ខេត្តសៀមរាប ៖ កាលពីព្រឹកថ្ងៃទី២៦វិច្ឆិកា តំណាងក្រុមអាជីវករចំនួន៦០នាក់ នៅផ្សាររាត្រីអង្គរឃ្យុងយូ បានធ្វើការតវ៉ាទាមទារ២ចំណុច ស្នើឱ្យអាជ្ញាធរក្រុងសៀមរាបរកដំណោះស្រាយឱ្យបានសមរម្យ ប៉ុន្តែជាលទ្ធផលទទួលបានតែប្រមាណ៤០%ប៉ុណ្ណោះ ដូច្នេះបញ្ហានៅផ្សាររាត្រីអង្គរឃ្យុងយូនេះ ហាក់នៅមិនទាន់បញ្ចប់ជាស្ថាពរទេ
ខេត្តសៀមរាប ៖ កាលពីព្រឹកថ្ងៃទី២៦វិច្ឆិកា តំណាងក្រុមអាជីវករចំនួន៦០នាក់ នៅផ្សាររាត្រីអង្គរឃ្យុងយូ បានធ្វើការតវ៉ាទាមទារ២ចំណុច ស្នើឱ្យអាជ្ញាធរក្រុងសៀមរាបរកដំណោះស្រាយឱ្យបានសមរម្យ ប៉ុន្តែជាលទ្ធផលទទួលបានតែប្រមាណ៤០%ប៉ុណ្ណោះ ដូច្នេះបញ្ហានៅផ្សាររាត្រីអង្គរឃ្យុងយូនេះ ហាក់នៅមិនទាន់បញ្ចប់ជាស្ថាពរទេ នៅគ្រាដែលអាជ្ញាធរក្រុងសៀមរាបចេញ ស.ជ.ណ ឱ្យរុះរើតូបលក់ដូរចេញ ដើម្បីរៀបចំកែលម្អសណ្តាប់ធ្នាប់ និងបរិស្ថានក្រុង ឱ្យមានរបៀបរៀបរយឡើងវិញ ។
ប្រភពពីក្រុមអាជីវករលក់ដូរនៅផ្សាររាត្រីអង្គរឃ្យុងយូ បានប្រាប់កោះសន្តិភាពនៅរសៀលថ្ងៃទី២៦ វិច្ឆិកា ថា ពួកគាត់បានមកស្តាប់ការប្រជុំរកដំណោះស្រាយអំពីការលក់ដូរនៅផ្សាររាត្រីអង្គរឃ្យុងយូជាយូរឆ្នាំមកហើយនេះ មិនដែលឃើញមានលិខិតស្នាមពីអាជ្ញាធរខាងណាទេ ទើបតែប៉ុន្មានថ្ងៃនេះពួកគាត់បានឃើញលិខិតជូនដំណឹងមួយរបស់សាលាក្រុងសៀមរាបថា ឱ្យពួកគាត់ត្រូវតែធ្វើការរុះរើជាបន្ទាន់នៅថ្ងៃទី២៥ វិច្ឆិកា ដើម្បីរៀបចំសណ្តាប់ធ្នាប់ ។ ប៉ុន្តែពួកគាត់មិនអាចគោរពតាមសាលាក្រុងបានទេ ព្រោះពួកគាត់បានទិញតូបទាំងនោះ និងឲ្យលុយទៅប៉ូលិសរួចរាល់អស់ហើយ តាំងពីឃ្យុងយូនេះទើបតែនឹងកើតឡើង ។ ប្រភពព័ត៌មានបានបន្តទៀតថា នៅព្រឹកថ្ងៃទី២៦ វិច្ឆកា អាជ្ញាធរក្រុងសៀមរាបបានហៅពួកគាត់ទៅប្រជុំដើម្បីរកដំណោះស្រាយ តែមិនទទួលបានលទ្ធផលជាផ្លែផ្កាទេ ហើយពួកគាត់ប្តេជ្ញាបន្តទៅរកដំណោះនៅសាលាខេត្តទៀត ។
សូមរំលឹកថា សេចក្តីជូនដំណឹងរបស់សាលាក្រុងសៀមរាប លេខ២៩៥ សជណ ចុះថ្ងៃទី២០ វិច្ឆិកា ឆ្នាំ២០១៤ ដែលចុះហត្ថលេខាដោយលោក សូរ ប្លាតុង អភិបាលក្រុងស្តីទី បានបញ្ជាក់ថា ដោយសង្កេតឃើញបច្ចុប្បន្ននេះ សកម្មភាពលក់ដូរក្នុងផ្សាររាត្រីអង្គរឃ្យុងយូគ្មានសណ្តាប់ធ្នាប់ របៀបរៀបរយ និងសោភ័ណភាព ដូចជាមានការបោះបង្គោល ចាក់ដីលុបប្រឡាយទឹក ពង្រីកនិងសាងសង់កន្លែងលក់ដូរ បង្កការកកស្ទះចរាចរណ៍ជាប្រចាំ ។ ដូច្នេះដើម្បីរៀបចំទីតាំងនេះឲ្យមានសណ្តាប់ធ្នាប់ និងសម្រួលចរា ចរណ៍លើផ្លូវជាតិដ៏សំខាន់នេះ អាជីវករទាំងអស់ ត្រូវអនុវត្តតាមការណែនាំ៖
ទី១-មិនអនុញ្ញាតឲ្យលក់ដូរនៅអង្គរឃ្យុងយូចាប់ពីម៉ោង៦ព្រឹក រហូតដល់ម៉ោង៤ល្ងាច ។
ទី២-ត្រូវរុះរើរោង តូប គ្រែ តុ កៅអី បង្គោល រទេះ រ៉ឺម៉ក ទីតាំងស្តុកទុកសម្ភារទំនិញផ្សេងៗ ក្រោយចប់លក់ពេលយប់មិនអនុញ្ញាតឲ្យមានសល់សម្ភារ ទំនិញ ឬស្នាក់នៅទីនោះឡើយ ពោលគឺលក់ពេលយប់ចប់ព្រឹកឡើងស្អាត ។
ទី៣-មិនអនុញ្ញាតឲ្យមានការសាងសង់តូប ឬពង្រីកកន្លែងលក់ដូរបន្ថែមទៀតឡើយ ។
ទី៤-ចំពោះអ្នកលក់ដូរនៅតាមបណ្តោយផ្លូវធំ ត្រូវរុះរើមកលក់នៅតាមផ្លូវអមសងខាងប្រឡាយវិញ តាមការចង្អុលបង្ហាញរបស់ក្រុមការងារ ។
ទី៥-ចំពោះអ្នកមានឈ្មោះក្នុងបញ្ជីដែលបានស្រង់កន្លងមកទៅតាមផលរបរនីមួយៗ សាលាក្រុងនឹងរៀបចំកន្លែងលក់ឲ្យវិញសាជាថ្មី។
ទី៦-រយៈពេលនៃការរុះរើ ត្រូវអនុវត្តចាប់ពីថ្ងៃជូនដំណឹង រហូតដល់ថ្ងៃទី២៥ វិច្ឆិកា ឆ្នាំ២០១៤ ក្នុងករណីមិនអនុវត្តតាមការជូនដំណឹង សាលាក្រុងនឹងចាត់វិធានការរុះរើ ដកហូតសម្ភារលក់ដូរទាំងអស់ ដោយមិនទទួលខុសត្រូវចំពោះការបាត់បង់ ឬខូចខាតឡើយ ។
បន្ទាប់ពីក្រុមអាជីវករប្រមូលផ្តុំគ្នា ក្រោយពីសាលាក្រុងចេញសេចក្តីជូនដំណឹង ក៏ធ្លាយព័ត៌មានថា មានបុរសម្នាក់ឈ្មោះ ផល ជាអ្នកប្រមូលលុយពីអាជីវករលក់ដូរនៅផ្សាររាត្រីអង្គរឃ្យុងយូ ក្នុង១ខែ១៥លានរៀលឲ្យទៅសាលាខេត្ត ដោយលោក ប៊ុន ថារិទ្ធ អភិបាលរងខេត្ត និងជាអ្នកនាំពាក្យសាលាខេត្ត ជាអ្នកគ្រប់គ្រងលុយនោះ ។ ជុំវិញព័ត៌មានថា អ្នកនាំពាក្យសាលាខេត្តគ្រប់គ្រងលុយ១៥លានរៀលក្នុង១ខែ ដែលលុយនោះបានពីការដើរប្រមូលពីអាជីវករលក់ដូរនៅផ្សាររាត្រីអង្គរឃ្យុងយូនោះ ត្រូវបានលោក ប៊ុន ថារិទ្ធ អភិបាលរងខេត្ត មានប្រសាសន៍ថា លោកមិនបានពាក់ព័ន្ធនឹងលុយច្រើនយ៉ាងនោះទេ ប៉ុន្តែបើត្រឹម៥០ម៉ឺនរៀល សម្រាប់ផ្តល់ឲ្យកងកម្លាំងចុះរៀបចំសណ្តាប់ធ្នាប់គឺមាន ។ ដូច្នេះតួលេខពិតប្រាកដប៉ុន្មាននោះ សុំសួរទៅសាលាក្រុងទើបដឹង ឬក៏អាចសាកសួរទៅឈ្មោះ អៀង សុផល អ្នកគ្រប់គ្រងផ្សារនោះ ដែលគាត់ជាអ្នកប្រមូលលុយភាស៊ី និងអនាម័យ ទើបអាចដឹងពីចំនួនពិតច្បាស់លាស់ ។
លោក សូរ ប្លាតុង អភិបាលក្រុងសៀមរាបស្តីទី ថ្លែងថា លោកមិនបានដឹងពីចំនួនលុយពិតប្រាកដទេ តែខាងលោកពិតជាបានទទួលលុយចំនួន២លានរៀល ដែលលុយនោះយកទៅចាត់ចែង ប្រើប្រាស់សម្រាប់កងកម្លាំងចម្រុះក្នុងការចុះរៀបចំសណ្តាប់ធ្នាប់ ។ ចំណែកលោក អៀង សុផល អ្នកគ្រប់គ្រងផ្សាររាត្រីអង្គរឃ្យុងយូ បានឲ្យដឹងថា ខាងលោកពិតជាអ្នកប្រមូលលុយភាស៊ី និងអនាម័យនៅទីនោះមែន ។ លុយនោះបើបូកសរុបទាំងការយាមកាមសម្ភាររបស់អាជីវករ គឺអាចបាន១៥លានរៀលមែន ប៉ុន្តែក៏បានចំណាយទៅលើកម្លាំងយាមកាម អនាម័យ កាកបាទក្រហម និងការចំណាយផ្សេងៗអស់ ៨លានរៀលទៅហើយ ។ ដូច្នេះការផ្តល់ជូនទៅសាលាខេត្ត បានតែ៧លានរៀលទេ ហើយប្រាក់៧លានរៀលនោះ គឺប្រគល់ឲ្យលោក ប៊ុន ថារិទ្ធ អភិបាលរងខេត្ត ជាអ្នកគ្រប់គ្រង ដើម្បីចែកជូនទៅសាលាក្រុងសៀមរាប និងការិយាល័យនគរបាលសណ្តាប់ធ្នាប់ខេត្ត ។
ក្រោយពីព័ត៌មានបានលាតត្រដាងដូច្នេះ គេមិនដឹងថា លទ្ធផលចុងក្រោយនឹងទៅជាយ៉ាងណានោះទេ ។ រីឯក្រុមអាជីវករនៅតែមិនអស់ចិត្តចំពោះការចំណាយលុយជាប្រចាំ ហើយបែរជាមានការដេញឲ្យរុះរើតូបលក់ដូរទៅវិញ ៕
ចែករំលែកព័តមាននេះ