងអាជីពចម្រៀងថា «កាលពីអំឡុងឆ្នាំ២០០៣ គឺជាឆ្នាំដែលអ្នកស្រីត្រូវដួលផ្កាប់ផ្ងារយ៉ាងផ្ទួនៗក្នុងឱកាសដែលខំរកប្រាក់ក្នុងគ្រួសារ។ ក្នុងឆ្នាំនោះមិនដឹងជាយីអ៊ុនដាក់អារក្សជាន់មិនដឹងទេ បានជាជីវិតតារាចម្រៀងដែលមហាជនយើងស្គាល់នាង បែរជាធ្លាក់ខ្លួនជួបរឿងផ្ទួនៗដូចជាពេលនោះម្តាយក្មេកធ្លាក់ខ្លួនឈឺ រួចម្តាយបង្កើតក៏ឈឺមិនបានប៉ុន្មានផង ស្វាមីក៏ឈឺព្រមៗគ្នា ពោលគឺអ្នកផ្ទះខ្ញុំចៃដន្យអ្វីបានជានាំគ្នាឈឺចំពេលតែមួយ។ អ្វីដែលខ្ញុំហួសចិត្តកំពុងតែច្រៀងក្នុងពេលរាត្រីរកលុយបាននៅរង្គសាលរ៉េនបូ និងរង្គសាលប៉ាស៊ីហ្វិកឃីស ស្រាប់តែគេបិទបាទាំងអស់នៅក្នុងក្រុងភ្នំពេញ និងនៅតាមខេត្តធ្វើឲ្យបាត់ចំណូល។ ពេលនោះហើយជាពេលដែលខ្ញុំស្ទើរតែដាច់បាយហើយកាន់តែធ្ងន់ធ្ងរជាងនេះ គឺខាងស្ថានីយទូរទស្សន៍មួយចំនួនដែលអ្នកស្រីធ្លាប់ឡើងសម្តែង គឺគេលែងហៅច្រៀងពីមួយប៉ុស្តិ៍ទៅមួយប៉ុស្តិ៍អត់ដឹងមូលហេតុអ្វីទេ ចេះតែឆ្ងល់។ អ៊ីចឹងហើយនៅពេលដែលអ្នកស្រីជួបហេតុការណ៍លំបាកទាំងក្នុងគ្រួសារ និងសិល្បៈ ពេលនោះអ្នកស្រីសម្រេចចិត្តលក់មាស លក់របស់របរ និងលក់ឡានស្ទើរតែលក់ផ្ទះដែលខំតស៊ូជាមួយស្វាមីយកលុយមកព្យាបាលម្តាយក្មេក ម្តាយបង្កើត និងប្តី ព្រោះអត់អាចទល់ភ្នែកមើលអ្នកផ្ទះឈឺ សុទ្ឋតែជាអ្នកមានគុណបានទេ»។
ម្ចាស់បទ «កាមទេពស្នេហ៍» រូបនេះបន្តថា «គ្រាដែលវាសនាធ្លាក់នោះ អ្នកណាក៏មិនជឿដែរ ដែលអ្នកស្រីធ្លាក់កូដម្លឹងៗនោះ ពេលនោះអ្នកស្រីមិនអាចលើកទូរស័ព្ទខ្ចីលុយគេ៤០០ទៅ៥០០ដុល្លារ គឺគ្មានអ្នកណាជឿឡើយ វិធីល្អ គឺមានតែការលក់របស់របរដែលមានក្នុងផ្ទះមិនអាចស្រែករកគេបានទេ។ ដោយសារតែជួបរឿងបែបនេះហើយរំលងបានរយៈពេលជិត២ឆ្នាំ ពេលនោះអ្នកស្រីត្រូវបានម្ចាស់ផលិតកម្មរៃមាស តោមាស គាត់ស្រឡាញ់រាប់អាន គឺអ្នកស្រី ខៀវ ចិន្តា ជាថៅកែគាត់ហៅឲ្យច្រៀងជូនគាត់ និងបានដាក់បទចម្រៀងច្រើនជាងគេ ដើម្បីបានប្រាក់ចិញ្ចឹមកូននិងក្រុមគ្រួសារ។ ពេលនោះអ្នកស្រីសប្បាយផង និងកើតទុក្ខផង ព្រោះអត់មានឡានជិះទៅច្រៀង ទៅសម្តែងឲ្យផលិតកម្ម ពេលនោះដោយសារតែមានការលំបាកអ្នកស្រីក៏ត្រូវបានថៅកែផលិតកម្មរៃមាសគាត់ទិញឡានជូន១គ្រឿង ដោយសន្យាថា បើមកច្រៀងត្រូវកាត់លុយតាមនោះអស់ពេលណា ក៏ពេលនោះទៅ ដោយមិនយកការប្រាក់អ្វីឡើយ។ ចាប់ពីពេលនោះមក អ្នកស្រីខំសម្តែង និងមានចម្រៀងថ្មីៗនៅរៃមាស ហើយក៏ត្រូវបានគេហៅសម្តែងនៅក្រៅប្រទេសបានប៉ុន្មានដងដែរ រហូតមានមុខច្រៀងនៅទូរទស្សន៍ឡើងវិញ។ ដោយសារតែមូលហេតុបែបនេះហើយ ទើបអ្នកស្រីមិនភ្លេចគុណថៅកែរៃមាស តោមាសនោះទេ ដែលបានប្រោសអ្នកស្រីឡើងវិញ ពោលគឺពេលនោះអ្នកស្រីដឹងស្រេចថា ខ្លួននឹងមានសង្ឃឹមឡើងវិញហើយសម្រាប់សិល្បៈ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ