ការជ្រើសយកម៉ូតូជាមធ្យោបាយធ្វើដំណើរផ្លូវឆ្ងាយក៏ដូចជាទៅលេងស្រុកកំណើតក្នុងឱកាសនៃពិធីបុណ្យប្រពៃណីធំៗ ឬថ្ងៃឈប់សម្រាកប្រចាំសប្តាហ៍ គឺជារឿងមួយដែលតម្រូវឱ្យអ្នកបើកបរផ្ទាល់ចេះថ្លឹងថ្លែង និងធ្វើកិច្ចការនោះដោយការយកចិត្តទុកដាក់បំផុតមុននឹងបញ្ឆេះម៉ូតូចេញដំណើរ ។ ក្នុងនោះអ្នកកាន់ចង្កូតចាំបាច់ត្រូវតែត្រៀមខ្លួនជាមុនលើកិច្ចការផ្សេងៗ ដើម្បីធានាបាននូវសុខសុវត្ថិភាពពេញលេញ និងដល់គោលដៅដោយជោគជ័យ ។
ខាងក្រោមនេះ គឺជាភារកិច្ចដែលគួរអនុវត្តមុននឹងចេញដំណើរ៖
១-ទុកដាក់ឬត្រៀមម្ហូបអាហារនំចំណី ក៏ដូចជាគ្រឿងបន្លាស់មួយចំនួន សម្រាប់ផ្គត់ផ្គង់ឬដោះស្រាយតាមផ្លូវ ។
២-ត្រួតពិនិត្យម៉ូតូរបស់អ្នកដោយការប្រយ័ត្នប្រយែងបំផុត ប្រសិនជាអ្វីៗវាពុំមានដំណើរការរលូនទេនោះ គឺយកម៉ូតូរបស់អ្នកចូលជាងឱ្យជួសជុល ឬស្រឿស្រាញជាមុនសិនមុនចេញដំណើរ ។ ក្នុងនោះត្រូវច្បាស់ថា សម្ពាធខ្យល់ក្នុងកង់ទាំងទ្វេត្រឹមត្រូវហើយប្រេងម៉ូតូក៏គ្រប់គ្រាន់នឹងដល់គោលដៅដូចបំណង ។ រីឯហ្វ្រាំងនិងចង្កឹះលេខ ក៏អត់បញ្ហាគឺមានភាពប្រក្រតីដូចសព្វមួយដង ។
៣-ធ្វើការជួសជុលភ្លាម ប្រសិនបើចាំបាច់ចៀសវាងខូចពាក់កណ្តាលផ្លូវ ដែលញ៉ាំងឱ្យកើតមាននូវក្តីសៅហ្មង ក្នុងពេលធ្វើដំណើរ ។ ដូចសម្តីមួយឃ្លាដែលលើកទ្បើងថា «សប្បាយក្លាយជាទុក្ខ» ។
៤-ត្រៀមទុកនូវថ្នាំសង្កូវមួយចំនួន បង្ការក្រែងជួបឧប្បត្តិហេតុណាមួយ នៅតាមផ្លូវដែលបណ្តាលឱ្យរលាត់ដៃជើងជាដើម ។ ដើម្បីធានាបាននូវប្រសិទ្ធភាព សុវត្ថិភាពពេញលេញចូរពាក់មួកការពារសុវត្ថិភាពឱ្យបានត្រឹមត្រូវនិងទៀងទាត់ពេលបើកបរទាំងអ្នកកាន់ចង្កូតនិងអ្នករួមដំណើរ ៕
ចែករំលែកព័តមាននេះ