រាជធានីភ្នំពេញ ៖ សក្តានុពលវិនិយោគលើវិស័យដីធ្លីតាមបណ្ដោយមហាវិថីសហព័ន្ធរុស្ស៊ីបានងើបឡើងយ៉ាងខ្លាំង ដោយមានគម្រោងជាច្រើនបាននិងកំពុងស្ថាបនាជាបន្តបន្ទាប់ និងមានគម្រោងផ្សេងៗទៀតនឹងលេចរូបរាងឡើង។ អ្នកជំនាញខាងវិស័យអចលនទ្រព្យបាននិយាយថា តំបន់នៅតាមបណ្តោយមហាវិថីនេះពេលបច្ចុប្បន្ន បើទោះជាអ្នកមានលុយ ក៏ពិបាករកទិញបន្តិចដែរ។
លោក គីម ហ៊ាង ប្រធានក្រុមហ៊ុនអចលនទ្រព្យខ្មែរ រៀល អីុស្ទេត បានមានប្រសាសន៍ថា ដីធ្លីនៅតំបន់មហាវិថីមួយនេះឥឡូវឈានដល់ដំណាក់កាលមួយគឺ«មានលុយ ពិបាករកទិញ» ដោយសារតែពេលនេះ មានគម្រោងសាងសង់ច្រើន ហើយបើយើងវិលត្រឡប់ទៅរកកាលពីពេល៥-៦ខែមុន យើងនៅអាចរកទិញបាន ព្រោះពេលនោះយើងអត់ទាន់ឃើញមានសំណង់ ឬគម្រោងចាប់ផ្ដើមសាងសង់ទេ តែពេលនេះមានគម្រោងច្រើនណាស់ដែលកំពុងសាងសង់តាមបណ្ដោយផ្លូវមួយនេះ ។ យ៉ាងណាមិញម្ចាស់ដីម្នាក់ៗតែងតែរំពឹងខ្ពស់ពេក ដោយគាត់ប្រកាសលក់ដីមែន តែតម្លៃដែលគាត់ដាក់ឱ្យអ្នកទិញនោះ ហួសពីតម្លៃដែលគេរកទិញនៅពេលបច្ចុប្បន្ន មានន័យថា ម្ចាស់ដីប្រកាសលក់នៅពេលនេះ តែគាត់ទាតម្លៃនៅ៤-៥ឆ្នាំខាងមុខទៅវិញ ដូច្នេះហើយ ធ្វើឱ្យអ្នកដែលចង់ទិញ ក៏ពិបាកពិភាក្សាគ្នាដែរ ។
លោកបន្តថា សព្វថ្ងៃនេះមួយចំនួនធំនៃអ្នកមានដីធ្លីតាមបណ្ដោយមហាវិថីនេះនៅរង់ចាំមើល៣-៤ឆ្នាំទៀត ទើបពួកគាត់លក់ក្រែងបានឡើងថ្លៃខ្ពស់ជាងនេះ តែអ្វីដែលល្អ បើមានអ្នកចង់ទិញ ម្ចាស់ដីគួរតែលក់ទៅ ហើយទៅទិញកន្លែងផ្សេងក្នុងតម្លៃមួយដែលមិនខ្ពស់ដូចគ្នា។ យើងត្រូវចាំថា បើយើងលក់បានថ្លៃ ពេលយើងទិញវិញក៏ថ្លៃដូចគ្នា តែបើយើងលក់ថោក ពេលទិញវិញដ៏មិនថ្លៃប៉ុន្មានដែរ ។ លោកបន្តថា នៅពេលមានគម្រោងដូចជា ស្ពានអាកាស អគារធំៗ ផ្សារទំនើបជាច្រើនបែបនេះ អ្នកវិនិយោគប្រាកដជាចង់បានដីតំបន់នេះសម្រាប់ការវិនិយោគផ្សេងៗដែរ ដូច្នេះហើយម្ចាស់ដីគួរតែលក់ទាន់ពេលកំពុងឡើងថ្លៃ ព្រោះគម្រោងមិនទាន់បញ្ចប់ តែបើរង់ចាំដល់គម្រោងចប់ហើយរំពឹងថានឹងឡើងថ្លៃទៀតនោះ វាក៏មិនប្រាកដដែរ។ លោកបញ្ជាក់ថា ដីធ្លីវាឡើងមែន តែមិនមែនឡើងអត់ចំណុចកំពូលរបស់វាទេ ពេលដែលវាឡើងដល់កំពូលហើយ វានឹងនៅទ្រឹងឬអាចនឹងធ្លាក់ចុះមកវិញក៏ថាបាន ។
លោកបញ្ជាក់ថា ដីដែលពិបាករកទិញបំផុតក្នុងចំណោមតំបន់នានានៅតាមបណ្តោយមហាវិថីសហព័ន្ធរុស្ស៊ីនេះគឺតំបន់នៅជិតសាកលវិទ្យាល័យភូមិន្ទភ្នំពេញ ក្រសួងការងារ មុខមន្ទីរពេទ្យកុមារជាតិ និងវិទ្យាស្ថានបច្ចេកវិទ្យាកម្ពុជា(តិចណូ) ជាដើម ដោយ សារតែតំបន់ទាំងនេះវាមានផ្សារហើយស្រាប់ និងមានអគារជាច្រើនដែលកំពុងសាសងសង់បន្ត ។
ដូចគ្នានេះដែរ លោក អិុន ស៊ីថា អគ្គនាយករងក្រុមហ៊ុនវ៉ើលត្រាស់អុីស្ទេត ក៏បានលើកឡើងថា ទីផ្សារអចលនទ្រព្យនៅតាមមហាវិថីសហព័ន្ធរុស្ស៊ីនាពេលបច្ចុប្បន្ន មានការចាប់អារម្មណ៍ច្រើនពីសំណាក់អ្នកវិនិយោគទាំងក្នុងនិងក្រៅប្រទេស ។ នៅតាមមហាវិថីនេះមានគម្រោងធំៗមួយចំនួនជាការវិនិយោគរបស់វិនិយោគិនបរទេស ហើយក៏មានមួយចំនួនទៀតជាការវិនិយោគរបស់វិនិយោគិនកម្ពុជា និងជាការចូលទុនគ្នារវាងអ្នកវិនិយោគិនខ្មែរ និងបរទេស ។
លោកបន្តថា នៅថ្ងៃអនាគតផ្លូវនេះនឹងមានផ្សារទំនើបធំៗ ជាក់ស្ដែងនាពេលនេះគម្រោងផ្សារទំនើបផាកសិន ដែលការវិនិយោគចូលគ្នារវាងអ្នកវិនិយោគកម្ពុជា និងបរទេស នឹងត្រូវចាប់ផ្ដើមសាងសង់ ហើយអគារប៊ូយ៉ុង ក៏អាចនឹងលេចរូបរាងនៅពេលក្រោយជាបន្តបន្ទាប់ដែរ ។
បើតាមប្រសាសន៍លោកគីម ហ៊ាង តម្លៃដីធ្លីនៅតាមបណ្តោយមហាវិថីមួយនេះ តំបន់ដែលខ្ពស់ជាងគេគឺចាប់ពីស្ពានអាកាស៧មករា មុខសាកលវិទ្យាល័យភូមិន្ទភ្នំពេញ មកដល់ម្ដុំមុខមន្ទីរពេទ្យកុមារជាតិ ដែលមានតម្លៃចាប់ពី២.០០០ដុល្លារអាមេរិក ដល់២.៥០០ដុល្លារអាមេរិក ក្នុង១ម៉ែត្រការ៉េ និងអាចមានតម្លៃរហូតដល់៣.០០០ដុល្លារអាមេរិកចំពោះដីជាប់ផ្លូវកែង ៕
ចែករំលែកព័តមាននេះ