អនុរដ្ឋមន្ត្រីការបរទេសរុស្ស៊ី លោកអាឡិចសី មេស្កូវ អះអាងកាលពីថ្ងៃទី២៧ វិច្ឆិកាថា ប្រទេសរុស្ស៊ីចាត់ទុកលទ្ធភាពនៃការចូលអូតង់របស់អ៊ុយក្រែនថា ជាការគំរាមកំហែងមួយដល់ស្ថេរភាពជាសាកល ។
លោកមេស្កូវ គូសបញ្ជាក់ថា បណ្តាដៃគូរបស់យើងស្គាល់ពីជំហរសំខាន់របស់រុស្ស៊ី ដែលចាត់ទុកការចូលរបស់អ៊ុយក្រែនក្នុងអង្គការអូតង់ថា ជាការបំផ្លាញសន្តិសុខនៅអឺរ៉ុប ។
ប្រធានាធិបតីអ៊ុយក្រែន លោកប៉េត្រូ ប៉ូរ៉ូឆេនកូ ថ្លែងនាពេលមុននេះថា ក្រុងគៀវត្រូវបោះបង់ចោលលក្ខន្តិកៈមិនចូលបក្សសម្ព័ន្ធរបស់ប្រទេស ដើម្បីអាចឱ្យអ៊ុយក្រែនចូលក្នុងសម្ព័ន្ធភាពយោធាណាមួយ ។
ដោយចង់សំដៅលើសេចក្តីថ្លែងការណ៍នេះរបស់លោកប៉ូរ៉ូឆេនកូ លោកមេស្កូវ និយាយថា វិធានការបែបនេះនឹងបង្កឱ្យមានផលវិបាកនយោបាយដ៏ធំធេងនានា ។ បណ្តាអ្នកដែលពេលនេះប៉ុនប៉ងរុញច្រានអ៊ុយក្រែនចូលអូតង់ជាអ្នកទទួលខុសត្រូវចំពោះផលវិបាកដ៏ធំធេងទាំងឡាយខាងភូមិសាស្ត្រនយោបាយ ។ ទោះបីគ្រប់ប្រទេសមានសិទ្ធិក្នុងការជ្រើសរើស តែវាសំខាន់ណាស់ដែលប្រទេសមួយដូចជារុស្ស៊ី ត្រូវគិតដល់ផលប្រយោជន៍សន្តិសុខរបស់ពិភពលោក និងអឺរ៉ុប ។
លោកប៉ូរ៉ូ ឆេនកូ ថ្លែងកាលពីថ្ងៃទី២៤ វិច្ឆិកាថា ការបោះប្រជាមតិមួយនឹងរៀបចំធ្វើដើម្បីសម្រេចថា តើអ៊ុយក្រែនត្រូវចូលអូតង់ឬអត់ ។
ប្រធានាធិបតីអ៊ុយក្រែន កាលពីថ្ងៃទី២៧ វិច្ឆិកា ក៏ថ្លែងប្រឆាំងការប្រើប្រព័ន្ធសហព័ន្ធក្នុងប្រទេសរបស់លោក ហើយអំពាវនាវជាថ្មីឱ្យលុបចោលលក្ខន្តិកៈរដ្ឋមិនចូលបក្សសម្ព័ន្ធរបស់អ៊ុយក្រែន ។
ក្នុងសុន្ទរកថាមួយឯសភាអ៊ុយក្រែនផ្សាយតាមទូរទស្សន៍លោកប៉ូរ៉ូ ឆេនកូ ថ្លែងថា ពលរដ្ឋអ៊ុយក្រែន១០០% គាំទ្រអ៊ុយក្រែនរួបរួមមួយ។ ពលរដ្ឋអ៊ុយក្រែនភាគច្រើនចង់បានរដ្ឋតែមួយ និងពុំមែនរដ្ឋសហព័ន្ធនោះទេ ។ លោកអំពាវនាវដល់បណ្តាសមាជិកសភាដែលទើបជាប់ឆ្នោតឱ្យបោះបង់ចោលលក្ខន្តិកៈមិនចូលបក្សសម្ព័ន្ធដើម្បីផ្តល់លទ្ធភាពឱ្យអ៊ុយក្រែនចូលក្នុងសម្ព័ន្ធភាពយោធាដែលចង់សំដៅចូលក្នុងអូតង់ ៕
ចែករំលែកព័តមាននេះ