យោងតាមរបាយការណ៍ចេញផ្សាយដោយក្រុមហ៊ុនស្រាវជ្រាវ Canalys ឱ្យដឹងថា ស្មាតហ្វូនទំហំអេក្រង់៥អុីងនៅតែគ្រប់ដណ្តប់ទីផ្សារទូរស័ព្ទលើពិភពលោក ពោលគឺមានចំនួន៦៦ ភាគរយ, ទំហំអេក្រង់៥ ដល់៥.៤អីុងមានចំនួន ២២ភាគរយ, ទំហំ៥.៥ ដល់៥.៩ មានចំនួន ១០ភាគរយ និងទំហំអេក្រង់៦អីុងមានចំនួនមានត្រឹមតែ២ភាគរយប៉ុណ្ណោះ ។
យោងតាមការស្ទង់មតិរបស់អ្នកជំនាញជុំវិញការប្រើប្រាស់ស្មាតហ្វូនទំហំអេក្រង់៥អីុង របស់អតិថិជនឱ្យដឹងថា ទំហំអេក្រង់៥អីុងងាយស្រួលយកតាមខ្លួន ពោលគឺសក្តិសមទៅនឹងដៃមិនតូចមិនធំ ។ ការនាំចេញស្មាតហ្វូនទៅកាន់ពិភពលោកក្នុងត្រីមាសទី១ ឆ្នាំ២០១៤ មានចំនួន១៧៩,៤លាន ដែលតួលេខនេះបង្ហាញពីការកើនឡើងប្រមាណជា២៩ភាគរយបើប្រៀបធៀបទៅត្រីមាសទី១ ឆ្នាំ២០១៣។ ទន្ទឹមគ្នានេះដែរ Android នៅតែពេញនិយមពីអ្នកប្រើប្រាស់ ពោលគឺមានចំនួន៨១ភាគរយក្នុងចំណោមប្រព័ន្ធប្រតិបត្តិការដទៃផ្សេងទៀតរួមមានប្រព័ន្ធ iOS មានចំនួន១៦ភាគរយ និងប្រព័ន្ធ Window Phones មានត្រឹមតែ៣ ភាគរយប៉ុណ្ណោះ ។
ក្រុមហ៊ុន Samsung នៅតែឈានមុខគេក្នុងការចែកចាយស្មាតហ្វូនទៅកាន់ទីផ្សារពិភពលោកដែលមានភាគហ៊ុនសរុប៣១ភាគរយ ផ្តួលដៃគូប្រជែងក្រុមហ៊ុនអាមេរិក Apple មានត្រឹមតែ ១៦ភាគរយ ។ ប្រទេសចិននៅតែជាទីផ្សារប្រកួតប្រជែងស្មាតហ្វូនដ៏ធំរបស់ពិភពលោកក្នុងចំណោមប្រទេសដទៃទៀត ពោលគឺមានចំនួន៣៥ភាគរយនៃបរិមាណសរុបចំពោះការនាំចេញស្មាតហ្វូន ខណៈពេលដែលអាមេរិកមាន១២ភាគរយ ។ ក្រុមហ៊ុនស្មាតហ្វូនចិនមានដូចជាក្រុមហ៊ុន Huawei, Lenovo, Xiaomi, Yulong, និងក្រុមហ៊ុន ZTE ៕
ចែករំលែកព័តមាននេះ