រាជធានីភ្នំពេញ ៖ រ៉ឺម៉កម៉ូតូមួយគ្រឿងដឹកសំបកកង់ម៉ូតូចាស់ៗខណៈកំពុងធ្វើដំណើរតាមផ្លូវបានបែកកង់ត្រូវម្ចាស់ដោះម៉ូតូចេញយកទៅប៉ះ ហើយចតរ៉ឺម៉កនៅចិញ្ចើមផ្លូវដោយមិនបានដាក់សញ្ញាសំគាល់ធ្វើឲ្យមន្ត្រីប៉េអឹមម្នាក់ជិះទៅបុករទេះចតទុកចោលដួលរយះជើងហូរឈាម នៅមុខវត្តទួលសុភាឃួន តាមមហាវិថីសហព័ន្ធរុស្ស៊ី ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង១០ និង៣៥នាទីយប់ថ្ងៃទី២៧ ខែវិច្ឆិកា ។
ប្រភពព័ត៌មានបានឲ្យដឹងថា មុនពេលកើតហេតុក្មេងប្រុសជំទង់២នាក់បងប្អូនបើកម៉ូតូអូសរ៉ឺម៉កដើររើសសំបកកង់ម៉ូតូ និងសំបកកង់រថយន្តចាស់ៗដែលគេទុកចោលនៅកន្លែងជួសជុលម៉ូតូយកទៅលក់ឲ្យអ្នកដាំបាយជ្រូក ខណៈពេលរើសបានពេញមួយរ៉ឺម៉កហើយបានធ្វើដំណើរត្រឡប់ទៅផ្ទះវិញទិសដៅពីលិចទៅកើត ពេលមកដល់ចំណុចខាងលើស្រាប់តែម៉ូតូអូសរ៉ឺម៉កបែកកង់ ហើយពួកគេនៅតូចៗផងអូសរ៉ឺម៉កអត់រួចបានដោះកន្ទុយរ៉ឺម៉កដាក់បំបះគូទនៅតាមចិញ្ចើមផ្លូវ ហើយយកម៉ូតូទៅប៉ះកង់ ដោយមិនបានដាក់ជាសញ្ញាសំគាល់ឲ្យដឹងទេ ស្រាប់តែម៉ូតូវ៉េវអាល់ហ្វា ពណ៌ក្រហម ពាក់ស្លាកលេខ ខេមរភូមិន្ទ ១.៥៥៥៣ បើកបរដោយបុរសម្នាក់ជាមន្ត្រីប៉េអឹមក្នុងទិសដៅស្របគ្នាមកដល់ផ្លូវងងឹតមើលអត់ឃើញបានជិះទៅបុករ៉ឺម៉កដែលចតចោលនោះបណ្តាលឲ្យដួលរយះជើង ។
ក្រោយពេលកើតហេតុជនរងគ្រោះទាមទារសំណង ហើយក្មេងប្រុសទាំង២នាក់បានទូរស័ព្ទហៅឪពុកម្តាយមកដោះស្រាយតែអត់មានលុយសង ត្រូវបានសមត្ថកិច្ចវាស់វែងយកទៅដល់អធិការដ្ឋានខណ្ឌពោធិ៍សែនជ័យ អ្នករងរបួសឃើញថា ភាគីខាងរ៉ឺម៉កដឹកសំបកកង់ អត់មានលុយសងសុខចិត្តទៅព្យាបាលរបួសដោយខ្លួនឯងដោយមិនទាមទារសំណងទេ ៕
ចែករំលែកព័តមាននេះ