រាជធានីភ្នំពេញ ៖ តូបលក់ដូរជាង៣០០នៅផ្សារចាស់ ដែលជាផ្សារដ៏មានប្រជាប្រិយភាពមួយ ស្ថិតក្នុងសង្កាត់វត្តភ្នំ ខណ្ឌដូនពេញ ត្រូវទទួលរងនូវមហន្តរាយស្ទើររលាយទាំងព្រឹក កាលពីវេលាម៉ោង៧និង១៥នាទី ថ្ងៃទី២៤ វិច្ឆិកា បង្កឱ្យមានការភ្ញាក់ផ្អើលយ៉ាងពពាក់ពពូន
រាជធានីភ្នំពេញ ៖ តូបលក់ដូរជាង៣០០នៅផ្សារចាស់ ដែលជាផ្សារដ៏មានប្រជាប្រិយភាពមួយ ស្ថិតក្នុងសង្កាត់វត្តភ្នំ ខណ្ឌដូនពេញ ត្រូវទទួលរងនូវមហន្តរាយស្ទើររលាយទាំងព្រឹក កាលពីវេលាម៉ោង៧និង១៥នាទី ថ្ងៃទី២៤ វិច្ឆិកា បង្កឱ្យមានការភ្ញាក់ផ្អើលយ៉ាងពពាក់ពពូន ដោយក្រុមអាជីវករបាននាំគ្នាជញ្ជូនអីវ៉ាន់យ៉ាងតក់ក្រហល់ពីតូបដែលមិនទាន់ឆេះ ដើម្បីគេចពីចំណីព្រះអគ្គី ស្របពេលរថយន្តពន្លត់អគ្គិភ័យជាច្រើនគ្រឿង ក៏បានមកជួយអន្តរាគមន៍បាញ់ទឹកផងដែរ ។
កងសន្តិសុខផ្សារចាស់និយាយថា នៅវេលាម៉ោងជាង៧ព្រឹកថ្ងៃទី២៤ វិច្ឆិកា មានផ្សែងហុយចេញពីក្នុងស្តង់លក់គ្រឿងជ័រលេខ០១ចាស់ ខណៈពេលអាជីវករមួយចំនួនមិនទាន់មកបើកតូបលក់ដូរផង ។ ភ្លាមនោះកម្លាំងសន្តិសុខផ្សារជួយបាញ់ទឹកពន្លត់ដែរ តែមិនអាចទប់ទល់បានក៏ក្លាយទៅជាអណ្តាតភ្លើងឆេះយ៉ាងសន្ធោសន្ធៅនិងរាលដាលដល់តូបផ្សេងទៀត ទើបអាជ្ញាធរផ្សារសុំកិច្ចអន្តរាគមន៍ពីក្រុមរថយន្តពន្លត់អគ្គិភ័យឱ្យមកជួយ ។ ភ្លាមនោះដែរ លោក គួច ចំរើន អភិបាលខណ្ឌដូនពេញ បានមានវត្តមាននៅកន្លែងកើតហេតុ និងបញ្ជាឱ្យកងកម្លាំងប្រជាការពារខណ្ឌ និងកងសន្តិសុខជួយការពារសម្ភាររបស់របរអាជីវករ ដែលជញ្ជូនចេញមកខាងក្រៅខ្លាចមានជនខិលខូចបន្លំយក ។
ក្រោយកើតហេតុប្រហែលជា១៥នាទី រថយន្តពន្លត់អគ្គិភ័យក៏បានមកដល់ជាបន្តបន្ទាប់ និងបានបាញ់ទឹកសំដៅទៅគោលដៅតូបដែលឆេះ តែភ្លើងក៏កាន់តែឆេះខ្លាំងទ្បើងៗបណ្តាលឱ្យរាលដាលដល់តូបលក់មាស តូបលក់ខោអាវ តូបលក់ផ្លែឈើ និងតូបលក់គ្រឿងសក្ការៈបន្តបន្ទាប់នៅផ្នែកខាងកើតផ្សារ ។ តាមរបាយការណ៍របស់អាជ្ញាធរមូលដ្ឋានជំហានដំបូងបានឱ្យដឹងថា អគ្គិភ័យបានឆាបឆេះដំបូងចេញពីតូបប៉ែកខាងកើតជាប់ផ្លូវធំ រួចហើយភ្លើងបានរាលដាលទៅកាន់តូបផ្សេងៗទៀត ក្លាយទៅជាអណ្តាតភ្លើងក្រហមឆ្អិនឆ្អៅយ៉ាងសន្ធោសន្ធៅនៅក្នុងផ្សារ ។ ពេលនោះអាជ្ញាធរនិងកម្លាំងសមត្ថកិច្ចគ្រប់ជាន់ថ្នាក់ បានចាប់ផ្តើមចេញប្រតិបត្តិការជួយអន្តរាគមន៍បញ្ជូនរថយន្តពន្លត់អគ្គិភ័យទាំងតូច ទាំងធំ គ្រប់អង្គភាពទៅកាន់កន្លែងកើតហេតុ ដើម្បីជួយបាញ់ទឹកពន្លត់ ។ ប៉ុន្តែដោយស្ថានភាពភ្លើងឆេះមានទ្រង់ទ្រាយធំ ហើយប្រតិបត្តិការបាញ់ទឹកពន្លត់មានការពិបាក ព្រោះតែតូបទាបៗពេក ប្រក់ស័ង្កសី បានធ្វើឱ្យប្រតិបត្តិការជួយសង្គ្រោះមួយនេះ អូសបន្លាយអស់រយៈពេលជាង៣ម៉ោង ពោលគឺតាំងពីម៉ោងជាង៧ព្រឹក ដែលភ្លើងចាប់ផ្តើមឆេះ រហូតដល់ម៉ោងជាង១០ព្រឹក ថ្ងៃដដែល ទើបរលត់អស់ទាំងស្រុង ។
លោក ព្រហ្ម យ៉ន ប្រធានអង្គភាពពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ បានឱ្យដឹងថា សមត្ថកិច្ចបានប្រើប្រាស់ពេលវេលាជាង២ម៉ោង ដើម្បីអន្តរាគមន៍ពន្លត់ ក្នុងនោះបានប្រើប្រាស់រថយន្តពន្លត់អគ្គិភ័យចំនួន១៩គ្រឿង ក្នុង១គ្រឿងៗដឹកជញ្ជូនទឹកមកបាញ់ពន្លត់ដល់ទៅ៥ដង ទើបនៅវេលាម៉ោង៩និង២០នាទីព្រឹកថ្ងៃដដែល ភ្លើងបានរលត់និងគ្រប់គ្រងស្ថានភាពបានទាំងស្រុង ។ នៅក្នុងហេតុការណ៍នេះដែរ ក៏មានរថយន្តពន្លត់អគ្គិភ័យមកពីអង្គភាព ង៧០ចំនួន៧គ្រឿង អង្គភាពកងរាជអាវុធហត្ថរាជធានីភ្នំពេញ ចំនួន២គ្រឿង និងអង្គភាពកងរាជអាវុធហត្ថលើផ្ទៃប្រទេស ចំនួន២គ្រឿងដែរ ព្រមទាំងមានអង្គភាពកងរាជអាវុធហត្ថខណ្ឌដូនពេញ និងកងរាជអាវុធហត្ថរាជធានីភ្នំពេញ ប្រមាណ១០០នាក់ មកជួយអន្តរាគមន៍ជញ្ជូនសម្ភារ និងការពារជូនបងប្អូនអាជីវករផងដែរ ។ លោក ឃួង ស្រេង អភិបាលរងរាជធានីភ្នំពេញ ដែលបានទៅពិនិត្យគ្រោះអគ្គិភ័យដោយផ្ទាល់ បានឃើញពីការលំបាកមែនក្នុងការជួយអន្តរាគមន៍បាញ់ទឹកពន្លត់ ពីសំណាក់រថយន្តពន្លត់អគ្គិភ័យ ពីព្រោះតូបនៅក្នុងផ្សារទាំងអស់ទាបពេក និងប្រក់ស័ង្កសីជិតជាប់ពីលើ ។ ដូច្នេះពេលបាញ់ទឹកស្រោចពីលើប៉ះស័ង្កសី ទឹកក៏ហូរចេញអស់ ហើយបើបាញ់ពីក្រោមចូលមិនដល់ ជាហេតុធ្វើឱ្យភ្លើងឆាបឆេះកាន់តែខ្លាំងទ្បើង ពីតូបមួយទៅតូបមួយ ។
ដោយទ្បែក ប្រធានផ្សារចាស់ លោក យន់ ចាន់ដារា បានបញ្ជាក់ថា តូបទាំងអស់នៅក្នុងផ្សារមានចំនួន៩១៤តូប ក្នុងនោះតូបលក់ដូរជាង៣០០ ត្រូវឆេះទាំងស្រុង ខណៈដែលតូបផ្សេងទៀត ខ្លះឆេះរោលនិងខ្លះក៏ប៉ះពាល់ ។ លោក ឃួង ស្រេង បានថ្លែងថា បើទោះបីតូបជាង៣០០ ត្រូវបានឆេះបំផ្លាញទាំងស្រុង ប៉ុន្តែកម្លាំងអន្តរាគមន៍បានជួយបាញ់ពន្លត់នៅជុំវិញផ្សារ ដើម្បីទុកលទ្ធភាពឱ្យប្រជាពលរដ្ឋនិងអាជីវករជញ្ជូនអីវ៉ាន់របស់ពួកគេចេញ ហើយការបាញ់ស្កាត់នេះ ក៏មិនបណ្តាលឱ្យភ្លើងរាលដាលដល់តូបផ្សេងៗទៀត និងផ្ទះល្វែងនានា នៅជាប់ផ្សារនោះដែរ ។ អាជ្ញាធររាជធានីភ្នំពេញបំភ្លឺបន្ទាប់ពីមហន្តរាយនៅផ្សារចាស់បានកើតទ្បើង អាជ្ញាធររាជធានីភ្នំពេញបានចេញផ្សាយសេចក្តីបំភ្លឺមួយ ដោយបញ្ជាក់ថា ពាក់ព័ន្ធនឹងករណីអគ្គិភ័យឆាបឆេះតូបផ្សារចាស់កាលពីព្រឹកថ្ងៃទី២៤ វិច្ឆិកា ឆ្នាំ២០១៤ អាជ្ញាធររាជធានីភ្នំពេញ សូមបដិសេធទៅនឹងសាធារណមតិខ្លះ ដែលបានលើកទ្បើងថា មានអ្នកលួចដុតផ្សារ ដើម្បីធ្វើការអភិវឌ្ឍថ្មី (ដោយហេតុអាជីវករមិនយល់ព្រម) ។ តាមការជាក់ស្តែង អគ្គិភ័យនេះ គឺបណ្តាលពីការឆ្លងចរន្តអគ្គិសនីទុស្សេខ្សែភ្លើង ចេញពីតូបលេខ០១ចាស់ លក់ថង់ប្លាស្ទិក ដែលនៅក្បែរខ្លោងទ្វារចេញចូលខាងកើតក្រោយតូបលក់ផ្លែឈើ ។
សេចក្តីបំភ្លឺបានគូសបញ្ជាក់ទៀតថា ឆ្លៀតក្នុងឱកាសនេះ ក៏សូមអំពាវនាវដល់បណ្តាអ្នកសារព័ត៌មាន ឬអ្នកប្រើប្រាស់បណ្តាញសង្គមហ្វេសប៊ុកទាំងអស់ មេត្តាកុំយកទុក្ខសោករបស់អាជីវករ ដែលកំពុងកើតមានដើម្បីយកមកកេងចំណេញ ឬមួលបង្កាច់មកលើអាជ្ញាធរមានសមត្ថកិច្ចតាមរូបភាពផ្សេងៗ ។ ក្រោយពីមានអគ្គិភ័យឆេះផ្សារចាស់រួចមកនៅរសៀល ថ្ងៃទី២៤ វិច្ឆិកា លោក គួច ចំរើន អភិបាលខណ្ឌដូនពេញ បានបើកកិច្ចប្រជុំជាមួយមន្ត្រីដែលជាក្រុមការងារ ដើម្បីចុះទៅស្រង់ស្ថិតិវាយតម្លៃពីផលប៉ះពាល់ និងជួបជាមួយក្រុមអាជីវករផ្សារចាស់ ដែលទទួលរងការខូចខាតដោយសារអគ្គិភ័យ ។ វិធានការនេះត្រូវបានអនុវត្តតាមការណែនាំពីលោកអភិបាលរាជធានីភ្នំពេញ លោក ប៉ា សុជាតិវង្ស ។ នៅក្នុងកិច្ចប្រជុំខាងលើនេះ អភិបាលខណ្ឌដូនពេញ លោក គួច ចំរើន បានលើកទ្បើងថា ក្រុមការងាររបស់ខណ្ឌ នឹងចុះទៅវាយតម្លៃផលប៉ះពាល់សរុបពីការឆេះតូប នៅក្នុងផ្សារនិងរកវិធានការដោះស្រាយជូនពួកគាត់ទ្បើងវិញ ចៀសវាងមានការយល់ច្រទ្បំនិងលើកទ្បើងផ្សេងៗ ។ លោកអភិបាលខណ្ឌមានប្រសាសន៍ទៀតថា ក្រុមការងារនឹងទៅពិនិត្យទីតាំងកន្លែងកើតហេតុ ព្រមទាំងជួបសំណេះសំណាលជាមួយក្រុមអាជីវកររងគ្រោះ នៅវេលាម៉ោង៧ព្រឹក ថ្ងៃទី២៥ វិច្ឆិកា ថាតើនឹងដោះស្រាយយ៉ាងដូចម្តេច ? ប៉ុន្តែលោកបានបញ្ជាក់ទៅក្រុមអាជីវករថា ពុំមានការទ្បោមព័ទ្ធរំលោភ ឬដកហូតយកទីតាំងនោះ ដូចការលើកទ្បើងផ្សេងៗនោះទេ ។
ជាមួយគ្នានោះដែរ លោកអភិបាលខណ្ឌដូនពេញ បានសន្និដ្ឋានជំហានដំបូងពីការខូចខាតថាអស់ទឹកប្រាក់ប្រមាណជាង១លានដុល្លារ ហើយនៅព្រឹកនេះ លោកនឹងដឹកនាំក្រុមការងារចុះជួបអាជីវករផ្ទាល់ ដើម្បីប្រមូលយកមតិយោបល់ និងតម្រូវការជាក់ស្តែង របស់បងប្អូនអាជីវករ ។ លោកថា លទ្ធផលយ៉ាងណាក្រុមការងារ នឹងធ្វើរបាយការណ៍បញ្ចូនទៅលោកអភិបាលរាជធានីភ្នំពេញ សម្រេចបន្តទៀត ។ លោកអភិបាលខណ្ឌ បញ្ជាក់ថា អាជីវករណាមិនរងផលប៉ះពាល់អាចលក់ដូរបាននោះ គឺលក់ដូរជាធម្មតាវិញចុះ ចាប់ពីថ្ងៃទី២៥ វិច្ឆិកា ។ ចំណែកសន្តិសុខសុវត្ថិភាព សូមថែរក្សាខ្លួនឯងផង ៕
ចែករំលែកព័តមាននេះ