រាជធានីភ្នំពេញ ៖ ក្រុមចោរប្រដាប់អាវុធមួយក្រុមមានគ្នា៤នាក់ ជិះម៉ូតូពីរគ្រឿង បានធ្វើសកម្មភាពយកស្នាប់កាំភ្លើងវាយទៅលើបុរសរងគ្រោះពីរនាក់ ក្នុងបំណងប្លន់យកម៉ូតូហុងដាឌ្រីម សេ១២៥ ស៊េរីឆ្នាំ២០១៥ មួយគ្រឿង ខណៈបុរសរងគ្រោះទាំងពីរនាក់ឈប់ម៉ូតូបម្រុងចុះបត់ជើងតូច តែយកម៉ូតូមិនបានសម្រេចទេដោយ
រាជធានីភ្នំពេញ ៖ ក្រុមចោរប្រដាប់អាវុធមួយក្រុមមានគ្នា៤នាក់ ជិះម៉ូតូពីរគ្រឿង បានធ្វើសកម្មភាពយកស្នាប់កាំភ្លើងវាយទៅលើបុរសរងគ្រោះពីរនាក់ ក្នុងបំណងប្លន់យកម៉ូតូហុងដាឌ្រីម សេ១២៥ ស៊េរីឆ្នាំ២០១៥ មួយគ្រឿង ខណៈបុរសរងគ្រោះទាំងពីរនាក់ឈប់ម៉ូតូបម្រុងចុះបត់ជើងតូច តែយកម៉ូតូមិនបានសម្រេចទេដោយសារម្ចាស់ម៉ូតូដកកូនសោ រត់គេចខ្លួនទាន់ពេល នៅសល់តែមិត្តភក្តិម្ចាស់ម៉ូតូត្រូវចោរព្រួតគ្នាវាយរងរបួសស្ទើរសុុះសាច់ក្បាល រួចប្លន់យកទូរស័ព្ទទំនើបមួយគ្រឿងរួមនិងកាបូបលុយ បានសម្រេចជិះគេចខ្លួនដោយសុវត្ថិភាព។
ហេតុការណ៍នេះកើតឡើងកាលពីវេលាម៉ោង២ និង៣០នាទីរំលងអាធ្រាត្រ ឈានចូលថ្ងៃទី ១២ ធ្នូ២០១៤ នៅចំណុចមុខវត្តនាគវ័ន្ត ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក។ យុវជនរងគ្រោះទី១.ឈ្មោះពេជ្រ ភេទប្រុស អាយុ២៥ឆ្នាំ ជាម្ចាស់ម៉ូតូ និង ទី២.ឈ្មើ សួន ចាន់រ៉ា អាយុ២៨ឆ្នាំ ជាមិត្តភក្តិម្ចាស់ម៉ូតូ ។
ប្រភពព័ត៌មានពីយុវជនរងគ្រោះឈ្មោះ សួន ចាន់រ៉ា ដែលក្រុមចោរវាយឱ្យរងរបួសស្ទើរសុះសាច់ក្បាលបានឱ្យអ្នកយកព័ត៌មានដឹងថា រូបគេនិងបុរសឈ្មោះពេជ្រ ដែលជាម្ចាស់ម៉ូតូបាននាំគ្នាចេញពីរាំរែកនៅថោន ក្លិប ដើម្បីត្រឡប់ទៅផ្ទះគេង ។ ដោយឈ្មោះ ពេជ្រ ជិះម៉ូតូហុងដាឌ្រីម សេ១២៥ ស៊េរីឆ្នាំ ២០១៥ មួយគ្រឿងយកមកឌុបរូបគេត្រឡប់ទៅផ្ទះវិញ ខណៈបើកឌុបគ្នាមកដល់ចំណុចកើតហេតុមិត្តភក្តិរបស់គេបានបង្អង់ម៉ូតូអែបខាងផ្លូវដើម្បីឈប់បត់ជើងតូច គ្រាន់តែពន្លត់ម៉ូតូមិនទាន់ទាំងចុះស្រួលបួលផង ស្រាប់តែមានក្រុមចោរ៤នាក់ ជិះម៉ូតូ២គ្រឿងមិនស្គាល់អត្តសញ្ញាណ បានជិះមកឈប់ក្បែររូបគេ និង មិត្តភក្តិឈ្មោះ ពេជ្រ ហើយក៏បានដកកាំភ្លើងវាយទៅរូបគេទាំងពីរនាក់ក្នុងគោលបំណងប្លន់យកម៉ូតូហុងដាឌ្រីម ស៊េរីឆ្នាំ២០១៥ តែត្រូវបានម្ចាស់ម៉ូតូដកសោរត់គេចខ្លួនចោលម៉ូតូធ្វើឱ្យក្រុមចោរមិនអាចយកម៉ូតូបាន ហើយនៅសល់តែរូបខ្លួន ក៏ត្រូវក្រុមចោរព្រួតគ្នាវាយឱ្យរងរបួសស្ទើរសុុះសាច់ក្បាល រួចប្លន់យកទូរស័ព្ទទំនើបមួយគ្រឿងរួមនិងកាបូបលុយ បានសម្រេចជិះគេចខ្លួនដោយសុវត្ថិភាព។ បន្ទាប់ពីក្រុមចោរទៅអស់ឈ្មោះ ពេជ្រ ដែលជាម្ចាស់ម៉ូតូបានត្រឡប់មកយកម៉ូតូវិញ ជិះចេញទៅទាំងអារម្មណ៍ភ័យខ្លាចសូម្បីរូបគេដែលជាមិត្តភក្តិកំពុងរងរបួសក៏ឈ្មោះ ពេជ្រ មិនបានដឹកទៅព្យាបាលរបួសឡើយ។
ក្រោយពលកើតហេតុសមត្ថកិច្ចមូលដ្ឋានបានចុះមកពិនិត្យកន្លែងកើតហេតុ និងបានដេញជនរងគ្រោះឱ្យប្រញាប់ទៅពេទ្យទៅ ខណៈអ្នកយកព័ត៌មានទៅដល់ប៉ូលិសប្រាប់ថាមិនមែនជាករណីប្លន់ទេ ជាករណីឈ្លោះគ្នា បើទោះបីជាជនរងគ្រោះប្រាប់អ្នកព័ត៌មានថា ចោរប្លន់រូបគេក៏ដោយ។ ជនរងគ្រោះមិនបានដាក់ពាក្យបណ្តឹងទេគឺគ្រាន់តែហៅមិត្តភក្តិឱ្យមកទទួលយកទៅកាន់មន្ទីរពេទ្យដើម្បីព្យាបាលរបួស ។
ចែករំលែកព័តមាននេះ