រាជធានីភ្នំពេញ ៖ ក្រុមចោរប្រដាប់អាវុធ៣នាក់ជិះម៉ូតូ២គ្រឿងបានធ្វើសកម្មភាពភ្ជង់ប្លន់យកម៉ូតូស៊ុយស៊ូគីឡែតមួយគ្រឿង ដែលជិះដោយមនុស្សប្រុស-ស្រី៣នាក់ រួចជិះគេចខ្លួនដោយសុវត្ថិភាព។ ហេតុការណ៍នេះកើតឡើងកាលពីវេលាម៉ោង ១២ និង ២០ នាទីអាធ្រាត្រ ឈានចូលថ្ងៃទី ២៦ វិចិ្ឆកា ២០១៤ នៅចំណុចមុខផ្ទះលក់ចាប់ហួយ សុខា រ៉ាវី តាមផ្លូវ១០៥K ច្រកចូលវត្តតាំងក្រសាំង ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
ជនរងគ្រោះដែលជាម្ចាស់ម៉ូតូមានឈ្មោះ វាំង ភេទប្រុស អាយុ២០ឆ្នាំ មុខរបរបញ្ចូលបទភ្លេងទូរស័ព្ទ ។
ប្រភពព័ត៌មានពីយុវជនរងគ្រោះបានឱ្យដឹងថា នៅមុនពេលកើតហេតុយុវជនរងគ្រោះបានជិះម៉ូតូស៊ុយស៊ូគីឡែតមួយគ្រឿង ពណ៌ស ពាក់ស្លាកលេខភ្នំពេញ1CL-1309 ដឹកគូរដណ្តឹង និងមិត្តភក្តិស្រីម្នាក់ទៀត ត្រឡប់មកពីដើរលេងវិញដោយធ្វើដំណើរតាមផ្លូវ105k ក្នុងទិសដៅពីត្បូង ទៅជើង ខណៈមកដល់ចំណុចកើតហេតុ ក៏មានជនសង្ស័យបីនាក់ប្រដាប់ដោយកាំភ្លើងក្នុងដៃពីរដើមជិះម៉ូតូពីរគ្រឿង (ស៊ុយ ស៊ូគីនិច ពណ៌ស និង MSX ) បានជិះមកកៀងម៉ូតូរបស់ជនរងគ្រោះ រួចហើយដកកាំភ្លើងភ្ជង់ជនរងគ្រោះឱ្យចុះពីលើម៉ូតូទាំង៣នាក់ ដោយបក្ខពួកចោរម្នាក់ចុះពីលើម៉ូតូស៊ុយស៊ូគីនិច ហើយឡើងជិះម៉ូតូស៊ុយស៊ូគីឡែត របស់ជនរងគ្រោះជិះគេចខ្លួនដោយសុវត្ថិភាព ។
ក្រោយពេលកើតហេតុគេឃើញសមត្ថកិច្ចមូលដ្ឋានបានចុះមកពិនិត្យកន្លែងកើតហេតុ និងបាននាំជនរងគ្រោះមកសួរនាំនិងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកាកាប។
ចែករំលែកព័តមាននេះ