រាជធានីភ្នំពេញ ៖ ការធ្លាក់ចុះយ៉ាងគំហុកនៃប្រាក់ចំណូលរបស់រោងចក្រ Grand Twins International (GTI) នៅឆ្នាំនេះ គឺជាការព្រមានដល់ឧស្សាហកម្មកាត់ដេរ ក៏ដូចជាដល់រាជរដ្ឋាភិបាលឲ្យបានឃើញថា បាតុកម្មជាបន្តបន្ទាប់ ការដំឡើងប្រាក់ឈ្នូលអប្បបរមា និងការបន្តទាមទារលក្ខខណ្ឌការងារផ្សេងៗ ពីសំណាក់សហជីព កំពុងតែជះឥទ្ធិពលអវិជ្ជមានយ៉ាងជាក់ស្ដែង ។
រាជធានីភ្នំពេញ ៖ ការធ្លាក់ចុះយ៉ាងគំហុកនៃប្រាក់ចំណូលរបស់រោងចក្រ Grand Twins International (GTI) នៅឆ្នាំនេះ គឺជាការព្រមានដល់ឧស្សាហកម្មកាត់ដេរ ក៏ដូចជាដល់រាជរដ្ឋាភិបាលឲ្យបានឃើញថា បាតុកម្មជាបន្តបន្ទាប់ ការដំឡើងប្រាក់ឈ្នូលអប្បបរមា និងការបន្តទាមទារលក្ខខណ្ឌការងារផ្សេងៗ ពីសំណាក់សហជីព កំពុងតែជះឥទ្ធិពលអវិជ្ជមានយ៉ាងជាក់ស្ដែង ។ នេះបើយោងតាមមន្ត្រីអ្នកនាំពាក្យសមាគមរោងចក្រកាត់ដេរនៅកម្ពុជា ដែលបានលើកឡើងកាលពីថ្ងៃអង្គារ ។
នៅក្នុងឯកសារហិរញ្ញវត្ថុដែលបានផ្សព្វផ្សាយកាលពីសប្ដាហ៍មុន រោងចក្រ GTI បានចេញរបាយការណ៍អំពីការធ្លាក់ចុះនូវប្រាក់ចំណូលរហូតដល់ទៅ៤០ភាគរយនៅក្នុងត្រីមាសទីបីនៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ខណៈដែលប្រាក់ចំណូលសរុបក្នុងរយៈកាល៩ ខែដំបូងនៃឆ្នាំ២០១៤នេះ បានធ្លាក់ចុះ៨ភាគរយ បើធៀបនឹងរយៈកាលដូចគ្នាកាលពីឆ្នាំ២០១៣ ។ រោងចក្របានស្ដីបន្ទោសថា ការធ្លាក់ចុះប្រាក់ចំណូល គឺដោយសារតែការធ្វើបាតុកម្ម ដែលបានបង្កអស្ថិរភាពធ្ងន់ធ្ងរមកលើឧស្សាហកម្មកាត់ដេរនៅកម្ពុជា ដែលបង្ខំឲ្យអ្នកបញ្ជាទិញងាកទៅរករោងចក្រនៅក្នុងប្រទេសផ្សេងវិញ ។
អគ្គលេខាធិការសមាគមរោងចក្រកាត់ដេរនៅកម្ពុជា (GMAC) លោក ខេន លូ បានមានប្រសាសន៍ថា រោងចក្រ GTI ត្រូវបានចុះបញ្ជីនៅក្នុងផ្សារភាគហ៊ុនកម្ពុជា ។ GTI ជារោងចក្ររឹងមាំ មានប្រវត្តិយូរឆ្នាំ និងមានការជឿទុកចិត្តពីសំណាក់អ្នកបញ្ជាទិញ ។ ប្រសិនបើរោងចក្រមួយនេះរងផលប៉ះពាល់បែបនេះទៅហើយ ចុះរោងចក្រផ្សេងទៀតដែលមានមូលដ្ឋានហិរញ្ញវត្ថុមិនសូវជារឹងមាំដូចរោងចក្រនេះ តើយើងអាចរំពឹងថានឹងទៅជាយ៉ាងណាវិញ ។ កាលពីសប្ដាហ៍មុន GMAC បានអំពាវនាវសុំឲ្យមានប្រព័ន្ធពន្ធថ្មី ដើម្បីជួយដល់ការរស់រាននៃឧស្សាហកម្មកាត់ដេរ បន្ទាប់ពីរាជរដ្ឋាភិបាលបានប្រកាសដំឡើងប្រាក់ឈ្នួលអប្បបរមាដល់ ១២៨ ដុល្លារក្នុងមួយខែ គិតចាប់ពីខែមករាឆ្នាំក្រោយនេះទៅ ។
GMAC បាននិយាយថា ការដំឡើងប្រាក់ឈ្នួលនេះនឹងធ្វើឲ្យការចំណាយលើប្រាក់ឈ្នួលដល់កម្មករក្នុងឧស្សាហកម្មកាត់ដេរទាំងមូល ដែលផ្ដល់ការងារធ្វើដល់មនុស្សជាង៦០ម៉ឺននាក់ កើនឡើងជាង២០០លានដុល្លារបន្ថែមទៀត នៅឆ្នាំ២០១៥ ។ នៅឆ្នាំក្រោយនេះ ឧស្សាហកម្មកាត់ដេរ ក៏ត្រូវចំណាយប្រមាណ២០លានដុល្លារបន្ថែមទៀតផងដែរ សម្រាប់ទូទាត់លើការធានារ៉ាប់រងសុខភាពរបស់កម្មកររោងចក្រ ក្រោមរបបសន្តិសុខសង្គមថ្មី ។ លោក ខេន លូ បានមានប្រសាសន៍ថា នៅក្នុងឧស្សាហកម្មដែលធម្មតាមានដំណើរការ ដោយទទួលប្រាក់ចំណេញចន្លោះពី២ទៅ ៥ភាគរយ ទោះបីអ្នកមិនមែនជាសេដ្ឋវិទូក៏ដោយ ក៏អ្នកអាចយល់បានដែរ ថាតើការចំណាយជាង២០០លានដុល្លារបន្ថែម នឹងប៉ះពាល់យ៉ាងណាដល់ឧស្សាហកម្ម ដែលបានរងផលប៉ះពាល់រួចទៅហើយពីការធ្វើបាតុកម្មនៅឆ្នាំនេះ ។ ជាមួយគ្នានេះ សូមកុំភ្លេចថា សហជីពថែមទាំងចង់ឲ្យដំឡើងប្រាក់ឈ្នួលអប្បបរមាដល់ទៅ១៧៧ដុល្លារថែមទៀតផង ។
លោក ខេន លូ ក៏បានមានប្រសាសន៍ទៀតថា តើស្ថាប័ន អង្គការដែលទាមទារឲ្យដំឡើងប្រាក់ឈ្នួលបែបនេះ នឹងអាចជួយដល់កម្មករបានដែរឬទេ នៅពេលដែលកម្មកររងផលប៉ះពាល់ដោយសារតែការបញ្ជាទិញត្រូវបានលុបចោល មិនសូវមានការងារបន្ថែមម៉ោង ហើយរោងចក្រចាប់ផ្ដើមកាត់បន្ថយផលិតកម្មនោះ ?
ចែករំលែកព័តមាននេះ