ខេត្តកំពង់ចាម ៖ ក្រុមចោរ២នាក់ បានធ្វើសកម្មភាពភ្ជង់ប្លន់អាជីវករលក់មាស និងដូរលុយម្នាក់បានសម្រេច យកគ្រឿងអលង្ការប្រមាណ២០តម្លឹង លុយ២ពាន់ដុល្លារ និងសម្ភារមួយចំនួនទៀត ។
ហេតុការណ៍នេះបានកើតឡើងនៅម៉ោង៤រសៀលថ្ងៃទី១៤ ធ្នូ ២០១៤ នៅចំណុចមុខសាលាបឋមសិក្សា ហ៊ុន សែន ថ្នល់បែក ស្ថិតនៅក្នុងភូមិថ្នល់បែកកើត ឃុំស្វាយទាប ស្រុកចំការលើ ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រងសម្តីប៉ូលិសមូលដ្ឋានឲ្យដឹងថា មុនពេលកើតហេតុ អាជីវកររងគ្រោះឈ្មោះ ឡាយ សុភាព ភេទស្រី អាយុ៤៣ឆ្នាំ បានជិះម៉ូតូចេញពីផ្សារក្នុងបំណងមកផ្ទះ លុះមកដល់ចំណុចកើតហេតុ ស្រាប់តែលេចមុខជនសង្ស័យ២នាក់ ជិះម៉ូតូ១គ្រឿង ម៉ាកC125 ព៌ណខ្មៅ ប្រដាប់ដោយអាវុធខ្លីកែច្នៃមួយដើម បានធ្វើសកម្មភាពបាញ់គំរាមរួចភ្ជង់ជនរងគ្រោះឆក់យកកាបូបគ្រឿងអលង្ការនិងលុយបានសម្រេចជិះគេចខ្លួនបាត់សម្រោល ។
មកដល់ព្រឹកថ្ងៃទី១៥ ធ្នូ ២០១៤ សមត្ថកិច្ចនៅមិនទាន់ឃាត់ខ្លួនជនសង្ស័យណាម្នាក់បាននៅឡើយទេ និងកំពុងស្រាវជ្រាវរកមុខសញ្ញា ៕
ចែករំលែកព័តមាននេះ