រាជធានីភ្នំពេញ ៖ កម្មវិធីប្រកួតប្រដាល់របស់កំពូលអ្នកប្រយុទ្ធគុនខ្មែរវគ្គ៣ក្នុងប្រភេទទម្ងន់៦០គីឡូក្រាម នៅលើសង្វៀនទូរទស្សន៍ស៊ីធីអិន នាថ្ងៃអាទិត្យ ទី៣០ វិច្ឆិកា ស្អែកនេះ ឈានចូលដល់វគ្គពាក់កណ្តាលផ្តាច់ព្រ័ត្រហើយ ។
រាជធានីភ្នំពេញ ៖ កម្មវិធីប្រកួតប្រដាល់របស់កំពូលអ្នកប្រយុទ្ធគុនខ្មែរវគ្គ៣ក្នុងប្រភេទទម្ងន់៦០គីឡូក្រាម នៅលើសង្វៀនទូរទស្សន៍ស៊ីធីអិន នាថ្ងៃអាទិត្យ ទី៣០ វិច្ឆិកា ស្អែកនេះ ឈានចូលដល់វគ្គពាក់កណ្តាលផ្តាច់ព្រ័ត្រហើយ ។ សម្រាប់បេក្ខភាពដែលត្រូវប្រកួតនៅវគ្គនេះមាន ឈាន ហំ មកពីមជ្ឈមណ្ឌលកីឡានៃកងយោធពលខេមរភូមិន្ទ ត្រូវជួបជាមួយ ព្រីង ដារិន មកពីក្លិបខេត្តបាត់ដំបង និងចាន់ សំអាត មកពីក្លិបកងពលធំអន្តរាគមន៍លេខ៣ព្រះវិហារ ជួបជាមួយ ថៃ ប៊ុនតត មកពីក្លិបនាគរាជគុនខ្មែរ ។
រវាង ឈាន ហំ និង ព្រីង ដារិន សុទ្ធតែជាអ្នកប្រដាល់ជើងខ្លាំងដូចគ្នា មុននឹងពួកគេឈានមកដល់ដំណាក់កាលនេះ គឺធ្លាប់ផ្តួលគូប្រកួតឱ្យចាញ់នៅក្រោមកណ្តាប់ដៃរបស់គេអស់មិនតិចនាក់ឡើយ ។ លើកនេះភាគីទាំងសងខាងសុទ្ធតែត្រូវការឈ្នះដើម្បីសម្រេចមហិច្ឆតាឡើងទៅប្រកួតនៅវគ្គផ្តាច់ព្រ័ត្រដណ្តើមចំណាត់ថ្នាក់លេខ១ដូចគ្នា គ្រាន់តែពួកគេមិនហា៊នអះអាងទុកមុនពីលទ្ធផលចាញ់-ឈ្នះប៉ុណ្ណោះ ។ តាមពិតគូនេះសុទ្ធតែជាអ្នកប្រដាល់ចាស់វស្សាដូចគ្នា និងធ្លាប់ចូលរួមប្រកួតក្នុងកម្មវិធីកំពូលអ្នកប្រយុទ្ធគុនខ្មែរច្រើនលើករួចមកហើយ ។ បើធ្វើការប្រៀបធៀបវិជ្ជាគុនអ្នកទាំង២ឃើញថា ល្អម្យា៉ងម្នាក់ ។ ឈាន ហំ ចូលចិត្តវាយប្រយោលច្រើនជាងចូលកៀក ហើយចលនាវាយចេញក៏រហ័សរហួនណាស់ដែរ ។ ប៉ុន្តែបើចូលកៀកគឺចាញ់ ព្រីង ដារិន ហើយដោយសារកីឡាកររូបនេះមានកម្លាំងខ្លាំងជាង និងពូកែខាងចាប់បោកផ្តួលទៀតផង ។ ដូច្នេះគូនេះពិបាកធ្វើការសន្និដ្ឋានទុកមុនពីលទ្ធផលចាញ់ឈ្នះខ្លាំងណាស់ មានតែរង់ចាំមើលការប្រកួតជាក់ស្តែងប៉ុណ្ណោះ ទើបអាចដឹងបាន ។
ចំណែកជំនួបប្រកួតរវាង ចាន់ សំអាត និងថៃ ប៊ុនតត វិញ នោះ ក៏ពិបាកវាយតម្លៃទុកមុនពីលទ្ធផលចាញ់ឈ្នះដែរ ។ ចាន់ សំអាត ធ្លាប់ឆ្លងកាត់ការប្រកួតប្រហាក់ប្រហែលនឹង ថៃ ប៊ុនតត ប៉ុន្តែគេមានល្បិចប្រកួតនៅលើសង្វៀនល្អជាង ។ ចាន់ សំអាត មិនត្រឹមតែជាអ្នកប្រដាល់ដែលមានស្នៀតប្រយុទ្ធល្អប៉ុណ្ណោះនោះទេ បើនិយាយពីចិត្តវិញនោះកាន់តែសឿងថែមទៀត តែចរិត ចាន់ សំអាត មិនចេះអួតក្អេងក្អាងឡើយ ។ ម្យា៉ងវិញទៀតនោះ គេតែងតែចាត់ទុកគូប្រកួតគឺជាអ្នកខ្លាំងជានិច្ច ដូច្នេះការមកប៉ះ ថៃ ប៊ុនតត លើកនេះ ចាន់ សំអាត មិនហា៊នធ្វេសប្រហែសទេ ។ ឯ ថៃ ប៊ុនតត វិញនោះ ក៏ធ្លាប់មានប្រវត្តិប្រកួតនៅលើសង្វៀនមិនតិចដងដែរ និងត្រូវបានគេចាត់ទុកជាជើងខ្លាំងមួយរូបទៀតផង ។ ដូច្នេះ ថៃ ប៊ុនតត កាន់តែមិនអាចមើលស្រាលថែមទៀត ម្យា៉ងវិញទៀតកីឡាកររូបនេះពូកែខាងចូលកៀក និងចាប់បោក អ្នកណាក៏ដោយបើហា៊នបណ្តោយឱ្យគេចាប់បានហើយនោះគឺមិនងាយរួចខ្លួនឡើយ ។
ក្រៅពីគូដណ្តើមខ្សែក្រវាត់២គូនេះទៅ នៅលើសង្វៀនដដែលក៏មានការប្រកួតលក្ខណៈមិត្តភាពជាច្រើនគូទៀត ដូចជា ណាម ម៉ូរិន មកពីក្លិបពន្លឺសាមគ្គីខេត្តបាត់ដំបង ប្រកួតជាមួយ ចាន់ សំអាង មកពីក្លិបកងពលធំអន្តរាគមន៍លេខ៣ព្រះវិហារ ។ រីគី ណារ័ត្ន មកពីក្លិបខ្លារខិនមានឫទ្ធិ ប្រកួតជាមួយ ច្រិច កុសល មកពីក្លិបខេត្តត្បូងឃ្មុំ និង គុជ ពិសិដ្ឋ មកពីមជ្ឈមណ្ឌលកីឡានៃកងយោធពលខេមរភូមិន្ទ ប្រកួតជាមួយ ធី រតនា មកពីក្លិបខេត្តកណ្តាល ៕
ចែករំលែកព័តមាននេះ