សេដ្ឋកិច្ចតំបន់អាស៊ី
បាងកក ៖ សភាពាណិជ្ជកម្មថៃបានព្រមានថា ការនាំចេញទំនិញរបស់ខ្លួនទៅកាន់ទីផ្សារចិនអាចនឹងរងផលប៉ះពាល់ពីបណ្ដាប្រទេសជិតខាងក្នុងតំបន់អាស៊ាន បន្ទាប់សមាគមសេដ្ឋកិច្ចអាស៊ានចូលជាធរមាន ។ ក្នុងនោះផលិតផលអង្ករគ្រឿងអគ្គិសនី និងវាយនភ័ណ្ឌត្រូវបានគេរំពឹងថានឹងប៉ះពាល់ច្រើន
សេដ្ឋកិច្ចតំបន់អាស៊ី
បាងកក ៖ សភាពាណិជ្ជកម្មថៃបានព្រមានថា ការនាំចេញទំនិញរបស់ខ្លួនទៅកាន់ទីផ្សារចិនអាចនឹងរងផលប៉ះពាល់ពីបណ្ដាប្រទេសជិតខាងក្នុងតំបន់អាស៊ាន បន្ទាប់សមាគមសេដ្ឋកិច្ចអាស៊ានចូលជាធរមាន ។ ក្នុងនោះផលិតផលអង្ករគ្រឿងអគ្គិសនី និងវាយនភ័ណ្ឌត្រូវបានគេរំពឹងថានឹងប៉ះពាល់ច្រើនជាងគេបំផុត ។
ណៃពិដោ ៖ សារព័ត៌មានក្នុងស្រុកកោះតៃវ៉ាន់បានឱ្យដឹងថា សមាគមផលិតករគ្រឿងអេឡិចត្រូនិក និងអគ្គិសនីតៃវ៉ាន់នឹងបោះទុនវិនិយោគចំនួន៤៥២,៦៤លានដុល្លារ ដើម្បីអភិវឌ្ឍន៍ឧស្សាហកម្មមួយនៅតំបន់ភាគខាងត្បូងប្រទេសមីយ៉ាន់ម៉ាដែលគ្រប់ដណ្ដប់លើផ្ទៃដី១.៤០០ហិកតា ។
សេអ៊ូល ៖ ការិយាល័យពន្ធដារជាតិបានថ្លែងកាលពីថ្ងៃព្រហស្បតិ៍នេះថា អតីតសភាពាណិជ្ជកម្មសមាគមអឺរ៉ុបក្នុងប្រទេសកូរ៉េខាងត្បូងដែលបានបង្កើតឡើងសាជាថ្មីក្រោមឈ្មោះថ្មី បន្ទាប់ពីបែកខ្ញែកក្នុងអំឡុងពេល២ឆ្នាំមកនេះពុំបានបង់ពន្ធចូលរដ្ឋចំនួន៣,២៤លានដុល្លារ ។
សេដ្ឋកិច្ចតំបន់អឺរ៉ុប
មូស្គូ ៖ ក្រុមហ៊ុនApple របស់សហរដ្ឋអាមេរិកបានដំឡើងថ្លៃទូរស័ព្ទស្មាតហ្វូនiPhone6 របស់ខ្លួនទៅលើហាងលក់តាមអីុនធើរណេតរបស់រុស្សុីដែលទើបតែលក់ថ្មីៗនេះដើម្បីឆ្លើយតបទៅនឹងការធ្លាក់ថ្លៃនៃប្រាក់រូបិ៍្លសកាលពីថ្ងៃពុធ ។ ក្នុងនោះiPhone6 ទំហំ16 ជីហ្គាបៃឡើងពី៦៩៣ ដុល្លារមក ៨៦៤ដុល្លារ និងPhone6 Plus 16 ជីហ្គាបៃពី៩០៧ ទៅ១១៤៩ ដុល្លារ ។
ប៊ែកឡាំង ៖ លោកស្រីអធិការបតីអាល្លឺម៉ង់Angela Merkel បានថ្លែងកាលពីថ្ងៃពុធថា លោកស្រីបានងាកមកផ្ដោតលើគម្រោងថ្មីរបស់គណៈកម្មការអឺរ៉ុបដែលមានទំហំទឹកប្រាក់ជាច្រើនពាន់លានអឺរ៉ូដើម្បីធ្វើឱ្យប្រសើរឡើងនូវភាពអន់ថយនៃសេដ្ឋកិច្ចរបស់អឺរ៉ុប ប្រសិនបើមូលនិធិទាំងនោះត្រូវបានយកមកវិនិយោគជាដើមទុកដ៏សមគួរ ។
ក្រុងឡុង ៖ ប្រធានអ្នកសេដ្ឋកិច្ចរបស់ធនាគារអង់គ្លេសបានបញ្ជាក់ថា អត្រាការប្រាក់ផ្លូវការនៅចក្រភពអង់គ្លេសអាចនឹងបិទបញ្ចប់ក្នុងអត្រា៣% បន្ទាប់ពីធនាគារចាប់ផ្ដើមដំឡើងការប្រាក់ដែលស្ថិតក្រោមកម្រិតរបស់ពួកគេ មុននឹងកើតមានវិបត្តិហិរញ្ញវត្ថុសកល ។
សេដ្ឋកិច្ចមជ្ឈិមបូព៌ា
តេហេរ៉ង់ ៖ លោកMonhammad Reza Rhoshnevisan អនុប្រធានផ្នែកពាណិជ្ជកម្មរបស់ក្រុមហ៊ុនអាកាសចរណ៍រដ្ឋអ៊ិស្លាមអីុរ៉ង់(Iran Air )បានបង្ហើបឱ្យដឹងថា បណ្ដាប្រទេសសហគមន៍អឺរ៉ុបបាននិងកំពុងបដិសេធក្នុងការផ្គត់ផ្គង់ប្រេងឥន្ធនៈឱ្យយន្តហោះអីុរ៉ង់បីឆ្នាំមកហើយ។ ផ្ទុយទៅវិញបណ្ដាយន្តហោះដឹកអ្នកដំណើររបស់បណ្ដាប្រទេសទាំងនោះដូចជា Lufthansa និងAlitalia អាចទទួលបានប្រេងឥន្ធនៈយ៉ាងងាយក្នុងប្រទេសអីុរ៉ង់ ។
ដូហា ៖ តាមការវាស់ស្ទង់របស់បណ្ដាប្រទេសដែលមានសក្ដានុពលចំនួន៤០លើសកលលោក ប្រទេសកាតាគឺជាទីផ្សារទាក់ទាញជាងគេបំផុតទី២លើពិភពលោកចំពោះការបណ្ដាក់ទុនរកស៊ីក្នុងផ្នែកហេដ្ឋារចនាសម្ព័ន្ធ ។
ឌូបៃ ៖ ក្រុមហ៊ុនAL Futtaim Group ដែលមានមូលដ្ឋានក្នុងទីក្រុងឌូបៃ បានថ្លែងកាលពីថ្ងៃអង្គារថា ខ្លួននឹងវិនិយោគ៧០០លានដុល្លារនៅប្រទេសអេហ្ស៊ីប ក្នុងរយៈពេល៣ឆ្នាំ ហើយនឹងបង់ឱ្យរដ្ឋាភិបាលចំនួន៣០,៥លានដុល្លារដែលជាផ្នែកមួយនៃប្រាក់សងជំងឺចិត្តលើជម្លោះនៃការលក់ដីដែលអូសបន្លាយយូរអង្វែងកាលពីសប្ដាហ៍មុន ។
សេដ្ឋកិច្ចតំបន់អាហ្វ្រិក
ប្រេតូរីយ៉ា ៖ ទិន្នន័យពីការិយាល័យស្ថិតិជាតិបង្ហាញថា ប្រាក់ចំណូលសរុបដែលទទួលបានពីឧស្សាហកម្មអាហារនិងភេសជ្ជៈក្នុងប្រទេសអាហ្វ្រិកខាងត្បូងបានកើនឡើង៥,៤%ពីមួយឆ្នាំទៅមួយឆ្នាំក្នុងខែកញ្ញា ។
អាក្រា ៖ អង្គការមូលនិធិរូបិយវត្ថុអន្តរជាតិ(IMF) បានអះអាងថា ខ្លួននឹងគាំទ្រកម្មវិធីសេដ្ឋកិច្ចរបស់ប្រទេសហ្គាណាជាមួយនឹងវិធានការនៃការចាត់ចែងហិរញ្ញវត្ថុដែលកំពុងអនុវត្តដោយរដ្ឋាភិបាល ។
លូសាកា ៖ ក្រុមហ៊ុនផ្ដល់សេវាកម្មទូរស័ព្ទចល័ត MTN បាននិយាយថា ខ្លួនប្ដេជ្ញាថានឹងបង្កើនក៏ដូចជាពង្រីកបណ្ដាញអីុនធើរណេតឱ្យកាន់តែប្រសើរឡើងនៅក្នុងប្រទេសសំប៊ី ។
កំប៉ាឡា ៖ អាជ្ញាធរអភិវឌ្ឍន៍ផលិតកាហ្វេរបស់អ៊ូហ្គង់ដា បានលើកឡើងថា បច្ចុប្បន្នកាហ្វេដែលល្អជាងគេបំផុតគឺមកពីស្រុក Lira ដែលជាតំបន់ទើបនឹងប្រែក្លាយជាទីតាំងផលិត ក៏ដូចជាបង្កបង្កើនផលឈានមុខគេនៅទូទាំងប្រទេស ។
សេដ្ឋកិច្ចបច្ចេកវិទ្យា
Wi-Fi ៖ យោងតាមក្រុមហ៊ុនស្រាវជ្រាវ Infoneties Research បានឱ្យដឹងថា ទីផ្សារផ្គត់ផ្គង់បរិក្ខារដែលប្រើ Wi-Fi របស់ក្រុមហ៊ុនទូរគមនាគមន៍សកលលោក សរុបមានចំនួនទឹកប្រាក់៥២៧លានដុល្លារក្នុងឆ្នាំ២០១៣ ។ ក្នុងឆមាសទី១នៃឆ្នាំ២០១៤ ប្រព័ន្ធ Wireless របស់ Cisco, Huawei និងRuckus គឺជាអ្នកនាំមុខផ្សារហ៊ុនWi-Fi របស់ក្រុមហ៊ុនទូរគមនាគមន៍ ។ ដោយឡែកនៅឆ្នាំ២០១៨ទីផ្សារWi-Fi នឹងវាយលុកបាន៣ពាន់លានដុល្លារ។
5G ៖ ក្រុមហ៊ុន Huawei និងMega Fon នឹងធ្វើកិច្ចសហប្រតិបត្តិការផលិតសាកល្បងនូវបណ្ដាញ 5G ដើម្បីដាក់ឱ្យដំណើរក្នុងប្រតិបត្តិការFIFA WorldCup ឆ្នាំ២០១៨ ដែលនឹងប្រព្រឹត្តទៅក្នុងបណ្ដាទីក្រុងចំនួន១១របស់រុស្សុី។
Nokia ៖ ក្រុមហ៊ុន Nokia Networks និយាយថា ខ្លួនទទួលបានជោគជ័យលើការស្នើសុំកិច្ចសន្យាផ្គត់ផ្គង់បណ្ដាញ3Gពីក្រុមហ៊ុនទូរគមនាគមន៍ឈានមុខលើពិភពលោកBharti Airtel របស់ឥណ្ឌាដើម្បីជួយពង្រីកបណ្ដាញ3G ក្នុងទីក្រុងមុមបៃ ។
SingTel ៖ ទីភ្នាក់ងារFitch Ratings បានថ្លែងថា អត្រាបំណុលរបស់ក្រុមហ៊ុនSingTel ស្ថិតនៅក្រោមសម្ពាធស្របពេលដែលកម្លាំងអានុភាពទំនងជាកាន់តែយ៉ាប់យ៉ឺន ៕
ចែករំលែកព័តមាននេះ