រាជធានីភ្នំពេញ ៖ គណៈបញ្ជាការឯកភាពខណ្ឌមានជ័យ នៅព្រឹកថ្ងៃទី២៨ វិច្ឆិកា ២០១៤នេះ បានចុះធ្វើរដ្ឋបាល និងរៀបចំសណ្តាប់ធ្នាប់របៀបររយតាមដងផ្លូវលេខ២១៧ ( ផ្លូវព្រះមុន្នីរ៉េត ) ក្នុងភូមិសាស្ត្រ សង្កាត់ស្ទឹងមានជ័យ ខណ្ឌមានជ័យ ក្រោមការដឹកនាំបញ្ជាផ្ទាល់ពីសំណាក់លោកឌី រ័ត្នខេមរុណ អភិបាលរងខណ្ឌមានជ័យ និងមានការចូលរួមពីសំណាក់អាជ្ញាធរមូលដ្ឋានក៏ដូចជាកម្លាំងកងរាជអាវុធហត្ថជាច្រើនរូបទៀត។
ការចុះធ្វើរដ្ឋបាល និងរៀបចំសណ្តាប់ធ្នាប់តាមដងផ្លូវខាងលើនេះធ្វើឡើងក្នុងគោលបំណងរៀបចំសណ្តាប់ផ្លូវសាធារណៈឱ្យមានរបៀបរៀបរយល្អ បញ្ចៀសនូវការកកស្ទះចរាចរណ៍ផ្សេងលើដងផ្លូវ និងក្នុងគោលបំណងថែរក្សាសន្តិសុខ សុវត្ថិភាពជូនដល់បងប្អូនប្រជាពលរដ្ឋទាំងក្នុងការរស់នៅ និងការធ្វើដំណើរ។
គួររំលឹកផងដែរថា បន្ទាប់ពីមួយរយៈពេលកន្លងមកនេះ យើងសង្គេតឃើញថា តាមដងផ្លូវព្រះមុន្នីរ៉េតខាងលើ ប្រជាពលរដ្ឋក៏ដូចជាអ្នករស់នៅតាមបណ្តោយផ្លូវមុន្នីរ៉េត ដែលប្រកបរបរអាជីវកម្មផ្សេងៗនោះ តែងតែយកចំណីផ្លូវធ្វើជាកន្លែងដាក់លក់អ៊ីវ៉ាន់របស់ខ្លួន និងចតរថយន្ត ឬក៏យានជំនិះលើដងផ្លូវយ៉ាងអណាធិបតេយ្យបំផុត ធ្វើឱ្យចរាចរណ៍លើដងផ្លូវត្រូវកកស្ទះជារៀងរាល់ថ្ងៃបាត់បង់សណ្តាប់ធ្នាប់ និងរបៀបរៀបរយផ្លូវសាធារណៈ ស្របពេលដែលផ្លូវមួយខ្សែខាងលើនេះកំពុងស្ថិតក្នុងការស្ថាបនា។
សូមបញ្ជាក់ផងដែរថា ការចុះរៀបចំសណ្តាប់ធ្នាប់ខាងលើនេះដែរ អាជ្ញាធរមិនរុះរើ ឬប្រមូលយកឥវ៉ាន់របស់អាជីវករដែលដាក់លក់លើដងផ្លូវនោះទេ គឺគ្រាន់តែចុះអប់រំ និងប្រាប់ជាដំណឹងដល់ពួកគេឱ្យបញ្ឈប់សកម្មភាពបែបនេះទៀត បន្ទាប់ពីកន្លងមកអាជ្ញារធរធ្លាប់បានចុះធ្វើការណែនាំជារឿយៗ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ