បន្ទាយមានជ័យ ៖ គោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល នៅក្រុងប៉ោយប៉ែត ហាក់ពុំទទួលបានជោគជ័យទេ ដោយសារតែនគរបាលចេះតែចុះអប់រំប្រជាជន រឺឯអ្នកលេងមានសមត្ថកិច្ច និងមន្ត្រី
បន្ទាយមានជ័យ ៖ គោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល នៅក្រុងប៉ោយប៉ែត ហាក់ពុំទទួលបានជោគជ័យទេ ដោយសារតែនគរបាលចេះតែចុះអប់រំប្រជាជន រឺឯអ្នកលេងមានសមត្ថកិច្ច និងមន្ត្រី ។ ជាក់ស្ដែងទីតាំងល្បែងភ្នាល់ជល់មាន់ នៅក្នុងបរិវេណកាស៊ីណូ ហ្គោលដឹនគ្រោន ក្បែរបន្ទាត់ព្រំដែនកម្ពុជា-ថៃ នៅភូមិក្បាលស្ពាន១ សង្កាត់ប៉ោយប៉ែត ទីនោះគេឃើញមនុស្សម្នាជាច្រើន បាននាំគ្នាទៅទស្សនា និងចាក់ភ្នាល់ល្បែងជល់មាន់ យ៉ាងគគ្រឹកគគ្រេង មិនខ្លាចញញើត និងច្បាប់ឡើយ ដោយក្នុងនោះគេឃើញមានសមត្ថកិច្ច និងមន្ត្រីខ្លះ ក៍នៅទីនោះដែរ ។
មិនតែប៉ុណ្ណោះសូម្បីតែយានយន្តក៍មានច្រើនត្រៀបត្រា ដោយម្ចាស់រវល់លេងល្បែងភ្នាល់នេះ ។ រថយន្តខ្លះពាក់ស្លាករាជការ ឯរថយន្តខ្លះ គ្មានស្លាកលេខ ប៉ុន្តែមានឡូហ្គោជាសមត្ថកិច្ច ។ សំលេងហូរកញ្ជ្រៀវបានបន្លើឡើងជាមួយ និងសំលេងមេក្រូ ប្រកាស់ការចាក់ភ្នាល់យ៉ាងហូរកញ្ច្រៀវ ។ សំបុត្រទស្សនាមិនថ្លៃទេ ប្រភពប្រាប់ថា ម្នាក់៥០០០រៀលតែប៉ុណ្ណោះ តែបើផ្ញើរម៉ូតូថែមមួយទៀតស្មើនឹង៦០០០រៀល ព្រោះតម្លៃផ្ញើរម៉ូតូ១០០០រៀល ។ ឮថាទីតាំងល្បែងភ្នាល់ជល់មាន់ក្នុងបរិវេណកាស៊ីណូមួយនេះមានបង្កប់ទៅដោយអាចោរជើងមួយ(អាប៉ោង)បៀ និងយូគី ស្ទូច ចាក់ដាក់ប្រាក់ធំៗ ហើយអ្នកលេងខ្លះស្កាត់តាំងពីខេត្តឆ្ងាយៗ ដូចជាកំពង់ចាម ព្រៃវែង តាកែវ ស្វាយរៀង បាត់ដំបង និងបន្ទាយមានជ័យជាដើម ។
ពាក្យចាស់លោកថា «កោកៗសឹកតែមាត់ត្រដោក ឆ្អែតពោះក្របី» ដែលពាក្យចាស់នេះគ្មានអ្វីខុសទេ គឺការពិត អ្នកអាងស្បែកអាងខ្នង នៅតែបន្តបើកលេង ដើម្បីយកចំណូលញាត់ហោប៉ៅ និងចែកគ្នាតាមឋានៈ ។
គួរបញ្ជាក់ថា នៅក្រុងប៉ោយប៉ែតបច្ចុប្បន្ន ទីតាំងល្បែងស៊ីសង ខាងលើ ដែលអ្នកលេងសុទ្ធតែជាខ្មែរមិនទាន់បង្ក្រាបផង ស្រាប់តែមានគេបើកទីតាំងមួយទៀត សង្ស័យជាសង្វៀនបញ្ជល់មាន់ កំពុងសាងសង់ជិតរួចទៀតផង ក្នុងភូមិប៉ោយប៉ែត មុខទីតាំងទទួលពលករខុសច្បាប់បញ្ជូនពីប្រទេសថៃ ។
អ្នកស្រុកលើកឡើងថា បញ្ហាល្បែងស៊ីសងនេះបើអាជ្ញាធរ និងសមត្ថកិច្ចពុំមានការទប់ស្កាត់ទេ អំពើរចោរកម្មការលួចឆក់គាស់ផ្ទះ និងកាច់សោរលួចម៉ូតូ នឹងកើតមានមិនអាចលុបបំបាត់បានឡើយ ។ ហើយកន្លងមកអាជ្ញាធរក៍ដូចជាសមត្ថកិច្ច នៅពេលដែលអ្នកយកព័ត៏មានសាកសួរតែងតែលើកហេតុផលពីនេះពីនោះ ដោយមិនធ្វើការបង្ក្រាបឡើយ ។ ឯណាទៅភូមិ-ឃុំមានសុវត្ថិភាពនៅក្រុងប៉ោយប៉ែត?
ចែករំលែកព័តមាននេះ