រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានប្រកាសកាលពីថ្ងៃទី២៦ វិច្ឆិកា ថា អង្គភាពនេះបានដាក់បញ្ជីឈ្មោះខ្មោចទាំងនោះផ្ញើជូនរដ្ឋមន្ត្រីទទួលបន្ទុកក្រសួង ឬស្ថាប័នជាតិនានារបស់រដ្ឋ ដោយបានបង្ហាញពីតួលេខ ឈ្មោះខ្មោចរបស់មន្ត្រីខិលខូចដែលមិនមកធ្វើការងារបម្រើជាតិ តែបើកប្រាក់ខែពីរដ្ឋដែលធ្វើឲ្យខាតបង់ថវិកាជាតិ ។
រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានប្រកាសកាលពីថ្ងៃទី២៦ វិច្ឆិកា ថា អង្គភាពនេះបានដាក់បញ្ជីឈ្មោះខ្មោចទាំងនោះផ្ញើជូនរដ្ឋមន្ត្រីទទួលបន្ទុកក្រសួង ឬស្ថាប័នជាតិនានារបស់រដ្ឋ ដោយបានបង្ហាញពីតួលេខ ឈ្មោះខ្មោចរបស់មន្ត្រីខិលខូចដែលមិនមកធ្វើការងារបម្រើជាតិ តែបើកប្រាក់ខែពីរដ្ឋដែលធ្វើឲ្យខាតបង់ថវិកាជាតិ ។ នេះបើយោងតាមប្រសាសន៍របស់លោកទេសរដ្ឋមន្ត្រីឱម យិុនទៀង ប្រធានអង្គភាពប្រឆាំងអំពើពុករលួយថ្លែងប្រាប់អ្នកសារព័ត៌មានកាលពីថ្ងៃទី២៦ វិច្ឆិកា ក្រោយពេលលោកបានដឹកនាំប្រតិភូអង្គភាពប្រឆាំងអំពើពុករលួយចូលឆ្លើយបំភ្លឺគណៈកម្មការទី១០នៃរដ្ឋសភា នៅវិមានរដ្ឋសភា ។
នៅពេលនេះ អង្គភាពប្រឆាំងអំពើពុករលួយកំពុងរង់ចាំចម្លើយពីក្រសួងមុខងារសាធារណៈដែលបាននិងកំពុងធ្វើការផ្ទៀងផ្ទាត់ឈ្មោះមន្ត្រីដែលបានបំពេញការងារនិងឈ្មោះខ្មោច ។ នៅពេលឆាប់ៗខាងមុខនេះ អង្គភាពប្រឆាំងអំពើពុករលួយនឹងប្រើប្រាស់ទិន្នន័យរបស់ក្រសួងមុខងារសាធារណៈចាត់វិធានការលើមន្ត្រីដែលមានតែឈ្មោះមិនមកធ្វើការទាំងនោះបញ្ជូនទៅតុលាការតាមច្បាប់អង្គភាពប្រឆាំងអំពើពុករលួយ ។ លោកប្រធានអង្គភាពប្រឆាំងអំពើពុករលួយបានបញ្ជាក់ថា យើងត្រូវរង់ចាំឯកសារពីក្រសួងមុខងារសាធារណៈសិន បើមិនមានភស្តុតាងមិនអាចចាប់គេបានទេ ។ ឧទាហរណ៍ថាឈ្មោះខ្មោចក្នុងក្រសួងមួយមាន៣០០នាក់ តែបើយើងមានតួលេខតែ១៥០នាក់ទៅចាប់យ៉ាងម៉េច ?
លោកទេសរដ្ឋមន្ត្រី ឱម យិុនទៀង ថ្លែងថាអង្គភាពប្រឆាំងអំពើពុករលួយកំពុងស៊ើបអង្កេតមន្ត្រីខ្មោចនៅតាមក្រសួងស្ថាប័ននានារបស់រាជរដ្ឋាភិបាលដែលមិនចូលធ្វើការងារ ។ អង្គភាពប្រឆាំងអំពើពុករលួយបានបង្ហាញដល់ស្ថាប័ន ឬក្រសួងទាំងនោះហើយ ។ មានក្រសួងមួយចំនួនបានចាប់ផ្តើមពិនិត្យបុគ្គលិកខ្មោចរបស់គេហើយដែរ ។ ច្បាប់ប្រឆាំងអំពើពុករលួយមានគោលដៅធ្វើឲ្យស្អាតស្អំ ហើយកុំសួរថា ចាប់ប៉ុន្មាននាក់ដាក់ពន្ធនាគារនោះ ។ លោកបញ្ជាក់ថា បើមិនមានភស្តុតាងគ្រប់គ្រាន់ទេមិនចេះតែចាប់ៗទេ តែនៅពេលនេះរដ្ឋមន្ត្រីនៅតាមក្រសួង ឬស្ថាប័នទាំងនោះជាអាចារ្យចាប់ខ្មោច ។ លោកទេសរដ្ឋមន្ត្រី ឱម យិុនទៀង ថ្លែងថា អង្គភាពប្រឆាំងអំពើពុករលួយត្រូវតែពិនិត្យឲ្យបានច្បាប់លាស់ជាមុនសិន ព្រោះអង្គភាពACUមានតែម្នាក់ឯង ឯក្រសួងឬស្ថាប័នមានច្រើនណាស់មិនមែនតែមួយក្រសួងទេ ។ ក្នុងច្បាប់ថវិកាឆ្នាំ២០១៥ រាជរដ្ឋាភិបាលមិនជ្រើសរើសមន្ត្រីថ្មីទេក្នុងនោះអង្គភាពប្រឆាំងអំពើពុករលួយត្រូវពិនិត្យការធ្វើបច្ចុប្បន្នភាពចំនួនមន្ត្រីពិតប្រាកដរបស់គេសិន ។
បច្ចុប្បន្ននេះក្រសួងមុនងារសាធារណៈកំពុងបញ្ចូលទិន្នន័យក្នុងកុំព្យូទ័រ បន្ទាប់មកអង្គភាពACU នឹងប្រើប្រាស់ឯកសារនេះជាភស្តុតាងមួយដែលរឹងមាំ ។ លោក ឱម យិុនទៀង បានលើកឡើងថា អង្គភាពប្រឆាំងអំពើពុករលួយកំពុងស៊ើបអង្កេតផងដែរលើសំណុំរឿងពុករលួយមួយរបស់មូលនិធិពិភពលោកដែលបានផ្តល់ដល់ក្រសួងសុខាភិបាល(Globle Fund) ដែលមានការអះអាងថា បាត់លុយជំនួយរាប់លានដុល្លារ ។ ការស៊ើបអង្កេតមិនទាន់បានបញ្ចប់ទេ តែឯកសារមួយចំនួនអង្គភាពប្រឆាំងអំពើពុករលួយបានផ្ញើទៅកាន់មូលនិធិនេះខ្លះរួចហើយដែរ ពេលណាចប់នឹងជម្រាបជូនដល់អ្នកសារព័ត៌មានឱ្យបានដឹង ។ លោកទេសរដ្ឋមន្ត្រីបានថ្លែងថា ការស៊ើបអង្កេតទាមទារមិនឲ្យលោកនិយាយទេ វាប៉ះពាល់ដល់ការស៊ើបអង្កេត ។ ចំពោះបញ្ហានេះមិនមែនកម្ពុជាធ្វើតែឯងនោះទេ ហើយប្រទេសសិង្ហបុរីក៏ចូលរួមធ្វើដែរ ។ មន្ត្រីACUនឹងទៅកាន់ប្រទេសសិង្ហបុរីនៅពេលឆាប់ៗនេះ ។
ចំពោះករណីពុករលួយដែលពិបាកចាត់ការនោះនិងមិនសូវមានភស្តុតាងបញ្ជាក់ផង តើអង្គភាពACUចាត់ការយ៉ាងម៉េចទៅ ? លោកឱម យិុនទៀង បានអះអាងថា ការចាត់ការបញ្ហានេះវាមានន័យថា ដូចជា ជង់មិនដែលភ្លេចកុកទេ គឺមានតែកុកទេដែលភ្លេចជង់នោះ តែបើរឿងនេះមានរយៈពេល៥ឆ្នាំក៏យើងនៅតែរង់ចាំដែរ ។ នៅពេលដំណាក់កាលពិនិត្យពាក្យបណ្តឹងមិនមានដើមបណ្តឹងនិងចុងចម្លើយនោះទេ ។នៅពេលបើកបណ្តឹង អង្គភាពប្រឆាំងអំពើពុករលួយនឹងអនុញ្ញាតឲ្យម្ចាស់បណ្តឹងមកស្តាប់លើបណ្តឹងរបស់គេ បើមានលក្ខណៈគ្រប់គ្រាន់នឹងបើកការស៊ើបអង្កេត តែបើមិនគ្រប់គ្រាន់ទេនឹងបំពេញបន្ថែម ។ លោក ឱម យិុនទៀង បានបញ្ជាក់ទៀតថា ម្ចាស់បណ្តឹងអាចអង្គុយស្តាប់កិច្ចប្រជុំនៅអង្គភាពACUបាន តែបើពាក្យបណ្តឹងនោះម្ចាស់ដឹងថា អង្គភាពប្រឆាំងអំពើពុករលួយមិនទទួលយក គាត់អាចនិយាយបញ្ជាក់ ឬមានភស្តុតាងបន្ថែម ។ ចំពោះលទ្ធផលនៃជំនួបនេះគណៈកម្មការទី១០នៃរដ្ឋសភា និងអង្គភាពប្រឆាំងអំពើពុករលួយចាប់ផ្តើមសហការគ្នាបង្ហាញពីតួនាទីនិងភារកិច្ចរបស់ខ្លួនតាមច្បាប់។ ច្បាប់អនុញ្ញាតឲ្យតែអង្គភាពប្រឆាំងអំពើពុករលួយមួយគត់ មានសមត្ថកិច្ចក្នុងការស៊ើបអង្កេតប្រឆាំងអំពើពុករលួយ ។
ចំពោះអង្គភាពដទៃបានដឹងពីអំពើពុករលួយ ត្រូវប្តឹងមកអង្គភាពប្រឆាំងអំពើពុករលួយ មិនអាចទៅបើកការស៊ើបអង្កេតខ្លួនឯងបានទេ ។ លោកទេសរដ្ឋមន្ត្រីឱម យុិនទៀង ថ្លែងថា បើចៅក្រមសួរករណីលក់ដី តែបើមានការសួកប៉ាន់ លោកចៅក្រមមិនបន្តស៊ើបអង្កេតទេហើយដកចេញចំណុចនេះ រួចប្តឹងមកអង្គភាពប្រឆាំងអំពើពុករលួយ ។ បើគណៈកម្មការទី១០រដ្ឋសភាបានទទួលពាក្យបណ្តឹងពីនរណាត្រូវដាក់ទៅអង្គភាពប្រឆាំងអំពើពុករលួយ បន្ទាប់មកនឹងមានការឆ្លើយតបវិញភ្លាមៗ បើវាមិនស្ថិតនៅក្នុងសមត្ថកិច្ចACUទេ ។ គណៈកម្មការទី១០នៃរដ្ឋសភា អាចចូលរួមស្តាប់ជាមួយACUបាននៅពេលមានការប្រជុំ ។
លោកប្រធានអង្គភាពប្រឆាំងអំពើពុករលួយបានលើកឡើងថា នៅថ្ងៃទី៩ ខែធ្នូ ខាងមុននេះនឹងមានការរៀបចំទិវាជាតិនិងអន្តរជាតិប្រឆាំងអំពើពុករលួយ ក្រោមប្រធានបទ«តួនាទីដ៏សំខាន់របស់អ្នកសារព័ត៌មានក្នុងការប្រឆាំងអំពើពុករលួយ» ។
អង្គភាពប្រឆាំងអំពើពុករលួយ ក៏បានកោតសរសើអ្នកសារព័ត៌មានដែលបានផ្សព្វផ្សាយ ជាពិសេសពេលប្រឡងបាក់ឌុបថ្មីៗនេះ មិនមែនគេខ្លាចអង្គភាពប្រឆាំងអំពើពុករលួយទេ តែសារព័ត៌មានទេបានជួយយើងខ្ញុំនោះទើបមានការកែប្រែបែបនេះ ។ ក្នុងកិច្ចប្រជុំបិទទ្វារជាង៣ម៉ោងគណៈកម្មការទី១០នៃរដ្ឋសភាដឹកនាំដោយលោក ហូរ វ៉ាន់ បានដាក់សំណួរជាច្រើនទៅកាន់អង្គភាពACU ពីនីតិវិធីថា តើត្រូវកម្ចាត់អំពើពុករលួយនៅកម្ពុជាយ៉ាងណាឲ្យមានប្រសិទ្ធភាព និងចំណាត់ការក្នុងការការពារសុវត្ថិភាពដល់សាក្សី ឬអ្នកដែលបានរាយការណ៍ពីជនប្រព្រឹត្តអំពើពុករលួយ ។ ក្នុងនោះក៏បានលើកឡើងពីកិច្ចសហការគ្នារវាងគណៈកម្មការទី១០នៃរដ្ឋសភា និងអង្គភាពប្រឆាំងអំពើពុករលួយ ក្នុងការរៀបចំច្បាប់ការពារដល់អ្នកផ្តល់ព័ត៌មានឬសាក្សីពីអំពើពុករលួយនានា ។ លោក ហូរ វ៉ាន់ ថ្លែងថា ជំនួបនេះបានលើកឡើងពីកិច្ចសហការរវាងគណៈកម្មការទី១០នៃរដ្ឋសភានិងអង្គភាពប្រឆាំងអំពើពុករលួយព្រោះមិនដែលបានជួបគ្នាសោះ ។ ជាលទ្ធផល ភាគីទាំងពីរបានយល់អំពីគ្នាខ្លះ ព្រោះវាមានកិច្ចការងារជាច្រើនដែលភាគីទាំងពីរត្រូវតែយោគយល់គ្នាបន្ថែមទៀត គឺមិនទាន់ចប់ទេ ។
លោកអះអាងថា យើងត្រូវសហការគ្នាព្រោះវាផលប្រយោជន៍របស់ប្រទេសជាតិ និងសង្គម ។ តែមានភាពខុសគ្នាបន្តិចគឺគណៈកម្មការទី១០នៃរដ្ឋសភាប្រយុទ្ធប្រឆាំងអំពើពុករលួយក្នុងនីតិប្បញ្ញតិ្ត(រដ្ឋសភា) ឯលោក ឱម យិុនទៀង ប្រយុទ្ធប្រឆាំងអំពើពុករលួយក្នុងនីតិប្រតិបត្តិ(រដ្ឋាភិបាល) ។ លោក ហូរ វ៉ាន់ ថ្លែងថា គណៈកម្មការទី១០នៃរដ្ឋសភានិងអង្គភាពប្រឆាំងអំពើពុករលួយត្រូវតែមានការសហការគ្នាបន្តទៀត ។ ភាគីទាំងពីរបានលើកឡើងពីបញ្ហាសាក្សីឬអ្នកផ្តល់ព័ត៌មានពីអំពើពុករលួយ ដែលក្នុងនោះគណៈកម្មការទី១០នៃរដ្ឋសភាគាំទ្រឲ្យមានច្បាប់មួយការពារសាក្សីព្រោះលោកយល់ថា បញ្ហាពុករលួយជាបញ្ហារសើប និងអាចបណ្តាលឲ្យគ្រោះថ្នាក់ដល់អ្នកផ្តល់ព័ត៌មានផង ។ កាលណាមានច្បាប់ការពារសាក្សី ពេលនោះគេអាចផ្តល់ព័ត៌មានច្រើនមកកាន់ACU ហើយក៏ងាយស្រួលក្នុងការចាត់ការដែរ ។
លោក ហូរ វ៉ាន់ ថ្លែងទៀតថា គណៈកម្មការទី១០នៃរដ្ឋសភានិងអង្គភាពប្រឆាំងអំពើពុករលួយនៅមានចំណុចខ្វែងគំនិតគ្នាមួយចំនួនទៀតដែលមិនទាន់ដោះស្រាយចប់ បើទោះជាមានជំនួបបីម៉ោងហើយក៏ដោយ ។ យើងនឹងលើកយកអ្វីដែលមិនទាន់ដោះស្រាយចប់ទាំងនោះដោយស្មោះត្រង់ទៅវិញទៅមក មិនលាក់បាំងក្នុងគុណប្រយោជន៍ជាតិ និងសង្គមយើង ។ អ្វីទាំងអស់នេះគឺដើម្បីកម្ចាត់អំពើពុករលួយ និងកាត់បន្ថយអំពើពុករលួយនៅកម្ពុជានាពេលបច្ចុប្បន្ននិងអនាគត ។ លោក ហូរ វ៉ាន់ បានលើកឡើងថាគណៈកម្មការទី១០នៃរដ្ឋសភា និងអង្គភាពប្រឆាំងអំពើពុករលួយ ត្រូវតែធ្វើការបញ្ជាក់ពីតួនាទីរបស់ខ្លួនឲ្យបានច្បាស់ថា តើអង្គភាពប្រឆាំងអំពើពុករលួយឯករាជ្យឬមានស្ថិតនៅក្រោមគំនាបនៃនាយករដ្ឋមន្ត្រីដែរអត់ ?
លោក ឱម យុិនទៀង បានបញ្ជាក់ប្រាប់លោក ហូរ វ៉ាន់ថា អង្គភាពប្រឆាំងអំពើពុករលួយមិនស្ថិតនៅក្រោមនាយករដ្ឋមន្ត្រីដូចរដ្ឋមន្ត្រីដទៃទេ គឺស្ថិតនៅក្រោមច្បាប់ ហើយអនុវត្តភារកិច្ចតាមច្បាប់កំណត់ ៕
ចែករំលែកព័តមាននេះ