បណ្តាប្រទេសជាសមាជិកអង្គការនាំប្រេងចេញ ហៅកាត់ថា OPEC បានសម្រេចកាលពីថ្ងៃទី២៧ វិច្ឆិកា នៅទីក្រុងវីយែន រក្សាកម្រិតផលិតកម្មប្រេងនៅដដែល ទោះបីការផ្គត់ផ្គង់ប្រេងមានច្រើនដែលនាំឱ្យតម្លៃប្រេងឆៅធ្លាក់ចុះភ្លាមៗក្នុងកម្រិតយ៉ាងទាបពុំធ្លាប់មានចាប់តាំងពីឆ្នាំ២០១០ មកក្តី ។
លោកអាប់ឌុលឡាហ៍ អែលប្រាឌី អគ្គលេខាធិការ OPEC ថ្លែងក្នុងសន្និសីទសារព័ត៌មានមួយថា យើងបានជជែកពិភាក្សាគ្នាហើយ ទីបំផុតយើងសម្រេចរក្សាទុកកម្រិតផលិតកម្មប្រេង៣០លានធុងក្នុងមួយថ្ងៃឱ្យនៅដដែលសម្រាប់រយៈពេល៦ខែខាងមុខនេះ ។
ព័ត៌មាននេះញ៉ាំងឱ្យតម្លៃប្រេងកាតធ្លាក់ភ្លាមៗដល់កម្រិតទាបបំផុតពុំធ្លាប់មានចាប់តាំងពីជាង៤ឆ្នាំមកហើយ ។ តម្លៃប្រេងឆៅនៅទីផ្សារក្រុងឡុងដ៍ បានធ្លាក់រហូតដល់៧៣,៨០ដុល្លារក្នុងមួយធុង ជាតម្លៃទាបបំផុតពុំធ្លាប់មានចាប់តាំងពីថ្ងៃ២៦ សីហា ឆ្នាំ២០១០ មក។ ចំណែកតម្លៃប្រេងឆៅនៅទីផ្សារអាមេរិកធ្លាក់មកនៅត្រឹម៧០,១៤ដុល្លារក្នុងមួយធុងជាកម្រិតទាបខ្លាំងបំផុតចាប់តាំងពីថ្ងៃទី៧ មិថុនា ឆ្នាំ២០១០ មក ។
តម្លៃប្រេងដាំក្បាលចុះខ្លាំងភ្លាមៗបែបនេះញ៉ាំងឱ្យតម្លៃប្រាក់រូប្លីធ្លាក់ចុះខ្លាំង ព្រោះប្រាក់រុស្ស៊ីនេះពឹងផ្អែកខ្លាំងលើតម្លៃប្រេងកាត ដោយរុស្ស៊ីជាប្រទេសផលិតប្រេងកាតធំទី២ លើពិភពលោកបន្ទាប់ពីអារ៉ាប៊ី សាអ៊ូឌីត ហើយពុំស្ថិតក្នុង OPEC ។ ចំណែកឯភាគហ៊ុនរបស់បណ្តាក្រុមហ៊ុនប្រេងអឺរុ៉បធ្លាក់ថ្លៃពី២ ទៅ៤% ។
ពេលចេញពីប្រជុំនៅទីក្រុងវីយែន រដ្ឋមន្ត្រីក្រសួងប្រេងកាតអារ៉ាប៊ី សាអ៊ូឌីត លោកអាលីអាល់ នូអៃអុីមី ដែលប្រទេសរបស់លោកប្រឆាំងជំទាស់ចំពោះការកាត់បន្ថយផលិតកម្មប្រេងរបស់ OPEC គូសបញ្ជាក់ថា OPEC បានធ្វើការសម្រេចចិត្តដ៏ល្អមួយ ។
ផ្ទុយទៅវិញ រដ្ឋមន្ត្រីការបរទេសវេណេស៊ុយអេឡា លោករ៉ាហ្វាអែល រ៉ាមីរេស ដែលស្នើឱ្យកាត់បន្ថយផលិតកម្មប្រេងដ៏ច្រើននោះបានចាកចេញពីកិច្ចប្រជុំក្នុងទឹកមុខមាំ ហើយបដិសេធមិនឆ្លើយសំណួររបស់បណ្តាអ្នកសារព័ត៌មាន ។
ខណៈដែលតម្លៃប្រេងឆៅធ្លាក់ចុះដល់ជាង៣០% ចាប់តាំងពីខែមិថុនាមក ដោយការផ្គត់ផ្គង់ប្រេងមានច្រើនលើសលុប ហើយសេចក្តីត្រូវការប្រេងចុះខ្សោយ បណ្តាប្រទេសជាសមាជិក OPEC ត្រូវពិចារណារវាងការកាត់បន្ថយកម្រិតផលិតកម្មដែលតំណាងឱ្យជិត១ភាគ៣ នៃការផ្គត់ផ្គង់ប្រេងលើពិភពលោក ដែលកម្រិតនេះពុំមានការផ្លាស់ប្តូរចាប់តាំងពី៣ឆ្នាំមកហើយ ឬក៏រក្សាទុកកម្រិតផលិតកម្មដដែល ។ ក៏បុ៉ន្តែបណ្តាប្រទេសជាសមាជិក OPEC ពុំសម្រេចបានកុងសង់ស៊ុលណាមួយលើការកាត់បន្ថយកម្រិតផលិតកម្មនេះឡើយ ។
រដ្ឋមន្ត្រីក្រសួងប្រេងកាត អេមីរ៉ាត អារ៉ាប់រួម លោក SUHAIL AL-MAZROUEI និយាយថា ខ្ញុំគិតថា ទីផ្សារប្រេងនឹងមានស្ថេរភាពវិញ ហើយយើងស្វែងរកស្ថេរភាពទីផ្សាររយៈពេលយូរមួយ ពុំមែនវិធានការសម្រាប់រយៈពេលខ្លីនោះទេ ។
ចំណែករដ្ឋមន្ត្រីប្រេងកាតគុយវ៉ែត លោកអាលីអាល់អូម៉ាអៀ និយាយថា ការផ្គត់ផ្គង់ប្រេងមានច្រើននៅលើទីផ្សារ ពុំមែនមកពី OPEC តែម្នាក់ឯងទេ ហើយទោះបីជា OPEC កាត់បន្ថយផលិតកម្មប្រេងរបស់ខ្លួនបន្តិច ក៏វាពុំអាចលុបបំបាត់ចំនួនប្រេងដែលលើសនៅទីផ្សារបានដែរ ។
ពិតមែនហើយ ការកាត់បន្ថយកម្រិតផលិតកម្មប្រេងរបស់ OPEC អាចដោះស្រាយការផ្គត់ផ្គង់ប្រេងលើសនៅលើទីផ្សារ តែបច្ចុប្បន្នសហរដ្ឋអាមេរិកដែលជាប្រទេសប្រេើប្រេងកាតធំជាងគេលើពិភពលោកនោះមានសមត្ថភាពផលិតប្រេងកាត់បានកាន់តែច្រើន លែងសូវពឹងផ្អែកតែលើការនាំចូលជាមួយការបូមយកប្រេង ជាពិសេសពីអណ្តូងប្រេងទឹកជ្រៅរបស់ខ្លួនហើយតម្លៃប្រេងចុះថោក ក៏មកពីការយឺតយ៉ាវខាងសេដ្ឋកិច្ចនៅអឺរុ៉ប និងនៅប្រទេសចិនជាអ្នកប្រើប្រេងកាតធំទី២ ដែរ ។
ការកាត់បន្ថយផលិតកម្មប្រេងរបស់ OPEC អាចផ្តល់គុណវិបត្តិសម្រាប់អង្គការនេះ ព្រោះនាំឱ្យបាត់បង់ ចំណែកទីផ្សារប្រេងរបស់បណ្តាប្រទេសជាសមាជិកធ្លាក់ក្នុងដៃ ប្រទេសជាអ្នកផលិតប្រេងឯទៀតៗ ខណៈប្រទេសទាំងនេះពុំធ្វើការកាត់បន្ថយផលិតកម្មប្រេងរបស់ពួកគេ ។
ទោះបីយ៉ាងណា ប្រទេសរុស្ស៊ីបានផ្តល់សញ្ញាមួយក្នុងន័យនេះ ដោយប្រកាសកាលពីថ្ងៃទី២៥ វិច្ឆិកា ពីការកាត់បន្ថយជានិមិត្តរូបនូវផលិតកម្មប្រេងកាត២៥.០០០ធុងក្នុងមួយថ្ងៃបុ៉ណ្ណោះ ៕
ចែករំលែកព័តមាននេះ