រាជធានីភ្នំពេញ ៖ សេចក្តីព្រាងច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០១៥ បានត្រូវរដ្ឋសភាជាតិផ្តើមលើកយកមកពិភាក្សា និងអនុម័តនៅក្នុងសម័យប្រជុំពេញអង្គរបស់ខ្លួន ដោយមានកូរ៉ុមសរុប១១២រូប ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងថា សម័យប្រជុំពេញអង្គរដ្ឋសភាលើកទី៣ នីតិកាលទី៥ នៅព្រឹកថ្ងៃទី២៨ វិច្ឆិកា ២០១៤នាពេលនេះ បានប្រព្រឹត្តទៅក្រោមអធិបតីភាព សម្តេច ហេង សំរិន ប្រធានរដ្ឋសភាជាតិ និងមានការចូលរួមពីសម្តេចតេជោ ហ៊ុន សែន ចំណែកមេដឹកនំាបក្សប្រឆាំងលោក សម រង្ស៊ី និង លោក កឹម សុខា ក៍មានវត្តមានផងដែរ ។
គួរបញ្ជាក់ថា សេចក្តីព្រាងច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០១៥ មាន៦ជំពូកស្មើនឹង១៧មាត្រា មានឧបសម្ព័ន្ឋ២១ទំព័រ ត្រូវបានគណៈរដ្ឋមន្រ្តីអនុម័តកាលពីថ្ងៃទី២៤ តុលា និងត្រូវរាជរដ្ឋាភិបាលបញ្ជូនទៅដល់រដ្ឋសភានៅថ្ងៃទី២៧ តុលា ២០១៤ ។
បើតាមសេចក្តីព្រាងច្បាប់ខាងលើ នៅឆ្នាំ២០១៥ រាជរដ្ឋាភិបាលគ្រោងចំណាយថវិកាសរុប ១៥,០៣៥,២២៩លានរៀល មានកំណើន១០.៦% បើប្រៀបធៀបទៅនឹងឆ្នាំ២០១៤ ស្មើនឹង២០.២០% នៃផលិតផលសរុបក្នុងស្រុក ៕
ចែករំលែកព័តមាននេះ