រាជធានីភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ បានជួបជាមួយលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃស្ងាត់ៗនាព្រឹកថ្ងៃទី២៧ វិច្ឆិកា នៅវិមានរដ្ឋសភា ដើម្បីជជែកអំពីរឿងលោក មាជ សុវណ្ណារ៉ា ប្រធានផ្នែកផ្សព្វផ្សាយ និងព័ត៌មានរបស់គណបក្សសង្គ្រោះជាតិ ព្រមទាំងបញ្ហាពាក់ព័ន្ធទាក់ទងនឹងការជ្រើសរើសសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី ។
លោក សម រង្ស៊ី បានថ្លែងប្រាប់អ្នកសារព័ត៌មាននៅក្រោយជំនួបថា លោកលើកឡើងពីរឿងរបស់លោក មាជ សុវណ្ណារ៉ា និងស្នើសុំឱ្យមានការដោះលែង ព្រមទាំងសកម្មជនគណបក្សសង្គ្រោះជាតិមួយចំនួនដែលកំពុងជាប់ពន្ធនាគារព្រៃស និងលើកពីករណីព្រះសង្ឃត្រូវចាប់ខ្លួននិងផ្សឹក ព្រមទាំងស្ត្រីសកម្មជនបឹងកក់ផងដែរ ។
លោក សម រង្ស៊ី បញ្ជាក់ថា «យើងចង់ឱ្យមានការបន្ធូរបន្ថយភាពតានតឹង និងចង់ឱ្យមានការដោះលែង និងបញ្ចប់នីតិវិធីតុលាការចំពោះប្រជាពលរដ្ឋដែលកំពុងប្រឈមមុខនឹងតុលាការ ព្រោះថា អ្នកទាំងនោះ គឺគាត់មានទុក្ខ ហេតុអ្វីបានជាតុលាការដាក់ទោសគាត់រហូតដល់មួយឆ្នាំ ដែលជាការមិនត្រឹមត្រូវ ។ ត្រូវឱ្យមានការដោះលែង បុ៉ន្តែក្នុងនាមគណបក្សសង្គ្រោះជាតិមិនអាចឆ្លើយបានទេ គឺទុកឱ្យគណបក្សប្រជាជនកម្ពុជា ជាអ្នកឆ្លើយតបចុះ» ។ ឆ្លើយតបនឹងការលើកឡើងរបស់លោក សម រង្ស៊ី ប្រធានគណបក្សសង្គ្រោះជាតិ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ មានប្រសាសន៍ថា រឿងនេះគ្មានអ្វីជាការពិបាកទេ ដោយបញ្ជាក់ថា បញ្ហាស្នើសុំឱ្យដោះលែងលោក មាជ សុវណ្ណារ៉ា និងសកម្មជនផ្សេងៗទៀត គឺជាសិទ្ធិរបស់តុលាការ។
ទោះបីជាមានការឆ្លើយតបយ៉ាងខ្លីថា តាមឆន្ទានុសិទ្ធិរបស់តុលាការក្តី ក៏លោក សម រង្ស៊ី បញ្ជាក់ថា បញ្ហាទាំងអស់នេះមានដំណើរការល្អនិងសង្ឃឹមថា នឹងមានដំណោះស្រាយបញ្ហាដែលសេសសល់ឱ្យបានត្រឹមត្រូវក្នុងរយៈពេលកាន់តែឆាប់កាន់តែល្អ ។ លោកបន្តថា ការជជែកជាមួយលោកឧបនាយករដ្ឋមន្ត្រី ស ខេង រឿង គ.ជ.ប. នឹងធានាថា ការរៀបចំការបោះឆ្នោតលើកក្រោយនឹងទទួលបានយុត្តិធម៌ ត្រឹមត្រូវ ។
លោក សម រង្ស៊ី បន្តថា ក្នុងជំនួបនោះ លោកមិនបានជជែកអំពីតំណែងគណៈកម្មាធិការជាតិរៀបចំការបោះឆ្នោតទេ គ្រាន់តែនៅពេលដែលមានរូបមន្តណាមួយល្អហើយយើងទទួលយកទាំងអស់ដើម្បីរួមគ្នាដោះស្រាយឱ្យពេញលេញជាផ្លូវការ ពេលនោះនឹងប្រកាសតែម្តង ។
គួររំលឹកថា កាលពីយប់ថ្ងៃទី២៦ វិច្ឆិកាតាមវិទ្យុអាស៊ីសេរី លោក សម រង្ស៊ី បញ្ជាក់ថាលោកនឹងជួបជាមួយលោកឧបនាយករដ្ឋមន្ត្រី ស ខេង ក្នុងជំនួបជាមួយភាគីគណបក្សប្រជាជនកម្ពុជា ហើយត្រៀមខ្លួនជានិច្ចនិងសង្ឃឹមថា រកដំណោះស្រាយបាន ។ ដោយសារតែភាគីគណបក្សប្រជាជនកម្ពុជាមានអ្នកដោះស្រាយរឿងជ្រើសរើស គ.ជ.ប និងច្បាប់បោះឆ្នោតថ្មី ដូច្នេះបញ្ហាដែលនៅសេសសល់ យើងនឹងទៅជជែកគ្នាផ្ទាល់ ។ ថ្នាក់ដឹកនាំគណបក្សប្រជាជនកម្ពុជានឹងតាមដានរឿងនេះ ព្រោះថាយើងមិនអាចអូសបន្លាយយូរនោះទេ ដោយសារថាខិតជិតដល់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅដើមឆ្នាំ២០១៧ ។ យើងនឹងដោះស្រាយបញ្ហាដែលសេសសល់នោះឱ្យអស់នៅមុនឆ្នាំ២០១៥។ យើងសង្ឃឹមថា បញ្ហាលោក មាជ សុវណ្ណារ៉ា និងរឿង គ.ជ.ប នឹងអាចដោះស្រាយចប់ ។
ចំណែកលោក កឹម សុខា អនុប្រធានទី១ រដ្ឋសភា និងជាអនុប្រធានគណបក្សសង្គ្រោះជាតិ បានលើកឡើងថា ការចាប់ខ្លួនលោក មាជ សុវណ្ណារ៉ា ប្រធានផ្នែកផ្សព្វផ្សាយ និងព័ត៌មានរបស់គណបក្សសង្គ្រោះជាតិ ហើយបច្ចុប្បន្នកំពុងជាប់ពន្ធនាគារព្រៃស គឺគណបក្សសង្គ្រោះជាតិនឹងធ្វើតាមនីតិវិធីច្បាប់ និងចាត់វិធានការដើម្បីឱ្យលោក មាជ សុវណ្ណារ៉ា មានអភ័យឯកសិទ្ធិក្នុងឋានៈជាតំណាងរាស្ត្រ ដោយមានការដោះដូរសមាជិកជាប់ឆ្នោតគណបក្សសង្គ្រោះជាតិដាក់ឈ្មោះ លោក មាជ សុវណ្ណារ៉ា ជំនួសដើម្បីឱ្យគាត់រួចផុតដោយការលើកលែងទោស ហើយអ្នកដែលត្រូវដោះដូរនោះនឹងត្រូវបញ្ជូនទៅកន្លែងធ្វើការផ្សេងវិញ ។
លោក កឹម សុខា សង្កត់ធ្ងន់ថា ប្រសិនបើគ្មានដំណោះស្រាយទេ គណបក្សសង្គ្រោះជាតិនឹងធ្វើសន្និបាតក្រុមប្រឹក្សាគណបក្សរបស់ខ្លួនដើម្បីសម្រេចធ្វើអ្វីបន្តទៀត និងសម្រេចដើរចេញពីសភា ឬយ៉ាងណានោះ ។ ក្នុងការដែលសមាជិកគណបក្សសង្គ្រោះជាតិចូលក្នុងសភាជាមួយគណបក្សប្រជាជនកម្ពុជានោះ ដោយសារតែប្រជាពលរដ្ឋគាំទ្រភាគច្រើនចង់ឱ្យមានការផ្លាស់ប្តូរ និងកែប្រែ ទើបសមាជិកគណបក្សសង្គ្រោះជាតិចូល បុ៉ន្តែបើប្រជាពលរដ្ឋចង់ឱ្យសមាជិកគណបក្សទាំងអស់នៅក្រៅសភាដើម្បីតស៊ូយ៉ាងណានោះ គណបក្សនឹងពិភាក្សាគ្នាបន្តទៀត ។
លោក សម រង្ស៊ី គូសបញ្ជាក់ថា ការចូលសភាចង់ឱ្យមានការកែប្រែ ហើយការកែប្រែនោះមិនមានន័យថា កែប្រែរយៈប៉ុន្មានខែទេ គឺរង់ចាំពេលវេលាច្បាស់លាស់ ហើយពេលនេះគណបក្សសង្គ្រោះជាតិកំពុងតែធ្វើកំណែទម្រង់បណ្តើរៗហើយ ។ ទោះជាយ៉ាងណាក្តី មេដឹកនាំគណបក្សទាំងពីរសន្យាថា នឹងធ្វើកំណែទម្រង់ការបោះឆ្នោតតាមគោលការណ៍ដែលប្រជាពលរដ្ឋចង់បាន ៕
ចែករំលែកព័តមាននេះ