រាជធានីភ្នំពេញ ៖ កម្លាំងសមត្ថកិច្ចខណ្ឌពោធិ៍សែនជ័យ ដែលដឹកនាំដោយលោក យឹម សារ៉ាន់ អធិការនគរបាលខណ្ឌ បានធ្វើការចុះល្បាតតាមមូលដ្ឋានឃាត់ខ្លួនបានជនសង្ស័យ២នាក់ និងរឺុម៉កម៉ូតូមួយគ្រឿង កាលពីវេលាម៉ោង១០យប់ ថ្ងៃទី២៦ វិច្ឆិកា ២០១៤ នៅចំណុចផ្លូវបេតុង ក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានបានឱ្យដឹងថា នៅមុនពេលឃាត់ខ្លួនបានជនសង្ស័យពីរនាក់នោះ គឺកម្លាំងសមត្ថកិច្ចខណ្ឌពោធិ៍សែនជ័យ ដែលគេដឹងថាដឹកនាំដោយលោកអធិការខណ្ឌតែម្តង បានចុះល្បាតតាមមូលដ្ឋានដេញចាប់មុខសញ្ញាជនសង្ស័យ ដែលសកម្មខាងលួច-ប្លន់ ។ ខណៈកម្លាំងសមត្ថកិច្ចកំពុងធ្វើដំណើរល្បាតនោះ ក៏បានប្រទះឃើញរឺុម៉កម៉ូតូមួយគ្រឿងប្លុងចោលនៅជាប់ផ្លូវបេតុងស្ងាត់មួយកន្លែង ហើយពេលនោះក៏ប្រទះឃើញជនសង្ស័យពីរនាក់ កាន់ដបសាំងនៅក្នុងដៃ ធ្វើឱ្យកម្លាំងសមត្ថកិច្ចមានការសង្ស័យ ក៏បានដេញចាប់ឃាត់ខ្លួនបានពីរនាក់ ហើយរឺុម៉កម៉ូតូដែលកម្លាំងសមត្ថកិច្ចល្បាតប្រទះឃើញខាងលើគឺជារឺុម៉កម៉ូតូដែលប្រជាពលរដ្ឋបាត់កាលពីល្ងាចម្សិលមិញ ។
ក្រោយពេលឃាត់ខ្លួនជនសង្ស័យទាំងពីរនាក់ត្រូវបានកម្លាំងសមត្ថកិច្ចបញ្ជូនទៅសួរនាំ និង កសាងសំណុំរឿងនៅប៉ុស្តិ៍នគរបាលរដ្ឋបាលចោមចៅ ដើម្បីចាត់ការតាមនិតិវិធីច្បាប់ ។
ចែករំលែកព័តមាននេះ