រាជធានីភ្នំពេញ ៖ បុរសពីរនាក់បើកម៉ូតូឌុបគ្នាឆ្លងផ្លូវត្រូវរថយន្តតាកូម៉ាមួយគ្រឿងបើកក្នុងល្បឿនលឿនជ្រុលទៅបុកពេញទំហឹងបណ្តាលឱ្យបុរសបើកម៉ូតូរងរបួសធ្ងន់ និងបានស្លាប់ពេលបញ្ជូនដល់មន្ទីរពេទ្យ ចំណែកបុរសជិះពីក្រោយរងរបួសស្រាល ។ ហេតុការណ៍នេះកើតឡើងកាលពីវេលាម៉ោង ៩ និង៥០នាទីយប់ ថ្ងៃទី២៧ វិច្ឆិកា ២០១៤ នៅចំណុចមុខផ្ទះសំណាក់សុមនា ផ្លូវសហព័ន្ធរុស្ស៊ីកែង និងផ្លូវបេតុង ច្រកចូលវិមានសព(វៀតណាម) ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់បើករថយន្តតាកូម៉ា មួយបាំងកន្លះ អត់ស្គាល់ស្លាកលេខបើកគេចពីមនុស្សមួយក្រុមជិះម៉ូតូ៣គ្រឿងដេញតាមក្រោយ ដោយរថយន្តបានបើកយ៉ាងលឿនតាមមហាវិថីសហព័ន្ធរុស្ស៊ី ក្នុងទិសដៅកើតទៅលិច ខណៈមកដល់ចំណុចកើតហេតុក៏បានជ្រុលទៅបុកម៉ូតូវីវ៉ា ពណ៌ក្រហមមួយគ្រឿង ពាក់ស្លាកលេខភ្នំពេញ1BL-3828 ជិះដោយបុរសពីរនាក់បើកឌុបគ្នាឆ្លងផ្លូវ ពេញទំហឹងលាន់សូរដូចរន្ទះបណ្តាលឱ្យបុរសជាអ្នកបើកម៉ូតូរងរបួសធ្ងន់ ហើយបានស្លាប់ពេលបញ្ជូនដល់មន្ទីរពេទ្យ ចំណែកបុរសជិះពីក្រោយរងរបួសស្រាល ។
ក្រោយពេលកើតហេតុរថយន្តបង្កបានបើកគេចបាត់ស្រមោល ។
ចែករំលែកព័តមាននេះ