រាជធានីភ្នំពេញ ៖ ចុងបញ្ចប់នៃសង្គ្រាមពាក្យសម្ដីដែលបានផ្ទុះឡើងនៅលើបណ្តាញសង្គមហ្វេសប៊ុក កីឡាករ វ៉ន វីវ៉ា បានប្រកាសជំហរចុងក្រោយថា មិនធ្វើការប្រកួតជាមួយកីឡាករ សេន ប៊ុនថេន នោះទេ តបនឹងការសុំប្រកួតគ្នាមួយលើកចុងក្រោយ ដើម្បីកំណត់ថា អ្នកណាអន់ និងខ្លាំង ។ ជំហរមួយនេះ នៅមិនទាន់បានទទួលប្រតិកម្មពីមន្ត្រីសហព័ន្ធនៅឡើយទេ ប៉ុន្តែរវាងពួកគេនឹងអាចមិនបានប្រកួតគ្នាតាមការចង់បាន ដើម្បីកុំឲ្យការប្រកួតក្លាយជាសង្គ្រាមសម្លាប់គ្នានៅលើរេញ ។
ទោះជាកីឡាករទាំងពីរ ប្រឹងទាញទឡ្ហីករណ៍យកត្រូវរៀងខ្លួន ក្រោយពីការផ្ទុះសង្គ្រាមពាក្យសម្ដីនោះក៏ដោយ ក៏កីឡាករ សេន ប៊ុនថេន និង វ៉ន វីវ៉ា មិនអាចលុបលាងនូវភាពអាម៉ាស់ដែលបានបង្កពីការចំអកឡកឡាយដាក់គ្នានេះទេ។ អ្នកខ្លះ បានទាំងយល់ថា អ្នកទាំងពីរចាស់ៗអស់ហើយ ហើយក៏ជាកីឡាករល្បីឈ្មោះទៀត ប៉ុន្តែមកធ្វើដូចកូនក្មេង បន្ទាប់ពីយកបណ្តាញសង្គម Facebook ធ្វើជាទីលានវាយប្រហារគ្នាជាសាធារណៈ ។ សង្គ្រាមដែលបានកើតឡើងនេះ ផុសចេញពីការបង្ហោះសារវាយប្រហាររបស់ វ៉ន វីវ៉ា ទៅកាន់ សេន ប៊ុនថេន បន្ទាប់ពី សេន ប៊ុនថេន ចាញ់ក្រោមដៃកីឡាករបារាំង Antoine Pinto ជាលើកទី២ នៅក្នុងប្រទេសថៃ ។ សាររបស់ វ៉ន វីវ៉ា បានដុតកំដៅបេះដូងឲ្យ សេន ប៊ុនថេន ផ្ទុះចេញនូវការបង្ហោះសារភា្លមៗ ដោយមានទាំងភរិយាទាំងសងខាងធ្វើជាគូភាគីបង្ហោះសារកាន់ជើងប្តីរៀងៗខ្លួននោះផង។
វ៉ន វីវ៉ា បានសរសេរនៅលើគណនីហ្វេសប៊ុករបស់ខ្លួនថា «ចាស់ថាកុំអួតពេក ចាញ់គឺវាអញ្ចឹង ហាហា ខ្លាំងទៀតទៅអាប្អូន! ស្តាយណាស់ បើដឹងថាឯងអញ្ចឹងនោះ បងមិនទុកឲ្យបាន៥ទឹកទេ ។ ៤ទឹកមិនទាន់ទេ គឺអាប្អូនសុំបង (កុំវ៉ៃពេក ជួយគ្នាឲ្យបានចប់ទឹកផង នេះជាពាក្យរបស់ សេន ប៊ុនថេន) សុំទោសបងប្អូន ខ្ញុំមិនគួរនិយាយពាក្យទាំងនេះទេ តែគាត់ធ្លាប់ថា ឲ្យរូបខ្ញុំខ្លាំងៗពេក (ឥឡូវខ្ញុំចង់ឲ្យ សេន ប៊ុនថេន បានឮថា ខ្ញុំនេះនិយាយពិតឬទេ0x017d7 ចេញពីមាត់របស់គាត់) អ្នកចង់ដាក់៨.០០០$ មកសម្រាប់អ្នកឈ្នះ តែ៨០$ សម្រាប់អ្នកចាញ់ ហ៊ានទេ (សម្រាប់អ្នកពូកែនិយាយថាឲ្យគេនោះ» ។ ខ្លឹមសាររបស់លោកបង្ហាញយ៉ាងច្បាស់ថា នៅពីក្រោយហេតុផលដែល សេន ប៊ុនថេន តតាំងជាមួយខ្លួនដល់ទឹកទី៥កន្លងមក គឺដោយសារតែសេន ប៊ុនថេន សុំកុំឲ្យលោកវាយខ្លាំងពេក ។ អញ្ចឹងទើបអ្នកបានឃើញសារទាំងនេះភាគច្រើនយល់ថា វ៉ន វីវ៉ា ជាអ្នកវាយប្រហារផ្លូវចិត្ត និងមាក់ងាយចំពោះមិត្តរួមអាជីព ដែលបញ្ហានេះមិនគួរដល់ថ្នាក់ហែកហួរជាសាធារណៈនោះទេ ។ យោងតាមប្រវត្តិប្រកួត កីឡាករទាំងពីរ ធ្លាប់ប៉ះគ្នា៩លើក ដោយ៨លើក វ៉ន វីវ៉ា ជាអ្នកឈ្នះ និងមួយលើក សេន ប៊ុនថេន ជាអ្នកឈ្នះ។ ទំនងជាមុននេះ អ្នកទាំងពីរបានផ្ទុះឡើងនូវសង្គ្រាមពាក្យសម្ដីឌឺដងគ្នារួចមកហើយ ទើបឈានដល់ វ៉ន វីវ៉ា បង្ហោះសារសើចចំអក ។
តបទៅកាន់ វ៉ន វីវ៉ា សេន ប៊ុនថេន សរសេរថា «ម្ចាស់ខ្សែក្រវាត់ ISKA ដូចជាចេះដឹងគួរសមដែរ ឯឈ្មោះក៏ល្បី ចុះហេតុអីបានជាសម្តីចេញមកដូចជាមនុស្សមិនដែលចូលសាលា… ខ្ញុំដូចជាមិនព្រឺក្នុងរឿងនេះដែរ ។ បើខ្លួនឯងគ្រាន់បើមែននោះ ហ៊ានដាក់ខ្សែក្រវាត់ ISKA ដែលមួយជីវិតបានតែមួយនេះទេ0x017d7 បើហ៊ានដាក់ថ្ងៃកំណត់នៅឆ្នាំ២០១៥ ខ្ញុំស្វាគមន៍ម្ចាស់ខ្សែក្រវាត់ ISKA ជានិច្ច ។ ខ្ញុំឲ្យដាក់ពេលកំណត់នេះ ពីព្រោះខ្ញុំមានកម្មវិធីប្រកួតនៅក្រៅប្រទេសច្រើនដែលគេមករកខ្ញុំ ព្រោះថា ខ្ញុំបាទ សេន ប៊ុនថេន មិនមែនជាកង្កែបក្នុងអណ្តូងដូចម្ចាស់ខ្សែក្រវាត់ ISKA ទេ» ។ បន្ថែមពីលើសាររបស់អ្នកទាំងពីរ គេឃើញអ្នកនាង ខាន់ សោភ័ណ្ឌ ភរិយារបស់លោក សេន ប៊ុនថេន និងអ្នកនាង ស៊ន ដាវីន ភរិយាថ្មោងថ្មីរបស់លោក វ៉ន វីវ៉ា ក៏បង្ហោះសារឌឺគ្នាផងដែរ ដើម្បីកាន់ជើងស្វាមីរៀងខ្លួន ។
មកទល់ពេលនេះ សង្គ្រាមពាក្យសម្ដីរបស់ពួកគេ បានទទួលនូវការរិះគន់យ៉ាងខ្លាំង ក្នុងពេលដែលពួកគេសុទ្ធតែជាកីឡាករដែលមានប្រជាប្រិយភាពខ្ពស់នៅក្នុងប្រទេស ហើយបែរជាផ្ទុះសង្គ្រាមពាក្យសម្ដីដាក់គ្នា ធ្វើឲ្យអាប់ឱនដល់វិស័យប្រដាល់ ។ នៅក្នុងគណនីហ្វេសប៊ុកជាច្រើន បានចោទថា វ៉នវីវ៉ា ជាមនុស្សអំនួត បន្ទាប់ពីបានឃើញសារមិនសមរម្យរបស់លោកបង្ហោះឡើង ដែលអត្ថន័យស្ទើរទាំងអស់ គឺមានន័យមាក់ងាយដល់ សេន ប៊ុនថេន ។ ក្រុមអ្នកលេង Facebook យល់ថា ទោះជាមានរឿងអន់ចិត្តគ្នាដល់កម្រិតណា ក៏មិនគួរហែកហួរគ្នាជាសាធារណៈតាមហ្វេសប៊ុកដែរ ដោយសារតែពួកគេជាបុគ្គលសាធារណៈ ដែលមិនមែនជាជនសាមញ្ញ ។ ការចំអករបស់វ៉ន វីវ៉ា ត្រូវគេចោទថា មានន័យបញ្ឆេះសង្គ្រាមចំពោះមិត្តរួមអាជីព និងបង្ហាញនូវការបាក់បែកដ៏ធ្ងន់ធ្ងរ នៅក្នុងវិស័យប្រដាល់ខ្មែរ ។
នៅចុងបញ្ចប់នៃការបង្ហោះសារ វ៉ន វីវ៉ា សរសេរថា មិនធ្វើការប្រកួតជាមួយ សេន ប៊ុនថេន ទៀតទេ ដែលអត្ថន័យនេះ គឺមានន័យចង់បញ្ចប់សង្គ្រាមកុំឲ្យវែងឆ្ងាយ ប៉ុន្តែអ្វីដែលធ្វើឲ្យលោកនៅតែទទួលនូវការរិះគន់ គឺឃ្លាបន្ទាប់ ដែលសរសេរថា មិនចង់ប្រកួតជាមួយកីឡាករដែលចាញ់ច្រើនដូច សេន ប៊ុនថេន នោះទេ ។ វ៉ន វីវ៉ា ធ្លាប់រងការរិះគន់ច្រើនលើកមកហើយរឿងវាយឫក និងក្រអឺតក្រទមដាក់អ្នកកាសែត និងគ្រប់ពេលសុំសម្ភាសន៍ក្នុងពេលល្បីខ្លាំង ។ អញ្ចឹងហើយ ទើបការបញ្ចេញពាក្យសម្ដីបញ្ឆេះកំហឹងទៅកាន់ សេន ប៊ុនថេន នាពេលនេះ ត្រូវគេទម្លាក់កំហុសថា ជារឿងមិនគួរធ្វើ និងបណ្ដាលឲ្យអ្នកគាំទ្រខកចិត្ត ។ នៅលើបណ្ដាញសង្គមហ្វេសប៊ុកខ្លះ បានប្រើពាក្យថា «យ៉ាប់!» ទៅកាន់ វ៉ន វីវ៉ា ព្រមជាមួយនឹងសំណេរមិនសមរម្យជាច្រើនទៀត។ ក្នុងនោះក៏មានការបង្ហោះសារចំអកទៅលោកវិញថា បើអួតខ្លាំង ហេតុអ្វីមិនប្រកួតជាមួយ សេន ប៊ុនថេន ម្ដងទៀត ព្រោះអតីតកាលមិនប្រាកដថាដដែលៗទេ?
ប្រភពពីមន្ត្រីបម្រើការនៅក្នុងសហព័ន្ធកីឡាប្រដាល់កម្ពុជា ដែលជាអ្នករៀបចំការផ្គូផ្គង បានបង្ហើបថា រវាង វ៉ន វីវ៉ា និងសេន ប៊ុនថេន ទំនងមិនអាចឲ្យប្រកួតគ្នានោះទេ ដោយសារតែកីឡាករទាំងពីរ ស្ថិតក្នុងទីលានជាសត្រូវនឹងគ្នាបែបនេះ ។ លោកបញ្ជាក់ដោយមិនឲ្យដាក់ឈ្មោះថា ប្រដាល់គឺជាកីឡាមិត្តភាព មិនមែនជាសង្វៀនកាប់សម្លាប់គ្នាទេ អញ្ចឹង បើអ្នកណាចង់ចងអាឃាតគ្នា គឺយើងមិនឲ្យប៉ះគ្នា ដើម្បីកុំឲ្យកើតមានគ្រោះថ្នាក់ ។ សហព័ន្ធបានសន្យាថានឹងកោះហៅពួកគេណែនាំ ជាពិសេស លើករណីវ៉ន វីវ៉ា ដើម្បីឲ្យលោកមានការទទួលខុសត្រូវ និងចេះប្រើប្រាស់ពាក្យសម្ដី ក៏ដូចជាឥរិយាបថឲ្យបានសមរម្យជាថ្មី ។ សង្គ្រាមពួកគេក្នុងរង្វង់កីឡាករ ក៏បន្ទោសទៅលើភាគីទាំងពីរផងដែរ ជាពិសេសទៅលើ វ៉ន វីវ៉ា ដែលជាអ្នកបង្កជម្លោះមុន ។ ទំនាស់បែកផ្សែងជាសំណេរនេះ ត្រូវគេឃើញស្ងប់ស្ងាត់ជាងមុន បន្ទាប់ពីមានការរិះគន់ខ្លាំងៗពីបុគ្គលស្ថិតក្នុងវិស័យប្រដាល់ និង ក្រុមអ្នកលេងហ្វេសប៊ុក ហើយទំនងមិនជាពិបាកផ្សះផ្សារពួកគេទេ ៕
ចែករំលែកព័តមាននេះ