ទំព័របាងកកប៉ុស្តិ៍ចេញផ្សាយកាលពីពេល ថ្មីៗនេះឱ្យដឹងថា និស្សិតផ្នែកទេសចរណ៍នៅសាកលវិទ្យាល័យ Rangsit University កម្ពស់១,៧៩សង្ទីម៉ែត្រ ជនជាតិថៃ វ័យ២០ឆ្នាំ នាងផាត់ត្រា ផនវ៉ាង គ្រងមកុដបវរកញ្ញាអន្តរទ្វីបឆ្នាំ២០១៤ បន្ទាប់ពីផ្តួលបេក្ខនារី៧២នាក់ មកពីបណ្តាប្រទេសជាច្រើនជុំវិញពិភពលោក កាលពីថ្ងៃទី៤ វិច្ឆិកា ២០១៤ ក្នុងទីក្រុង Magdegurg ប្រទេសអាល្លឺម៉ង់ ។
ចំណាត់ថ្នាក់លេខ២ គឺនាង Jeslie Mergal បវរកញ្ញាតំណាងប្រទេសគុយបា ។ ចំណាត់ថ្នាក់ទី៣ បានលើនាង Kris Tiffany Janson បវរកញ្ញាតំណាងប្រទេសហ្វ៊ីលីពីន ។
នាងផាត់ត្រា ផនវ៉ាង និយាយថា «នាងខ្ញុំមិននឹកស្មានថា អាចឆ្លងផុតវគ្គជម្រុះ ហើយឈានដល់ការគ្រងមកុដបវរកញ្ញាអន្តរទ្វីបឆ្នាំ២០១៤នេះទេ ។ នេះជាភាពត្រចះត្រចង់សម្រាប់នាងខ្ញុំ ហើយក៏ជាមហាកិត្តិយសឧត្តុង្គឧត្តមបំផុតរបស់ប្រទេសថៃទាំងមូលបន្ទាប់ពីខកខានអស់រយៈពេល៤៣ឆ្នាំមកហើយ ។ នាងខ្ញុំនឹងធ្វើការងារស្ម័គ្រចិត្តក្នុងប្រទេសនេប៉ាល់ និងបណ្តាប្រទេសមួយចំនួនទៀតនៅលើពិភពលោក» ។
ម្ចាស់ជ័យលាភីបវរកញ្ញាអន្តរទ្វីបទទួលបានប្រាក់រង្វាន់ ១៥.០០០ដុល្លារ និងអាចទៅរស់នៅក្នុងទឹកដីអាល្លឺម៉ង់ទៀតផង ។ ក្រៅពីនេះនាងនឹងទទួលបានសំបុត្រលំដាប់ថ្នាក់វី អាយ ភី ទៅចូលរួមទស្សនាក្នុងព្រឹត្តិការណ៍បង្ហាញម៉ូដពិភពលោក ធ្វើឡើងនៅឆ្នាំ២០១៥ ថែមទាំងអាចជ្រើសរើសឈុតសម្លៀកបំពាក់មានតម្លៃ៣.០០០ដុល្លារ ពីហាង Julio Cesar Battaglia ។ ចំណែកអ្នកជាប់ចំណាត់ថ្នាក់លេខ២ ទទួលបានប្រាក់រង្វាន់៣.០០០ដុល្លារ និងទឹកប្រាក់ចំនួន៥.០០០ដុល្លារពីក្រុមហ៊ុន Lacomed Berlin។ អ្នកជាប់ចំណាត់ថ្នាក់លេខ៣ទទួលបានប្រាក់រង្វាន់១.៥០០ដុល្លារ ។ នេះគឺជាព្រឹត្តិការណ៍បវរកញ្ញាអន្តរទ្វីបលើកទី៤៣ ៕
ចែករំលែកព័តមាននេះ