រាជធានីភ្នំពេញ ៖ ថ្លែងនៅក្នុងជំនួបពិភាក្សាជាមួយលោក Cheng Yi តំណាងក្រុមហ៊ុនចិន Guangxi កាលពីថ្ងៃទី២៧ វិច្ឆិកា ២០១៤ នៅទីស្តីការក្រសួងលោកថោង ខុន រដ្ឋមន្ត្រីក្រសួងទេសចរណ៍អះអាងថា កម្ពុជានឹងខិតខំគ្រប់បែបយ៉ាង ដើម្បីជម្រុញ និងលើកទឹកចិត្តដល់អ្នកទេសចរចិនឲ្យមកទស្សនាប្រទេសកម្ពុជា ឲ្យបានជាង២លាននាក់នៅឆ្នាំ២០២០ ខាងមុខ ខណៈដែលអ្នកទេសចរប្រមាណ១៣០លាននាក់ បាននិងកំពុងចេញទេសចរណ៍នៅតាមបណ្តាប្រទេសលើពិភពលោក ។
លោកថោង ខុន បានលើកឡើងថា ទេសចរចិនកំពុងក្លាយជាចំណាប់អារម្មណ៍គ្រប់បណ្តាប្រទេសលើពិភពលោក ដែលបានរិះរកគ្រប់មធ្យោបាយ ដើម្បីទាក់ទាញភ្ញៀវទេសចរចិនឲ្យចូលទស្សនាប្រទេសរបស់គេ គ្រាដែលចំនួនទេសចរចិនទៅក្រៅប្រទេសកាន់តែមានចំនួនច្រើនឡើងពីមួយឆ្នាំទៅមួយឆ្នាំ ហើយលុយដែលទេសចរចិនបានចំណាយទៅក្រៅប្រទេសត្រូវបានគេគិតថា មានចំនួនប្រមាណ១៤០ពាន់លានដុល្លារក្នុងមួយឆ្នាំៗ ។
លោករដ្ឋមន្ត្រីបានបញ្ជាក់ថា គ្រាន់តែភ្ញៀវទេសចរចិនមកកាន់បណ្តាប្រទេសអាស៊ាន មានចំនួនជាង៩លាននាក់ ក្នុងនោះប្រទេសថៃ បានស្រូបយកភ្ញៀវទេសចរចិនច្រើនជាងគេ រហូតដល់ជាង៤លាននាក់ ។ ចំណែកកម្ពុជាយើងទើបតែទទួលបានភ្ញៀវទេសចរចិនប្រមាណ៤៦ម៉ឺននាក់ប៉ុណ្ណោះ ។
យ៉ាងណាក៏ដោយលោកថោង ខុន បានអះអាងថា ដោយសារតែទំនាក់ទំនង និងកិច្ចសហប្រតិបត្តិការល្អលើគ្រប់វិស័យសំខាន់វិស័យទេសចរណ៍លោករំពឹងថា កម្ពុជានឹងទទួលបានភ្ញៀវទេសចរចិនជាង២លាននាក់នៅឆ្នាំ២០២០ ខាងមុខនេះ ។ ប៉ុន្តែដើម្បីស្រូបយកភ្ញៀវទេសចរចិននោះ យើងចាំបាច់ត្រូវស្វែងរកគន្លឹះសំខាន់ៗ រួមទាំងបន្តកិច្ចសហប្រតិបត្តិការល្អជាមួយប្រទេសចិន នោះគឺការផ្សព្វផ្សាយនូវវប្បធម៌ ប្រពៃណី រួមទាំងរមណីយដ្ឋានសំខាន់ៗដល់ប្រជាពលរដ្ឋចិន និងការលុបទិដ្ឋាការដល់ភ្ញៀវទេសចរចិនផងដែរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ