រាជធានីភ្នំពេញ ៖ បុគ្គលិកបម្រើការងារនៅអាកាសយានដ្ឋានអន្តរជាតិសៀមរាប ប្រមាណជាង២០០នាក់ កាលពីព្រឹកថ្ងៃទី២៤ វិច្ឆិកា បានប្រមូលផ្តុំគ្នានៅមុខអគារបម្រើការងាររបស់ខ្លួនធ្វើកូដកម្ម ដើម្បីទាមទារឲ្យអ្នកគ្រប់គ្រងរបស់ខ្លួនគោរពលក្ខខណ្ឌការងារចំនួន៧ចំណុច។ នេះជាកូដកម្មលើកទីពីរហើយ សម្រាប់ក្រុមហ៊ុនអាកាសយានដ្ឋានអន្តរជាតិសៀមរាប ចាប់តាំងពីកើតមានវិវាទផលប្រយោជន៍រវាងអ្នកគ្រប់គ្រងជាមួយបុគ្គលិកបម្រើការងារ ដែលបានអូសបន្លាយចាប់តាំងពីឆ្នាំ២០១២ រហូតមក ។
ប្រធានសហពន្ធ័សហជីពវិស័យទេសចរណ៍ខេត្តសៀមរាប លោក ម៉ម រិទ្ធី ដែលបានចូលរួមដឹកនាំក្នុងកូដកម្មនោះថ្លែងថា កូដកម្មនោះបានចាប់ផ្តើមឡើងនៅវេលាម៉ោង៨ព្រឹកថ្ងៃទី២៤ វិច្ឆិកា នៅពីមុខអគាររដ្ឋបាលនៃអាកាសយានដ្ឋានអន្តរជាតិសៀមរាប ដោយមានអ្នកចូលរួមប្រមាណជាង២០០នាក់ ក្នុងនោះ១៥០នាក់ ជាសមាជិកសហជីពឧស្សាហ៍កម្មទេសចរណ៍នៃអាកាសយានដ្ឋានអន្តរជាតិសៀមរាប និង៦០នាក់ផ្សេងទៀតមកពីសហជីពខាងក្រៅ ។ ទោះជាយ៉ាងណា នៅក្នុងក្បួនកូដកម្មនោះ គេពុំឃើញមានផ្ទុះអំពើហិង្សាអ្វីកើតឡើងទេ ខណៈគេឃើញមានកម្លាំងសមត្ថកិច្ចជាច្រើននាក់ រួមទាំងមន្ត្រីសង្គមស៊ីវិលជាច្រើននាក់ផ្សេងទៀត ត្រូវបានបញ្ជូនទៅកាន់ទីនោះរួចជាស្រេចក្តី ។
ជាមួយគ្នាដែរ អនុប្រធានសហជីពឧស្សាហកម្មទេសចរណ៍ខេត្តនៃអាកាសយានដ្ឋានអន្តរជាតិសៀមរាប ដែលបានដឹកនាំធ្វើកូដកម្មបានថ្លែងបែបព្រមានថា កូដកម្មនេះនឹងបន្តធ្វើដោយគ្មានពេលកំណត់ រហូតដល់ការទាមទាររបស់ពួកយើង ត្រូវបានអ្នកគ្រប់គ្រងទទួលយក ហើយបោះបង់ចោលទាំងស្រុងនូវគោលការណ៍ការងារទាំងឡាយណា ដែលនាំឲ្យខាតបង់ដល់ផលប្រយោជន៍របស់ពួកកម្មករ ។ លោកបានថ្លែងបន្តថា កូដកម្មនេះពួកយើងបានទាមទារឲ្យខាងអ្នកគ្រប់គ្រងក្រុមហ៊ុន ឬខាងភាគីនិយោជក ទទួលយកនូវលក្ខខណ្ឌការងារចំនួន៧ចំណុច ក្នុងនោះរួមមាន ៖
១-ទាមទារឲ្យរក្សានូវលក្ខខណ្ឌការងារចាស់ដដែលវិញ ដោយគ្មានពហុជំនាញ ប៉ុន្តែបើក្រុមហ៊ុនចង់បង្កើតពហុជំនាញ ត្រូវមានការចរចាអត្ថប្រយោជន៍អនុវត្តអនុសញ្ញាបន្ថែមជាមុន ។ ២-ក្រុមហ៊ុនត្រូវបែងចែកវេនធ្វើការងារជាបីវេន តាមច្បាប់ការងារដែលបានកំណត់ គឺវេនព្រឹក ល្ងាច និងវេនយប់ ។ ៣-ក្រុមហ៊ុនត្រូវបញ្ឈប់ជួលបុគ្គលិកពីខាងក្រៅ ដែលផ្ទុយពីអនុសញ្ញារួម និងជាទង្វើរើសអើងសហជីព និងថែមទាំងធ្វើឱ្យបាត់បង់អត្ថប្រយោជន៍របស់កម្មករនិយោជិតទៀតផង ។ ៤-ក្រុមហ៊ុនពិនិត្យមើលប្រាក់បៀវត្សបុគ្គលិកបើកបរ (GSE driver) ព្រោះប្រាក់បៀវត្សរបស់ពួកគាត់មិនសមាមាត្រ និងឧបករណ៍សព្វថ្ងៃនេះឡើយ ។
៥-ក្រុមហ៊ុនត្រូវបើកប្រាក់បៀវត្សផ្សេងពីប្រាក់បាយ ។ ៦-ក្រុមហ៊ុនត្រូវផ្លាស់ប្តូរអ្នកគ្រប់គ្រងចំនួនពីរូប គឺលោក ភួង សុជាតិ និងលោក សន សារ៉ុម ចេញពីអាកាសយានដ្ឋានខេត្តសៀមរាប។ ៧-ក្រមហ៊ុនត្រូវទទួលយកលោក នន កុសល ចូលធ្វើការវិញ និងទូទាត់ប្រាក់បៀវត្ស ចាប់ពីថ្ងៃបញ្ឈប់ រហូតដល់ថ្ងៃចូលធ្វើការវិញ ។
ទោះជាយ៉ាងនេះក្តី នៅថ្ងៃដដែលនេះ មិនអាចជួបតំណាងក្រុមហ៊ុនអាកាសយានដ្ឋានអន្តរជាតិសៀមរាបបានទ ដោយពុំមានអ្នកស្គាល់លេខទូរស័ព្ទ ។ ចំណែកអភិបាលរងខេត្តលោក ប៊ុន ថាឬទ្ធិ និងជាអ្នកនាំពាក្យសាលាខេត្ត ក៏មិនអាចទាក់ទងបានដែរ នៅរសៀលថ្ងៃដដែលនេះ ដោយទូរសព្ទ័លោកហៅចូលតែគ្មានអ្នកទទួល ។ ដូច្នេះគេមិនអាចដឹងថា ទាំងអាជ្ញាធរនិងក្រុមហ៊ុនមានឆន្ទៈបញ្ចប់វិវាទ ដ៏រ៉ាំរ៉ៃនោះបានយ៉ាងដូចម្តេចនោះទេ ។ សូមបញ្ចាក់ថា វិវាទរវាងបុគ្គលិក និងអ្នកគ្រប់គ្រងអាកាសយានដ្ឋានអន្តរជាតិសៀមរាប ដែលវិនិយោគដោយក្រុមហ៊ុនបារាំង បានផ្ទុះឡើងតាំងពីឆ្នាំ២០១២ មកម្ល៉េះ ហើយនៅឆ្នាំ២០១៣ ក្រុមបុគ្គលិកដែលបង្កើតសហជីពនៅក្នុងនោះ បានផ្ទុះកូដកម្មអហិង្សាម្តងរួចមកហើយ ។ ប៉ុន្តែត្រូវបានស្ងប់ស្ងាត់មួយរយៈពេលវែង ក្រោមកិច្ចសម្របសម្រួលរបស់លោក ឃឹម ប៊ុនសុង អភិបាលខេត្តសៀមរាប និងលោករដ្ឋលេខាធិការនៃទីស្តីការគណៈរដ្ឋមន្ត្រីមួយរូបទៀត ។ ពេលនេះ បានកក្រើកឡើងវិញនៅពេលភាគីខាងបុគ្គលិកចោទទៅលើភាគីអ្នកគ្រប់គ្រងថា មិនគោរពកិច្ចព្រមព្រៀងរួម ៕
ចែករំលែកព័តមាននេះ