សិង្ហបុរី ៖ ខណៈការប្រកួតកីឡាស៊ីហ្គេមនៅប្រទេសសិង្ហបុរីឆ្នាំ២០១៥ កាន់តែខិតជិតឈានចូលមកដល់ ថ្នាក់ដឹកនាំកីឡាកម្ពុជា២រូបរួមមាន លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងលោកញ៉ាន សុខវិសាល នាយបេសកកម្មកីឡាស៊ីហ្គេមលើកទី២៨ កាលពីថ្ងៃទី២៤ វិច្ឆិកា បានទៅធ្វើទស្សនកិច្ចនៅប្រទេសសិង្ហបុរី ដើម្បីត្រួតពិនិត្យទីតាំងប្រកួតកីឡាផ្សេងៗនៅទីនោះ មុននឹងព្រឹត្តិការណ៍កីឡាថ្នាក់តំបន់អាស៊ានមួយនេះចាប់ផ្តើម ។
តាមការឱ្យដឹងពីលោកញ៉ាន សុខវិសាល ដែលកំពុងតែស្ថិតនៅទីក្រុង Singapore ប្រាប់ថា ដំណើរទស្សនកិច្ចខាងលើនេះមានរយៈពេល៤ថ្ងៃ គឺចាប់ពីថ្ងៃទី២៤ ដល់២៧ ខែវិច្ឆិកា នៅទីក្រុង Singapore ប្រទេសសិង្ហបុរី ដើម្បីចុះឈ្មោះសុំសិទ្ធិចូលរួមប្រកួត និងទីកន្លែងស្នាក់នៅ អាហារហូបចុករបស់អត្តពលិកកម្ពុជា ពេលការប្រកួតចាប់ផ្តើម ។ លោកញ៉ាន សុខវិសាល បន្តថា ក្នុងសិក្ខាសាលាដែលរៀបចំដោយម្ចាស់ផ្ទះសិង្ហបុរីស្តីពីការរៀបចំប្រកួតកីឡាស៊ីហ្គេមលើកទី២៨នេះ មន្ត្រីកីឡាកម្ពុជាមានលោកវ៉ាត់ ចំរើន និងរូបលោកផ្ទាល់បានចូលរួមតាំងពីថ្ងៃទី២៤ ខែវិច្ឆិកាមកម្ល៉េះ ។ ការចូលរួមក្នុងសិក្ខាសាលានេះ គឺដើម្បីបំពេញបែបបទចូលរួមប្រកួត និងពិនិត្យពីទីកន្លែងស្នាក់នៅ ហូបចុក និងសោហ៊ុយធ្វើដំណើររបស់ក្រុមអត្តពលិកកម្ពុជា ជាពិសេសនោះគឺប្រតិភូកីឡាក្នុងតំបន់អាស៊ានទាំងអស់ ក៏បានមកត្រួតពិនិត្យទីលានសម្រាប់ធ្វើការប្រកួតផងដែរ ។
គួរបញ្ជាក់ថា ព្រឹត្តិការណ៍កីឡាស៊ីហ្គេមលើកទី២៨ ដែលនឹងធ្វើឡើងនៅចំកណ្តាលទីក្រុង Singapore ប្រទេសសិង្ហបុរីនេះ ចាប់ផ្តើមពីថ្ងៃទី៥ ដល់១៦ ខែវិច្ឆិកា ឆ្នាំ២០១៥ខាងមុខ ដោយមានកីឡាចំនួន៣៦ប្រភេទត្រូវដាក់ឱ្យប្រកួតប្រជែង ។ កម្ពុជាត្រៀមបញ្ជូនកីឡាតែ២១ប្រភេទបុ៉ណ្ណោះទៅចូលរួម ក្នុងនោះមានកីឡាហែលទឹក អត្តពលកម្ម វាយសី ប្រដាល់ ប្រណាំងកង់ ជិះសេះ គុនដាវ បាល់ទាត់ វាយកូនគោល កាយសម្ព័ន្ធ យូដូ ប៉េតង់ បាល់ឱប សីប៉ាក់តាក្រ វាយកូនឃ្លីលើតុ ទូកប្រពៃណី ទ្រីយ៉ាត្លុង បាល់ទះ តេក្វាន់ដូ វាយកូនបាល់ និងកីឡាវូស៊ូ ។ ទោះបីក្នុងចំណោមកីឡាចំនួន២១ប្រភេទនេះមិនមានវត្តមានកីឡាចំបាប់ និងវ៉ូវីណាម ដែលជាប្រភេទកីឡាដ៏មានសក្តានុពលក្នុងការរកមេដាយឱ្យកម្ពុជាក៏ដោយ ក៏កម្ពុជានៅតែបង្ហាញពីឆន្ទៈ និងរៀបចំយុទ្ធសាស្ត្រ ក្នុងការដណ្តើមយកមេដាយជូនជាតិមាតុភូមិឱ្យទាល់តែបានផងដែរ ៕
ចែករំលែកព័តមាននេះ