ខេត្តកោះកុង ៖ ស្របពេលដែលរាជរដ្ឋាភិបាលក៏ដូចជាក្រសួងទេសចរណ៍ និងអាជ្ញាធរខេត្តរៀបចំកម្មវិធីបុណ្យសមុទ្ររយៈពេល៣ថ្ងៃ ចាប់ពីថ្ងៃទី១២ដល់១៤ ធ្នូ ២០១៤ នៅខេត្តកោះកុង ក្រោមប្រធានបទអេកូទេសចរណ៍តំបន់ឆ្នេររួចមក កម្លាំងសមត្ថកិច្ច ប៉ូលិសព្រហ្មទណ្ឌក្រសួងមហាផ្ទៃ ដឹកនំាដោយលោកវរសេនីយ៍ឯក នឹម ច័ន្ទតាណា សហការជាមួយកម្លាំងប៉ូលិសនៃស្នងការដ្ឋាននគរបាលខេត្តក៏ដូចជាកម្លាំងកងរាជអាវុធហត្ថខេត្ត និងកម្លាំងកងរាជអាវុធហត្ថលើផ្ទៃប្រទេសបានច្បាមយ៉ាងណែននូវរាល់សកម្មភាពបង្កអសន្តិសុខ សណ្តាប់ធ្នាប់ ជាពិសេសក្តាប់មុខសញ្ញាចោរកម្ម ដូចជាក្រុមឆក់ លូកហោប៉ៅ និងកាត់ខ្សែ.ក ដោយគិតមកត្រឹមរសៀលថ្ងៃទី១៤ ធ្នូ នេះ សមត្ថកិច្ចបង្ក្រាបបានក្រុមចោរទាំង៣ប្រភេទខាងលើនេះបាន២៣នាក់ហើយ ក្នុងនោះមានស្រី៩នាក់។
មន្ត្រីសមត្ថកិច្ចប៉ូលិសព្រហ្មទណ្ឌនៃស្នងការដ្ឋាននគរបាលខេត្តបញ្ជាក់ថា នៅពេលនេះក្រុមចោរទាំង២៣នាក់ត្រូវបានឃុំខ្លួននៅស្នងការដ្ឋាននគរបាលខេត្តកោះកុងដើម្បីធ្វើការស្រាវជ្រាវរកមេខ្លោង ព្រោះពេលនេះសមត្ថកិច្ចកំពុងតាមប្រមាញ់យ៉ាងប្រកៀកប្រកិតហើយ ប៉ុន្តែសមត្ថកិច្ចនៅមិនទាន់ហ៊ានបង្ហាញអំពីសាវតារបស់ក្រុមចោរដល់ប្រព័ន្ធផ្សព្វផ្សាយនៅឡើយទេ រង់ចាំឱ្យពលរដ្ឋដែលទទួលរងគ្រោះដោយអំពើចោរកម្មរបស់ក្រុមចោរខាងលើចូលមកដាក់ពាក្យបណ្តឹង និងផ្ទៀងផ្ទាត់វត្ថុតាងដែលសមត្ថកិច្ចបានដកហូតជាមួយម្ចាស់របស់ដែលបានបាត់បង់ដោយអំពើចោរកម្មខាងលើនេះ ៕
ចែករំលែកព័តមាននេះ