រាជធានីភ្នំពេញ ថ្ងៃទី២៥ វិច្ឆិកា ឆ្នាំ២០១៤ ៖ ធនាគារអភិវឌ្ឍន៍អាស៊ី ហៅកាត់ថា ADB បានអនុម័តលើកម្ចីចំនួន១៨លានដុល្លារ សម្រាប់សាងសង់ចំណតកំពង់ផែទេសចរណ៍ និងហេដ្ឋារចនាសម្ព័ន្ធមួយចំនួនទៀតនៅខេត្តកំពត ភាគខាងត្បូងនៃប្រទេសកម្ពុជា ដើម្បីបង្កើតឱ្យមានឱកាសថ្មីៗសម្រាប់វិស័យទេសចរណ៍
រាជធានីភ្នំពេញ ថ្ងៃទី២៥ វិច្ឆិកា ឆ្នាំ២០១៤ ៖ ធនាគារអភិវឌ្ឍន៍អាស៊ី ហៅកាត់ថា ADB បានអនុម័តលើកម្ចីចំនួន១៨លានដុល្លារ សម្រាប់សាងសង់ចំណតកំពង់ផែទេសចរណ៍ និងហេដ្ឋារចនាសម្ព័ន្ធមួយចំនួនទៀតនៅខេត្តកំពត ភាគខាងត្បូងនៃប្រទេសកម្ពុជា ដើម្បីបង្កើតឱ្យមានឱកាសថ្មីៗសម្រាប់វិស័យទេសចរណ៍ បន្ថែមពីលើទិសដៅទេសចរណ៍ ដែលកំពុងពេញនិយមនាពេលបច្ចុប្បន្ន ដូចជាប្រាសាទអង្គរវត្ដដ៏ល្បីល្បាញជាដើម ។
លោក Eric Sidgwick នាយកធនាគារអភិវឌ្ឍន៍អាស៊ីប្រចាំប្រទេសកម្ពុជា មានប្រសាសន៍ថា «ការអភិវឌ្ឍកំពង់ផែសម្រាប់អ្នកដំណើរនេះ នឹងគាំទ្រឱ្យមានកំណើនវិស័យទេសចរណ៍នៅតំបន់ឆ្នេរភាគខាងត្បូង និងជួយបង្កើតឱ្យមានច្រកថ្មីមួយរវាងតំបន់ភាគខាងត្បូងនៃប្រទេសកម្ពុជា ប្រទេសវៀតណាម និងតំបន់ទេសចរណ៍ផ្សេងទៀត នៅក្នុងឈូងសមុទ្រថៃ» ។ វិស័យទេសចរណ៍កំពុងតែមានការរីកចម្រើននៅក្នុងប្រទេសកម្ពុជា ជាមួយនឹងចំនួនភ្ញៀវទេសចរច្រើនជាង៤,២លាននាក់នៅក្នុងឆ្នាំ២០១៣ ។ ឧស្សាហកម្មនេះផ្ដល់ការងារប្រមាណជា៨០ម៉ឺនការងារ និងរួមចំណែកចំនួន១២% នៃផលិតផលក្នុងស្រុកសរុបរបស់ប្រទេសកម្ពុជា ។ ប៉ុន្ដែវិស័យទេសចរណ៍ និង ប្រយោជន៍នានាក្នុងវិស័យនេះ ភាគច្រើនប្រមូលផ្ដុំតែនៅក្នុងខេត្ដសៀមរាប និងតំបន់ប្រាសាទអង្គរវត្ដ ។ កង្វះហេដ្ឋារចនាសម្ព័ន្ធគមនាគមន៍នៅតាមតំបន់ទេសចរណ៍ផ្សេងទៀត ភាពទន់ខ្សោយនៃទំនាក់ទំនងទីផ្សាររវាងឧស្សាហកម្មទេសចរណ៍ និងវិស័យដទៃទៀត និងសមត្ថភាពជំរុញផ្សព្វផ្សាយវិស័យទេសចរណ៍នៅមានកម្រិត ធ្វើឱ្យប្រទេសកម្ពុជាពុំទាន់អាចទាញប្រយោជន៍ពេញលេញពីវិស័យនេះនៅឡើយ ។
បន្ថែមពីលើការផ្ដល់ថវិកាសម្រាប់សាងសង់កំពង់ផែនេះ គម្រោងនេះក៏នឹងផ្ដល់ហិរញ្ញប្បទានសម្រាប់ការកែលម្អផ្លូវជនបទប្រវែង៦,៥ គីឡូម៉ែត្រ និងការកែលម្អការគ្រប់គ្រងទឹក សំណល់នៅតាមតំបន់ដែលមានការអភិរក្សស្ថាបត្យកម្មខ្មែរជំនាន់អាណានិគម នៅក្នុងខេត្ដកំពត និងតំបន់ប្រជុំជនតាមឆ្នេរសមុទ្រនៅខេត្ដកែប និងខេត្ដកោះកុង ផងដែរ ។ គម្រោងនេះនឹងផ្ដល់សេវាគាំទ្រអាជីវកម្មដល់សហគ្រាសខ្នាតតូចបំផុត ខ្នាតតូច និងខ្នាតមធ្យម យ៉ាងហោចណាស់ចំនួន៣៧៥ រួមនឹងការកសាងសមត្ថភាពដល់ទីភ្នាក់ងាររាជរដ្ឋាភិបាលមួយចំនួន ដែលក្នុងនោះមានទាំងក្រសួងទេសចរណ៍ផង ។ គម្រោងនេះក៏នឹងសម្រួលឱ្យមានការវិនិយោគឯកជន សម្រាប់ដំណើរការសេវាកម្មដឹកអ្នកដំណើរពីកំពង់ផែនេះផងដែរ ក៏ដូចជាបង្កើតនូវគំរូមួយ សម្រាប់ប្រើប្រាស់ការបង់ថ្លៃចូលរបស់ភ្ញៀវទេសចរ និងថ្លៃសេវានានា ដើម្បីរ៉ាប់រងលើការជួសជុលហេដ្ឋារចនាសម្ព័ន្ធសាធារណៈ ។
គម្រោងដែលនឹងដំណើរការរយៈពេល៥ឆ្នាំ រហូតដល់ខែធ្នូ ឆ្នាំ២០១៩ គឺជាគម្រោងដែលបំពេញបន្ថែមឱ្យគំនិតផ្ដួចផ្ដើមស្រដៀងៗគ្នានេះ ដែលកំពុងអនុវត្ដនៅក្នុងប្រទេសឡាវ និងវៀតណាម ។ វាគឺជាផ្នែកមួយនៃការពង្រីកវិស័យទេសចរណ៍ឆ្លងដែន ក្នុងមហាអនុតំបន់មេគង្គនេះ ដែលមានកំណើនភ្ញៀវទេសចរអន្ដរជាតិជាមធ្យម១២%ក្នុងមួយឆ្នាំ អាចរកចំណូលបានជាង៤៤ពាន់លានដុល្លារ និងបង្កើតនូវការងារជាង៧លានកន្លែង ។ មានមូលដ្ឋាននៅទីក្រុងម៉ានីល ធនាគារអភិវឌ្ឍន៍អាស៊ីប្ដេជ្ញាកាត់បន្ថយភាពក្រីក្រ នៅអាស៊ី និងប៉ាស៊ីហ្វិក តាមរយៈកំណើនសេដ្ឋកិច្ចដើម្បីទាំងអស់គ្នា កំណើនដែលធានានិរន្ដរភាពបរិស្ថាន និងសមាហរណកម្មតំបន់ ។ បង្កើតឡើងនៅក្នុងឆ្នាំ១៩៦៦ ធនាគារនេះគឺជាកម្មសិទ្ធិរបស់សមាជិកចំនួន៦៧ប្រទេស ដែលក្នុងនោះមាន៤៨ប្រទេសមកពីតំបន់នេះ ។ នៅក្នុងឆ្នាំ២០១៣ ជំនួយដែលផ្តល់ដោយធនាគារអភិវឌ្ឍន៍អាស៊ីសរុបមានចំនួន២១ពាន់លានដុល្លារ បូករួមទាំងសហប្រទានចំនួន៦,៦ពាន់លានដុល្លារផង ៕
ចែករំលែកព័តមាននេះ