រាជធានីភ្នំពេញ ៖ ស្រ្តីមិនស្គាល់អត្តសញ្ញាណម្នាក់ដើរតាមផ្លូវម្នាក់ឯង ត្រូវម៉ូតូមួយគ្រឿងមិនស្គាល់អត្តសញ្ញាណបើកមកបុកស្រ្តីរូបនោះបោកសន្លប់កណ្តាលថ្នល់ ចំណែកអ្នកបើកម៉ូតូបានលើកម៉ូតូជិះគេចខ្លួនបាត់ទៅ បន្ទាប់មកក៏មានរថយន្តពីរគ្រឿងទៀតបើកមកកិនពីលើស្រ្តីរងគ្រោះបន្តបន្ទាប់បណ្តាលឱ្យដាច់ក្បាលដាច់សាច់មើលមិនស្គាល់ស្លាប់យ៉ាងអាណោចអាធ័ម។ហេតុការណ៍នេះកើតឡើងកាលពីវេលាម៉ោង២ និង៣០នាទីរំលងអាធ្រាត្រឈានចូលថ្ងៃទី២៥ វិចិ្ឆកា ២០១៤ នៅចំណុចផ្លូវលេខ៣ កែង និងផ្លូវ៣០ម៉ែត្រ ស្ថិតក្នុងភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ ។
ប្រភពព័ត៌មានបានឱ្យដឹងថា មុនពេលកើតហេតុស្រ្តីរងគ្រោះមិនស្គាល់អត្តសញ្ញាណខាងលើបានដើរតែម្នាក់ឯងតាមផ្លូវជាតិលេខ៣ ខណៈមកដល់ចំណុចកើតហេតុស្រ្តីរងគ្រោះបំរុងដើរឆ្លងទៅផ្លូវ៣០ម៉ែត្រ ក៏ត្រូវម៉ូតូមួយគ្រឿង ជិះគ្នាពីរនាក់បានបើកមកបុកស្រ្តីរងគ្រោះដួលបោកទៅលើថ្នល់សន្លប់នៅនឹងកន្លែង ចំណែកអ្នកជិះម៉ូតូនាំគ្នាលើកម៉ូតូជិះគេចខ្លួនអស់ ។ បន្ទាប់មកទៀតក៏មានរថយន្តកាមរីមិនស្គាល់អត្តសញ្ញាណមួយគ្រឿងទៀត បើកមកកិនពីលើស្រ្តីរងគ្រោះបណ្តាលឱ្យដាច់ក្បាលដាច់សាច់មុខមាត់ បែកសាច់ដៃជើង មើលមិនស្គាល់ ហើយដោយសារតែមេឃធ្លាក់ភ្លៀងមកយ៉ាងខ្លាំងក៏មានរថយន្តបែនមួយគ្រឿងទៀតបើកមកមើលផ្លូវមិនច្បាស់ក៏បានបើកមកកិនបន្ថែមពីលើសាកសពស្រ្តីខាងលើ ជាប់បំណែកសាកសពស្រ្តីរងគ្រោះទៅតាមកង់រថយន្ត ។
ក្រោយពេលកើតហេតុសមត្ថកិច្ចបានចុះទៅពិនិត្យកន្លែងហេតុ និងបានដឹកសាកសពស្រ្តីរងគ្រោះខាងលើទៅតម្កល់ទុកនៅវត្តពោធិចិនតុង ដើម្បីស្រាវជ្រាវរកអត្តសញ្ញាណសព ដើម្បីទាក់ទងឱ្យក្រុមគ្រួសារមកទទួលយកទៅធ្វើបុណ្យតាមប្រពៃណី។
ចែករំលែកព័តមាននេះ