រាជធានីភ្នំពេញ ៖ ប្រជាពលរដ្ឋប្រមាណជិត៥០០គ្រួសារ ដែលរស់នៅក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ បានសម្ដែងការប្រតិកម្ម និងលើកគ្នាទៅធ្វើការរារាំងមិនឲ្យលោកព្រះរាជអាជ្ញា គង់ សេដ្ឋ ធ្វើរបងព័ទ្ធដីរបស់លោក ដោយប្រជាពលរដ្ឋបានចោទប្រកាន់ថា លោកព្រះរាជអាជ្ញារូបនោះ បុកគ្រឹះរំលោភយកផ្លូវសាធារណៈមួយចំហៀង និងប្រើកម្លាំងប៉េអឹមទៅកាងថែមទៀត។
ហេតុការណ៍នោះបានកើតឡើងកាលពីវេលាព្រឹក ថ្ងៃទី២៨ វិច្ឆិកា ២០១៤ នៅតាមផ្លូវលំ ស្ថិតនៅក្នុងភូមិខាងលើ ហើយបន្ទាប់ពីមានរឿងបែបនេះកើតឡើង លោកហែម ដារិទ្ធិ អភិបាលនៃគណៈអភិបាលខណ្ឌ ពោធិ៍សែនជ័យបានដឹកនាកម្លាំង មន្ត្រីក្រោមឱវាទ ចុះទៅផ្អាកសកម្មភាពនោះភ្លាមៗដែរ ចំណែកលោកព្រះរាជអាជ្ញាគង់ សេដ្ឋ បានឡើងជិះរថយន្តស៊េរីទំនើបចាកចេញពីទីនោះបាត់ស្រមោល បន្ទាប់ពីបានតតាំងសម្ដីគ្នាជាមួយលោកអភិបាលខណ្ឌមួយប្រាវរួចមក។
ប្រជាពលរដ្ឋបានឲ្យដឹងថា លោក គង់ សេដ្ឋ ដែលជាព្រះរាជអាជ្ញាជាអ្នកកាន់ច្បាប់ និងអនុវត្តន៍ច្បាប់នៅក្នុងដៃនោះបានបុកគ្រឹះធ្វើរបងរំលោភយកដីផ្លូវសាធារណៈមួយចំហៀងតែម្ដង ដែលធ្វើឲ្យផ្លូវនោះតូចចង្អៀត ហើយនៅពេលដែលពួកគាត់ទៅហាមឃាត់មិនត្រឹមតែមិនស្ដាប់ទេ ថែមទាំងបានយកកម្លាំងប៉េអឹម៤នាក់ទៅកាងគំរាមកំហែងដល់ប្រជាពលរដ្ឋទាំងអស់ថែមទៀត។
ប្រជាពលរដ្ឋបានបន្តថា ផ្លូវនោះ គឺជាផ្លូវចាស់តាំងពីបុរមបុរាណតរៀងមកមិនដែលមានបុគ្គលណាម្នាក់ថ្លើមធំពាសមេឃហ៊ានទៅបោះបង្គោលយកស្រស់ៗបែបនេះឡើយ ផ្ទុយទៅវិញម្នាក់ៗមានតែថែរក្សាដើម្បីបានធ្វើដំណើរស្រួល។ ម្យ៉ាងមិនមែនមានតែប្រជាពលរដ្ឋនៅក្នុងភូមិព្រៃល្វាជិត៥០០គ្រួសារនេះប៉ុណ្ណោះទេដែលត្រូវការផ្លូវនោះ គឺនៅមានរាប់ពាន់គ្រួសារទៀតដែលរស់នៅតាមភូមិជុំវិញនោះក៏ត្រូវការផ្លូវនេះ ជាចាំបាច់ផងដែរ។
អ្វីដែលបង្កឲ្យមានការភ្ញាក់ផ្អើល និងហួសចិត្តនោះ គឺពេលនេះលោកគង់ សេដ្ឋ បានយកថ្នាំក្រហមបាញ់នៅចំពាក់កណ្ដាលផ្លូវដែលជាតម្រុយសម្រាប់បុកសសរគ្រឹះធ្វើរបងជាការរំលោភបំពានយកផ្លូវមួយចំហៀងដោយឥតអៀនខ្មាស់តែម្ដង ដោយសំអាងថា ជាដីរបស់គាត់ដែលអ្នកធ្វើផ្លូវចាក់រំលោភយកទៅវិញ ។ ទោះបីប្រជាពលរដ្ឋរាប់រយនាក់នាំគ្នាទៅឃាត់ក៏លោកព្រះរាជអាជ្ញារូបនោះមិនព្រមស្ដាប់ដែរ និងគំរាមរកប្ដឹងអ្នកដែលចាក់ដីធ្វើផ្លូវលើដីគាត់ ប៉ុន្តែទោះបីជាគាត់ចង់រកយ៉ាងណា ក៏រកមិនឃើញដែរ ព្រោះផ្លូវនោះជាផ្លូវចាស់ ទំហំពីមុនប៉ុន្មានគឺនៅដដែល មិនទាន់មានការពង្រីកនៅឡើយទេ បើមានគឺការចាក់ដីថែមពីលើកុំឲ្យលិចទឹកប៉ុណ្ណោះ។ ម្យ៉ាងទៀតប្រជាពលរដ្ឋមានការកក់ក្ដៅណាស់បានអ្នកច្បាប់ទៅទិញដីនៅជិត ផ្ទុយទៅវិញពេលនេះបែរជាធ្វើឲ្យពួកគាត់ខកចិត្តយ៉ាងខ្លាំងបែបនេះទៅវិញ។
ទាក់ទិនៅនឹងហេតុករណ៍នោះ កម្លាំងគណៈបញ្ជាការឯកភាពខណ្ឌពោធិ៍សែនសែនជ័យដឹកនាំដោយលោកអភិបាលខណ្ឌហែម ដារិទ្ធិ បានចុះទៅអន្តរាគមន៍ឲ្យលោកព្រះរជអាជ្ញាគង់ សេដ្ឋ បញ្ឈប់សកម្មភាពបុកគ្រឹះនោះជាបន្ទាន់ រង់ចាំការដោះស្រាយ ។ ដោយឡែកព្រះរាជអាជ្ញារូបនោះក៏បានសួររកមុខអ្នកដែលចាក់ដីធ្វើផ្លូវប៉ះពាល់ដល់ដីរបស់គាត់ និងបានគំរាមប្ដឹងទៅជននោះ ប្រសិនបើដឹងមុខ និងបានអះអាងថា ផ្លូវនោះធ្វើលើដីគាត់ ទើបពេលនេះគាត់ធ្វើរបង តែនៅក្នុងដីផ្ទាល់ខ្លួនប៉ុណ្ណោះ ។ ក្រោយពេលជជែកវែកញែកគ្នាមួយសន្ទុះ លោក ហែម ដារិទ្ធិ អភិបាលខណ្ឌពោធិ៍សែនជ័យបានបញ្ជាទៅអ្នកម៉ៅការបុកគ្រឹះដកបង្គោលដែលបានបុកគ្រឹះរួចនៅចំកណ្ដាលផ្លូវចំនួន៣ដើមនោះចេញវិញ ព្រោះខ្លាចប្រជាពលរដ្ឋធ្វើដំណើរមានគ្រោះថ្នាក់ ចំណែកលោកព្រះរាជអាជ្ញាគង់ សេដ្ឋ បានឡើងជិះរថយន្តចេញទៅបាត់ស្រមោលដែរ៕
ចែករំលែកព័តមាននេះ