យោងតាមគេហទំព័របរទេស RT ចេញ ផ្សាយកាលពីពេល ថ្មីៗនេះឱ្យដឹងថា ក្រុមហ៊ុនសំណង់ជប៉ុន Shimizu Corp គ្រោងបង្កើត ទីក្រុងក្រោមបាតសមុទ្រមានឈ្មោះថា Ocean Spiral នៅឆ្នាំ២០៣០ ។ ទីក្រុងនោះអាចផ្ទុកមនុស្សបាន ៥.០០០ នាក់ ព្រមទាំងអាចផលិតថាមពលចេញពីប្រភពទឹកសមុទ្រទៀតផង ។
Ocean Spiral រចនាឡើងជារាងស្ពីរ៉ុល (រង្វង់មូលរ៉ឺស៊័រ) និងចេញប្លង់គំរូដោយអ្នកស្រាវជ្រាវនៅសាកលវិទ្យាល័យទីក្រុងតូក្យូ, ទីភ្នាក់ងារជប៉ុនផ្នែកវិទ្យាសាស្ត្រសមុទ្រ និងទីភ្នាក់ងារស្រាវជ្រាវជលផលរបស់រដ្ឋាភិបាលជប៉ុន ។
Ocean Spiral ចែកចេញជា៣ផ្នែក ធំៗគឺសំណង់ផ្ទៃមុខកាត់ខាងលើសាងសង់ឡើងក្នុងកម្ពស់៥០០ម៉ែត្រជារាងមូលដូចរឺុស៊័រ, ចំណុចកណ្តាលរបស់វាមានប្រវែងបណ្តោយ១៥ គីឡូម៉ែត្រ រួមមានទីកន្លែងសម្រាប់ប្រកបអាជីវកម្ម, តំបន់រស់នៅ និងសណ្ឋាគារល្អប្រណីត ។ ចំណែកផ្ទៃខាងក្រោមមានប្រវែងចាប់ពី ៣.០០០ ទៅ ៤.០០០ ម៉ែត្រស្ថិតក្រោមបាតសមុទ្រដែលនឹងតភ្ជាប់ជាមួយក្រុមហ៊ុន earth-factory ជាមជ្ឈមណ្ឌលស្រាវជ្រាវបង្កើតប្រភពថាមពល ។ ក្រុមហ៊ុន Shimizu Corp នឹងប្រើប្រាស់បច្ចេកវិទ្យាឧស្សាហកម្ម 3D បង្កើតសំណង់អគារនេះជំនួសបេតុង ។ សំណង់អគារក្រោមបាតសមុទ្រនេះនឹងជួយសង្គ្រោះអ្នករស់នៅលើកោះពីការកើនឡើងរបស់នឺវ៉ូទឹកសមុទ្រផងដែរ។ ក្រុមហ៊ុនឱ្យដឹងថា ការសាងសង់នឹងចំណាយប្រាក់ប្រមាណជាង ២៥,៦ ពាន់លានដុល្លារ និងប្រើពេល៥ឆ្នាំ ។
ការសាងសង់ទីក្រុងក្រោមបាតសមុទ្រនេះត្រូវអ្នកជំនាញផ្នែកសំណង់អគារអះអាងថា អាចគេចផុតពីការបំផ្លិចបំផ្លាញដោយធម្មជាតិដូចជា រលកយក្សស៊ូណាមី និងរញ្ជួយដីជាដើម ៕
ចែករំលែកព័តមាននេះ