ខេត្តក្រចេះ ៖ អ្នកភូមិចំនួន៦នាក់ មានស្រីមានប្រុស បានស្លាប់ជាបន្តបន្ទាប់ក្នុងអំឡុងពេល៩ថ្ងៃ គិតចាប់ពីថ្ងៃទី១៤ដល់ថ្ងៃទី២២ វិច្ឆិកា ហើយអាជ្ញាធរសន្និដ្ឋានថា អាចមកពីពុលស្រាសច្រើនជាងបញ្ហាអ្វីផ្សេង ព្រោះអាការរបស់ជនរងគ្រោះទាំង៦នាក់មុនពេលស្លាប់គឺមានសភាពប្រហាក់ប្រហែលគ្នា ។ ការភ័យខ្លាចរបស់អ្នកឃុំតាម៉ៅ បានកើតមានឡើងក្រោយពីសំឡេងមេក្រូបន្លឺបទក្លងខែកលាន់ឮទ្រហុឹងពេញភូមិបន្តបន្ទាប់គ្នាគឺបុណ្យសពមួយចប់ បុណ្យសពមួយទៀតចាប់ផ្ដើមដែលជាពិធីបុណ្យសពរបស់ជនរងគ្រោះប្រុស ស្រីចំនួន៦នាក់ ដែលបានស្លាប់បន្តបន្ទាប់ ។ ការស្លាប់នេះកើតឡើងក្រោយពីជនរងគ្រោះទាំង៦នាក់ បានផឹកស្រាសរួចមក ក្នុងនោះក៏មានជនរងគ្រោះម្នាក់ជាកូនអ្នកផលិត និងជាអ្នកលក់ស្រានេះផងដែរ ។
ប្រភពព័ត៌មានពីអ្នករស់នៅឃុំតាម៉ៅ ស្រុកព្រែកប្រសព្វ បានឲ្យដឹងថា ការស្លាប់របស់អ្នកភូមិគឺកើតឡើងចាប់ពីថ្ងៃទី១៤ ខែវិច្ឆិកា មក បន្ទាប់ពីអ្នកភូមិទាំងនោះបានទទួលទានស្រាស ហើយក៏កើតអាការស្រវាំងភ្នែក តឹងដើមទ្រូង រហូតស្លាប់ជាបន្តបន្ទាប់ ។ ក្នុងនោះក៏មានអ្នកភូមិចំនួន៣នាក់ផ្សេងទៀតកើតអាការបែបនេះនិងកំពុងសម្រាកព្យាលបាលនៅមន្ទីរពេទ្យបង្អែកឆ្លូង ។ ជនរងគ្រោះប្រុស-ស្រីទាំង៦នាក់ ត្រូវបានអាជ្ញាធរបញ្ជាក់អត្តសញ្ញាណឱ្យដឹងថា ៖
១-ឈ្មោះ ឱ រ៉េន អាយុ៥២ឆ្នាំ ស្លាប់នៅថ្ងៃ ទី១៤ ខែវិច្ឆិកា ក្រោយពេលឈប់ផឹកស៊ីបន្ដិច ។
២-ឈ្មោះ ឱ យ៉ាន អាយុ៥០ឆ្នាំ ស្លាប់ថ្ងៃ្ងទី១៥ វិច្ឆិកា ។
៣-ឈ្មោះ ហេង សុក អាយុ៤៥ឆ្នាំ ស្លាប់នៅថ្ងៃទី១៩ វិច្ឆិកា ។
៤-ឈ្មោះ ផ្លុង ភឿន អាយុ៥៣ឆ្នាំ ស្លាប់នៅថ្ងៃទី២០ វិច្ឆិកា នៅមន្ទីរពេទ្យបង្អែកខេត្ត ។
៥-ឈ្មោះ ឈុំ សារឿន អាយុ៦៥ឆ្នាំ ស្លាប់នៅថ្ងៃទី២២ វិច្ឆិកា ។
ជនរងគ្រោះទាំង៥នាក់ស្លាប់នៅផ្ទះរៀងៗខ្លួន និងមានទីលំនៅក្នុងភូមិខ្សាត់ ឃុំតាម៉ៅ ស្រុកព្រែកប្រសព្វ និងស្ដ្រីរងគ្រោះទី៦-ឈ្មោះ ភិន សុភា អាយុ៣៦ឆ្នាំ បានស្លាប់នៅក្នុងថ្ងៃទី២២ វិច្ឆិកា ដូចគ្នា រស់នៅក្នុងភូមិតាម៉ៅក្រោម ឃុំតាម៉ៅ ស្រុកព្រែកប្រសព្វ ។ យ៉ាងណាក៏ដោយ រហូតមកទល់នឹងពេលនេះសមត្ថកិច្ចក៏ដូចជាមន្ត្រីជំនាញមិនទាន់បានបញ្ជាក់ឲ្យច្បាស់ថា ការស្លាប់នេះបណ្តាលមកពីមូលហេតុពុលស្រា ឬក៏ពុលចំណីអាហារនៅឡើយនោះទេ ។ សេចក្តីរាយការណ៍ពីភូមិកើតហេតុបានឲ្យដឹងថា ជនរងគ្រោះមួយចំនួនខាងលើក្រោយផឹកស្រាសរួចក៏កើតអាការស្រវាំងភ្នែក និងតឹងដើមទ្រូងរហូតដល់ស្លាប់ក្រោយពីទិញស្រាសមកទទួលទានជាមួយគ្នា និងខ្លះស្លាប់ក្រោយពីទិញស្រាមកទទួលទាននៅផ្ទះ ។
អធិការនគរបាលស្រុកព្រែកប្រសព្វ លោកវរសេនីយ៍ត្រី ម៉ែន ប៊ុនធឿន បានឲ្យដឹងនៅថ្ងៃទី២៥ វិច្ឆិកា ថា សមត្ថកិច្ចមិនទាន់បានកំណត់ជាក់លាក់ណាមួយថា ការស្លាប់របស់ជនរងគ្រោះទាំង៦នាក់នេះបណ្តាលមកពីមូលហេតុអ្វីនៅឡើយទេ តែដោយសារតែអាការរបស់ជនរងគ្រោះមុនពេលស្លាប់គឺកើតមានស្រដៀងគ្នា ។ ទោះជាយ៉ាងណាសមត្ថកិច្ចសង្ស័យថា បណ្តាលមកពីមានជាតិពុលក្នុងស្រាទើបមន្ទីរសុខាភិបាលខេត្តបានយកស្រាមួយចំនួនដែលនៅសេសសល់ពីការទទួលទាន និងពីកន្លែងលក់ទៅធ្វើកោសល្យវិច័យរកមើលសារជាតិពុល ។ អភិបាលស្រុកព្រែកប្រសព្វ លោក អ៊ាន ណារម្យ ធ្វើការសន្និដ្ឋានថា ការស្លាប់របស់ជនរងគ្រោះប្រុសស្រីទាំងនេះអាចបណ្តាលមកពីពុលស្រាសគឺមិនពាក់ព័ន្ធទៅនឹងជំនឿអរូបីផ្សេងណាមួយដូចការលើកឡើងរបស់អ្នកស្រុកនោះទេ ។
បើតាមមន្ត្រីសុខាភិបាលបានឲ្យដឹងថា អាការបែបនេះគឺអាចបណ្តាលមកពីពុលដោយសារជនរងគ្រោះទទួលទានស្រាស ហើយស្រានោះអាចមានជាតិពុលប្រភេទថ្នាំអង់ឌ្រីន ។ ការស្លាប់ជាបន្តបន្ទាប់ គឺមកពីពួកគាត់ទទួលទានតិចឬក៏ច្រើនតែប៉ុណ្ណោះ ។ តាមប្រភពមួយនិយាយថា ស្រាសដែលផលិតនេះមានលាយថ្នាំអង់ឌ្រីនដើម្បីឱ្យវាខ្លាំង ។ កាលណាស្រាខ្លាំងទើបលក់ដាច់ ទើបមានអ្នកផឹក ។ វាស៊ីសងដាក់តិចឬច្រើនប៉ុណ្ណោះកាលណាដាក់ថ្នាំអង់ឌ្រីនបែបចាស់ដៃ មិនត្រឹមតែធ្វើឱ្យស្រានោះខ្លាំងទេ តែគឺខ្លាំងដល់ពុលតឹងដើមទ្រូងស្លាប់តែម្ដង ៕
ចែករំលែកព័តមាននេះ