ខេត្តបន្ទាយមានជ័យ ៖ គោលនយោបាយភូមិឃុំមានសុវត្ថិភាពដែលបានដាក់ចេញដោយរាជរដ្ឋាភិបាលសម្រាប់ក្រុងប៉ោយប៉ែត ហាក់ពុំទទួលបានជោគជ័យទេ ដោយសារតែខណៈក្រុមនគរបាលចុះអប់រំដល់ប្រជាជន បែរជាអ្នកលេងក្នុងនោះក៏មានសមត្ថកិច្ច និងមន្ត្រី ដែរ និងចេះតែជក់ខ្យល់ទៅ ដូចចាស់ពោលថា គីង្គក់លក់ថ្នាំស្រែង ។
ជាក់ស្តែងទីតាំងល្បែងបញ្ជល់មាន់នៅក្នុងបរិវេណកាស៊ីណូហ្គោលដិនក្រោនក្បែរព្រំដែនកម្ពុជា-ថៃ នៅភូមិក្បាលស្ពាន១ សង្កាត់ប៉ោយប៉ែត គេឃើញមានមនុស្សម្នាជាច្រើននាក់ បាននាំគ្នាពពាក់ពពូនទៅមើល និងចាក់ភ្នាល់ល្បែងបញ្ជល់មាន់យ៉ាងគគ្រឹកគគ្រេងមិនខ្លាចញញើតច្បាប់ទ្បើយ ដោយក្នុងនោះគេឃើញមានសមត្ថកិច្ចនិងមន្ត្រីរាជការខ្លះក៏នៅទីនោះដែរ ។ រីឯយានយន្តក៏មានច្រើនត្រៀបត្រា ដោយម្ចាស់រវល់លេងល្បែងភ្នាល់ រថយន្តខ្លះពាក់ស្លាកលេខរាជការ ចំណែករថយន្តខ្លះគ្មានស្លាកលេខ ប៉ុន្តែមានស្លាកទ្បូហ្គោជាសមត្ថកិច្ច ។
សំទ្បេងហ៊ោកញ្ជ្រៀវបានបន្លើទ្បើងជាមួយនឹងសំទ្បេងមេក្រូប្រកាសការចាក់ភ្នាល់យ៉ាងខ្ទរខ្ទារ ។ សំបុត្រទស្សនាមិនថ្លៃទេ ប្រភពប្រាប់ថា ម្នាក់៥.០០០រៀលប៉ុណ្ណោះ តែបើផ្ញើម៉ូតូថែមមួយទៀតស្មើនឹង៦.០០០រៀល ព្រោះតម្លៃផ្ញើម៉ូតូ១.០០០រៀល ។ ឮថាទីតាំងល្បែងភ្នាល់បញ្ជល់មាន់ក្នុងបរិវេណកាស៊ីណូមួយនេះ មានបង្កប់ដោយអាចោរជើងមួយ(អាប៉ោង) បៀ និងយូគីស្ទូចចាក់ដាក់ប្រាក់ធំៗ ហើយអ្នកលេងខ្លះស្កាត់មកតាំងពីខេត្តឆ្ងាយៗដូចជា ខេត្តកំពង់ចាម ព្រៃវែង តាកែវ ស្វាយរៀង បាត់ដំបង និងខេត្តបន្ទាយមានជ័យជាដើម មកលេងផ្សងសំណាងដូចយកលុយមកបំផ្លាញមិនដឹងខ្លួន ។
ពាក្យចាស់លោកថា កោកៗសឹកតែមាត់ត្រដោកឆ្អែតពោះក្របី ដែលពាក្យចាស់នេះគ្មានអ្វីខុសទេ គឺការពិតអ្នកអាងស្បែកអាងខ្នងនៅតែបន្តបើកលេង ដើម្បីយកចំណេញញាត់ហោប៉ៅនិងចែកគ្នាដូចទន្សោងគោព្រៃ ។ សុំបញ្ជាក់ថា នៅក្រុងប៉ោយប៉ែតបច្ចុប្បន្នទីតាំងល្បែងស៊ីសងខាងលើ អ្នកលេងសុទ្ធតែជាខ្មែរមិនទាន់បានបង្ក្រាបផង ស្រាប់តែមានគេបើកទីតាំងមួយថែមទៀត សង្ស័យជាសង្វៀនបញ្ជល់មាន់កំពុងមមាញឹកសាងសង់ជិតរួចទៀតផង ក្នុងភូមិប៉ោយប៉ែត មុខទីតាំងទទួលពលករខុសច្បាប់បញ្ជូនពីប្រទេសថៃ ។
អ្នកស្រុកលើកទ្បើងថា បញ្ហាល្បែងស៊ីសងនេះ បើអាជ្ញាធរនិងសមត្ថកិច្ចពុំមានវិធានការទប់ស្កាត់ទេ អំពើចោរកម្ម ការលួច ឆក់ គាស់ផ្ទះ និងកាច់សោលួចម៉ូតូ នឹងកើតមានមិនអាចលុបបំបាត់បានទ្បើយ ។ កន្លងមក អាជ្ញាធរក៏ដូចជាសមត្ថកិច្ចនៅពេលដែលអ្នកយកព័ត៌មានសាកសួរ តែងតែលើកហេតុផលពីនេះពីនោះមិនបង្ក្រាបទ្បើយ ព្រោះខ្លាចលូកទៅរលាកដៃ ឬវ៉ៃឆ្កែមិនមើលម្ចាស់។
តាមការកត់សម្គាល់ ខ្មែរអ្នកមានធំៗគេចូលលេងក្នុងអគារដែលមានម៉ាស៊ីនត្រជាក់ ។ ឯខ្មែរមានល្មមៗ ឬមានតិចតួច គេចូលលេងនៅតាមអគារនៅអែបរបង ។ តាមការសន្និដ្ឋាន គឺគេចាប់ប្រមូលមិនឱ្យសល់ទេ ពីអាតូចៗដល់អាធំៗ ៕
ចែករំលែកព័តមាននេះ