រដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ូវ សន្យាកាលពីថ្ងៃទី២៦ វិច្ឆិកាថា ប្រទេសរុស្ស៊ីនឹងបន្តជួយទ្រទ្រង់ដល់ប្រធានាធិបតីស៊ីរី លោកបាចា អាល់អាសាដ ដើម្បីជួយលោកក្នុងការប្រឈមមុខនឹងភេរវកម្ម ដែលជាការគំរាមកំហែងសំខាន់ដល់ស្ថេរភាពនៅមជ្ឈឹមបូព៌ា ។
យោងតាមក្រុងមូស្គូថា ការពង្រីកខ្លួនរបស់ពួកជីហាដនៃក្រុមរដ្ឋអ៊ិស្លាមដែលកាន់កាប់មួយផ្នែកធំនៃដែនដីស៊ីរី និងអីុរ៉ាក់ តម្រូវឱ្យគ្រប់កម្លាំងទាំងអស់ជួយដល់លោកអាសាដ ក្នុងការប្រយុទ្ធជាមួយពួកនេះ ។ សម្រាប់ពួកលោកខាងលិច ក៏ដូចជាសម្រាប់ពួកប្រឆាំងស៊ីរីដែរ វាគ្មានបញ្ហាទេដែលត្រូវរួមសហការជាមួយក្រុងដាម៉ាស់ ។ ថ្លែងទៅកាន់សារព័ត៌មានរួមជាមួយសមភាគីស៊ីរី លោកវ៉ាលីដ អាល់មូអាឡែម នៅទីក្រុងសូតជី លោកឡាវរ៉ូវ មានប្រសាសន៍ថា យើងយល់ស្របតាមទស្សនៈដែលថា កត្តាសំខាន់នជាប្រភពនៃសភាពការណ៍បច្ចុប្បន្ននៅមជ្ឈឹមបូព៌ា គឺការគំរាមកំហែងភេរវកម្ម ។ រុស្ស៊ីនឹងបន្តជួយទ្រទ្រង់ស៊ីរីប្រឆាំងនឹងការគំរាមកំហែងនេះ ។
លោកវ៉ាលីដ អាល់មូអាឡែម ដែលមុននេះជួបជាមួយលោកវ្ល៉ាឌីមៀរ ពូទីន នោះគូសបញ្ជាក់ថា ប្រធានាធិបតីរុស្ស៊ីប្រាប់លោកពីការប្តេជ្ញាចិត្តពង្រីកទំនាក់ទំនងជាមួយស៊ីរី និងជាមួយលោកអាសាដ ៕
ចែករំលែកព័តមាននេះ