ខេត្តប៉ៃលិន ៖ បន្ទាប់ពីទទួលពាក្យបណ្តឹងពីអាជីវករប្តូរប្រាក់មួយកន្លែងនៅក្នុងផ្សារប៉ាងរលឹមថា មានជនសង្ស័យបន្លំលួចយកប្រាក់ចំនួន២៥០ដុល្លារ សមត្ថកិច្ចស្នងការនគរបាលខេត្តបានឆ្មក់ស្ទាក់ចាប់ឃាត់ខ្លួនជនជាតិចិនចំនួនពីរនាក់ ហើយធ្វើការឆែកឆេរ ស្រាប់តែជនសង្ស័យម្នាក់បានបោះថ្នាំញៀនប្រភេទហេរ៉ូអ៊ីនមួយកញ្ចប់តូចចូលទៅក្នុងធុងសំរាម សមត្ថកិច្ចក៏ក្របួចជនទាំងពីរនាក់យកទៅសួរនាំតែម្តង ។
ហេតុការណ៍ចាប់ឃាត់ខ្លួននេះ បានធ្វើឡើងកាលពីវេលាម៉ោង៦ និង៣០នាទីល្ងាច ថ្ងៃទី២៧ វិច្ឆិកា ២០១៤ ស្ថិតនៅក្នុងផ្ទះសំណាក់មួយយីហោត្បូងទទឹម ស្ថិតក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ។
ជនសង្ស័យដែលឃាត់ខ្លួន ១-ឈ្មោះ ហង ឆាងតឺ ភេទប្រុស អាយុ៤០ឆ្នាំ ប្រើប្រាស់គ្រឿងញៀន និងម្នាក់ទៀតឈ្មោះ ហង ឆាងជុង ភេទប្រុស អាយុ៣៧ឆ្នាំ ទាំងពីរនាក់ជាជនជាតិចិន រស់នៅខេត្តយូណាន ប្រទេសចិន ។
នៅចំពោះមុខសមត្ថកិច្ច ជនសង្ស័យទាំងពីរនាក់នេះ បានសារភាពថា នៅវេលាម៉ោង៣ និង២០នាទីរសៀលថ្ងៃដដែល ពួកគេបានយកប្រាក់ចំនួន២ម៉ឺនបាត (ប្រាក់ថៃ) ទៅដូរយកប្រាក់ខ្មែរ តែដោយអ្នកដូរប្រាក់ហុចប្រាក់ខ្មែរ ដែលមានក្រដាស៥.០០០រៀល ពួកគេមិនចង់បាន ចង់បានតែក្រដាស់៥ម៉ឺនរៀល ឬ១សែនរៀល ។ ពេលនោះអ្នកប្តូរប្រាក់ស្តាប់មិនបានក៏ហុចលុយជាដុល្លារចំនួន៦៥០ដុល្លារមកឱ្យមើលទៀត ហើយពួកគេនៅតែមិនយក លុះម្ចាស់ទាញយកប្រាក់ដាក់ក្នុងទូវិញភ្លេចចំនួន២៥០ដុល្លារនៅលើតុពួកគេក៏យកដាក់ហោប៉ៅរួចឡើងជិះរថយន្តមកក្រុងប៉ៃលិន លុះដល់វេលាម៉ោង៦ល្ងាចថ្ងៃដដែលស្រាប់តែត្រូវសមត្ថកិច្ចចុះមកឆែកឆេរចាប់ខ្លួនតែម្តង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ